Pinadapa ng Denver Nuggets ang Houston Rockets sa score na 95-94 sa kanilang laro sa NBA.
Naipanalo ng Nuggets ang laban kahit nag-injury ang kanilang forward na si Michael Porter Jr. sa first quarter pa lamang ng laro.
Si Nikola Jokic ng bumida sa panig ng Denver matapos kumamada ng 28 points habang nagdagdag naman si Will Barton ng 15 points.
Pinataob ng Brooklyn Nets ang Detroit Pistons sa score na 96-90 sa kanilang laro sa NBA.
Kumamada si Kevin Durant ng 29 points habang nagdagdag naman si LaMarcus Aldridge ng 16 points para sa Nets.
Sa isa pang laro, pinahiya naman ng New York Knicks ang Milwaukee Bucks matapos itong ilampaso sa score na 113-98 sa kanilang sariling bakuran.
Si Julius Randle ang nanguna sa Knicks sa pamamagitan ng kanyang 32 points.
Itinapon ng Phoenix Super LPG si Vic Manuel sa NorthPort kapalit ni Sean Anthony.
Kabilang din sa trade ng Fuel Masters at Batang Pier si Sean Maganti na mapupunta sa Phoenix kasama ang future second-round pick.
Ayon sa PBA, aprubado na ng Office of the PBA Commissioner ang naturang deal.
Matatandaang sumabak si Manuel sa labing-isang laro sa Phoenix sa nakaraang torneo kung saan nag-a-average ito ng 12.82 points kada laro.
Hindi na makaboboto sa May 9, 2022 elections ang mga miyembro ng Philippine Delegate na sasabak sa 31st Southeast Asian Games sa Hanoi, Vietnam.
Ito’y makaraang itakda na ng host nation na Vietnam ang Sea Games sa Mayo a-12 hanggang a-23 ng susunod na taon.
Ayon kay Philippine Olympic Commmittee President Abraham Tolentino, 626 na mga miyembro ng philippine delagate na ipadadala sa nabanggit na event.
Aalis anya ang mga ito isang liggo bago opisyal na lumarga ang opening ceremony.
Una nang itinakda ang sea games sa Nobyembre 21 hanggang Disyembre 2 ngayong taon pero ipinagpaliban dahil sa COVID-19 pandemic. —sa panulat ni Drew Nacino
Pinaghahandaan na ni Olympian Gold Medalist Hidilyn Diaz ang kaniyang magiging laban sa world championship na gaganapin sa Tashkent, Uzbekistan.
Makikita ang back to Malaysia photo ni Hidilyn na kaniyang ipinost sa kaniyang instagram account kung saan, muli siyang mag eensayo sa dating gym na kaniyang pinagtetrainingan bago siya sumabak noong 2021 Tokyo Olympics.
Itinanghal si Diaz bilang Olympic Weightlifter Gold Medalist noong Hulyo 26 makaraang maitala ang kauna-unahang kasaysayan ng bansa. —sa panulat ni Angelica Doctolero
Susuportahan ng San Miguel Corporation ang tatlong mga boksingero ng Pilipinas para sa paghahangad ng Olympic gold medal sa 2024 Paris games.
Nangako si SMC President Ramon S. Ang na magpapaabot ito ng tulong kina nesthy Petecio, Carlo Paalam at Eumir Marcial, na kapuwa nag-uwi ng medalya sa bansa mula sa ginanap na Tokyo Olympics 2021.
Ani ang, nagbibigay-inspirasyon ang mga olympic medalist sa bawat Pilipino upang gawin ang makakaya sa kabila ng kinahaharap na pagsubok dala ng pandemya.
Gaganapin sa bansang france ang paris 2024 Olympic at Paralympic games mula Hulyo 26 hanggang Agosto 11, 2024
Humakot ng medalya sa World Online Poomsae Open Challenge ang Philippine taekwondo na isinagawa noong Setyembre 27 hanggang Oktubre 31, 2021.
Kabilang sa nakasungkit ng gintong medalya si Angelica Gaw sa Under 30 dibisyon ng open individual category na umiskor ng 7.650.
Nakuha naman ni Jun Ninobla ang 2nd place o silver medal sa Under 60 dibisyon ng men’s national team individual category na umiskor naman ng 7.470.
Pumangalawa din si Justin Kobe Macario sa mahigit 17 men’s national team freestyle category.
Samantala, sina Vincent Gabriel Rodriguez at Paul Anthony Rodriguez naman ang naging 2nd place sa siblings division ng family pair category habang naiuwi naman ni Janna Dominique Oliva ang bronze medal sa Over 17 women’s national team freestyle category.
Ang World Taekwondo Online Poomsae Open Challenge III ay isang virtual competition kung saan, nagpapadala online ang ang mga atleta ng kanilang poomsae performance video bilang kanilang entry sa nasabing kompetisyon. —sa panulat ni Angelica Doctolero
Nagpapalakas na ang Meralco Bolts para sa susunod na conference ng PBA matapos madagdag sa koponan si Shabazz Muhammad.
Si Muhammad ay isang beteranong manlalaro ng NBA, na nagkaroon ng Stints sa Minnesota Timberwolves at Milwaukee Bucks, at papalit sa papel ng resident import na si Allen Durham sa paglaban ng Bolts para sa breakthrough title.
Ani Meralco Coach Norman Black, kinikakitaan niya ang bagong reinforcement bilang mahusay na wingman, at malinaw rin umanong magaling itong rebounder sa laki at galing umatake ng basket base sa mga laro nito sa China.—sa panulat ni Joana Luna
Pansamantala munang hindi makakalaro ang Cleveland Cavaliers Power Forward na si Kevin Love matapos isailalim sa seven days quarantine isolation makaraang maexpose sa isang nagpositibo sa COVID-19.
Hindi naman nabanggit kung nagpositibo sa COVID-19 si Love na isang off bench player ng Cavs na may average na 9.9 points at 7.3 rebounds at may average career-low na 20.7 minutes sa kada game.
Sa kabila nito, sinabi ng NBA na ang mga fully vaccinated na manlalaro na naexpose sa mga nagpositibo sa COVID-19 ay hindi na nirerequire na sumailalim pa sa quarantine isolation sa halip ay isailalim na lamang sila sa COVID-19 seven days testing. —sa panulat ni Angelica Doctolero
Kasado na sa Disyembre 12 ang All-Filipino Bantamweight World Title bout sa pagitan ni WBC Champion Nonito Donaire Junior at Reymart Gaballo, sa Carson, California.
Magsisilbi itong title defense ni Donaire sa kanyang WBC Bantamweight Belt na kanyang inagaw kay Nordine Oubaali ng France via round 4 knockout, noong Mayo 29.
Masusubukan naman ang punching power ng undefeated challenger na si Gaballo sa main event ng tripleheader match na ipinag-utos ng World Boxing Council.
Hawak ni Gaballo ang record na 24 wins kabilang 20 knockouts habang mayroong 41 – 6 kabilang ang 27 knockouts ang “The Filipino Flash”. —sa panulat ni Drew Nacino