SPORTS

Pansamantala munang hindi makakalaro ang Cleveland Cavaliers power forward na si Kevin Love matapos isailalim sa seven days quarantine isolation makaraang maexpose sa isang nagpositibo sa COVID-19.

Hindi naman nabanggit kung nagpositibo sa COVID-19 si Love na isang off bench player ng Cavs na may average na 9.9 points at 7.3 rebounds at may average career-low na 20.7 minutes sa kada game.

Nabatid na sa panuntunan ng NBA, ang mga fully vaccinated na manlalaro ay hindi na dapat sumailalim pa sa quarantine isolation sa halip ay isailalim na lamang sila sa COVID-19 testing. — sa panulat ni Angelica Doctolero

Ibinida ni Lakers Player Lebron James at ng iba pang NBA superstars ang kanilang halloween costume ngayong All Saints at All Souls Day.

Suot ni Lebron ang “Freddy Krueger” habang ipinasilip naman ni Russell Westbrook ang kaniyang“Chucky Look” sa pelikulang Child’s Play Film Franchise.

Bukod pa sakanila, nagsuot naman ng “Candyman” look ang 19-year NBA veteran na si Carmelo Anthony habang ginaya naman ng Lakers player na si Dwight Howard si “Rasputia Latimore” sa 2007 movie na “Norbit.”

Hinatak naman ng blazers player na si Damian Lillard ang kaniyang pamilya upang gayahin ang “The Flinstones” family.

Samantala, nagsuot din ng costume bilang sina Wolverine at Storm si Lakers player na si Rajon Rondo at ang kanyang misis.

Nabatid na patok ngayongbuwan ng Nobyembre sa mga social media site, ang ibat-ibang halloween make up idea na ikinatuwa naman ng mga manlalaro ng NBA. —sa panulat ni Angelica Doctolero

Nabigong makapuntos ang Philippine Azkals sa 2022 Asian Football Confederation Under-23 men’s team Asian Cup Qualifiers.

Sa puntong 1-0 naungusan ng Timor Leste sa laban. Ang pambato ng Pilipinas na Philippine Azkals na ginanap sa Jalan Besar Stadium sa Singapore.

Kinontrol ng Azkals U-23 team ang lahat ng possession sa laban, ngunit hindi umubra ang depensa nito sa ipinakitang lakas ng katapat na koponan.

Kasalukuyang nakatabla ang Timor Leste sa Singapore na may 4 na puntos at umaasa na matatalo ang host country sa kanilang huling group stage laban sa South Korea para sa posibleng shot upang makapasok sa main continental tournament na nakatakda sa Hunyo ng susunod na taon. – Sa panulat ni Joana Luna

Muling magsasanay si Olympic Gold Medalist Hidilyn Diaz sa Malacca, Malaysia.

Ito’y bilang preparasyon para sa 2021 World Weightlifting Championships sa Tashkent, Uzbekistan sa Disyembre 7 hanggang 17.

Bukod sa World championships ay sasalang din ang Zamboangeña sa 31st Southeast Asian Games sa Hanoi, Vietnam sa Mayo at sa Asian games sa Hangzhou, China sa Setyembre.

Kasama ng 30 anyos na Olympic Weightlifter sa Malaysia ang kanyang fiance na si strength and conditioning Coach Julius Naranjo.

Matapos ang mga nasabing torneyo ay pag-iisipan ni Diaz kung muling lalahok sa 2024 Paris Olympics sa France.—sa panulat ni Drew Nacino

Nakalasap na ng unang pagkatalo ang Puerto Rican boxer na si Carlos Caraballo sa kamao ni Filipino bantamweight fighter Jonas Sultan sa kanilang 10-round clash sa Hulu Theater sa New York.

Na-knockdown si Caraballo ng apat na beses bago nasungkit ni Sultan ang unanimous decision victory.

Dahil dito, umakyat ang kartada ni Sultan sa 18 wins, 5 losses at 11 knockouts.

Nalugmok naman sa kanyang unang pagkatalo si Caraballo na sumampa sa ring taglay ang labing-apat na panalo kung saan lahat ng mga nakalaban ng Puerto Rican ay tinalo nito sa pamamagitan ng knockout.

Muling binitbit patungo sa panalo ni Pinoy Basketball sensation na si Kobe Paras ang Niigata Albirex sa all Japan 97^th Emperor’s Cup kontra Yamagata Wyverns.

Tinambakan ng Albirex ang Wyverns sa score na 71 – 60 sa kanilang paghaharap sa Kishiwada City Gym, sa Osaka, kahapon.

Nagpakawala ng 12 points si Paras kabilang ang tatlong 3 pointers upang umabante sa susunod na round.

Kumamada naman ng 11 points si Orlando Sanchez upang ihabol ang Yamagata pero nabigo.

Sunod na makakaharap ng Albirex mamaya ang Sendai 89ers. —sa panulat ni Drew Nacino

Pinataob ng Washington Wizards ang Boston Celtics sa score na 115-112 sa kanilang laro sa NBA na inabot ng 2 overtime.

Si Bradley Beal ang bumida sa panig ng Wizards matapos kumamada ng 36 points habang nakapagtala rin ng double-doubles sina Montrezl Harrell at Kyle Kuzma.

Samantala, si Jaylen Brown ang nanguna sa Boston sa pamamagitan ng kanyang 34 points habang nag-ambag naman si Jason Tatum ng 27 points.

Pinatunayan ni Filipino strawweight Jeremy “Jaguar” Miado na hindi tsamba ang kanyang knockout win noong 2019 laban kay Chinese fighter Li Tao Miao matapos niya itong dominahin muli sa ONE: NextGen sa Singapore.

Sa unang bahagi pa lamang ng laban ay nagpakitang gilas na si Miado at pinaulanan ng sunod-sunod na kombinasyon ang kalabang Tsino.

Pagsapit ng ikalawang round ay muling binakbakan ni Miado si Miao hanggang sa inawat na ng referee ang laban bago iginawad sa Pinoy fighter ang technical knockout win.

Tinuldukan na ng TNT Tropang Giga ang kanilang anim na taong Title Drought sa game 5 ng 2021 PBA Philippine Cup Finals kontra Magnolia Hotshots.

Tinambakan ng Talk ‘N Text ang Magnolia sa score na 94-79 upang seyluhan ang kartadang 4 – 1 sa kanilang best of seven series sa Don Honorio Ventura State University Gym sa Bacolor, Pampanga, kagabi.

Kapwa naging malaking bentahe para sa katropa ang ipinamalas na husay ni Mikey Williams na kumamada ng 24 points at RR Pogoy na nagpasiklab ng 19 points upang gibain ang Hotshots.

Dahil dito, tinanghal na finals most valuable player si Williams.

Samantala, nagpakawala ng 18 points si Ian Sangalang habang sumalaksak ng 14 points si Calvin Abueva pero bigong maihabol ang Magnolia. —sa panulat ni Drew Nacino

Makakaharap ng Philippine Women’s Football Team ang football team ng Australia sa 2022 AFC Women’s Asian Cup na gaganapin sa India.

Sa isinagawang draw ng FIFA, kabilang sa group B ang Pilipinas na nasa 11 ranking kasama ang Indonesia at Thailand.

Binubuo naman ang group A ng mga bansang India, China, Chinese Taipei at iran.

Habang kasama naman ng defending champion na Japan ang South Korea, Vietnam at Myanmar sa hanay ng group C.

Matatandaang na-sweep ng Team Philippines ang Asian Cup Qualifiers nuong nakaraang buwan sa Tashkent, Usbekistan kung saan tinalo nila ang Nepal at bansang Hongkong.