SPORTS

Mamimigay ng libreng game tickets ang Philippine Basketball Association (PBA) kung papayagan sila ng gobyerno na makapaglaro sa 2021 Governor’s Cup.

Ayon kay PBA Commissioner Willie Marcial, ilalapit nila ang nasabing plano sa Inter-Agency Task Force (IATF) upang matalakay rin kung ilan ang papayagang seating capacity para sa mga fans na manonood ng live.

Ani Marcial, naisip nila ang ganitong gimmick upang muling makasama ang PBA fans na halos dalawang taon nilang hindi nakasama dahil sa COVID-19 pandemic. —sa panulat ni Joana Luna

Aminado si reigning WBO Intercontinental Bantamweight Titlist Jonas Sultan na kung siya ang masusunod, mas gugustuhin niyang makasagupa ang isang foreign boxer kaysa kapwa Filipino.

Gayunman, nilinaw ni Sultan na wala siyang magagawa kung talagang nakatadhanang makalaban nito ang isang Pinoy Boxer.

Ayon kay Sultan, hindi naman na siya makaaatras kung pirmado na ang kontrata.

Pinupuntirya ng kampo ni Jonas ang isang blockbuster fight kontra kay WBA at IBF Bantamweight Titlist Naoya Inoue ng Japan.

Aminado si Sultan na si Inoue agad ang kanyang nasa isip ni matapos ang kanyang unanimous decision win kay dating undefeated puerto rican Carlos Caraballo sa bakbakan nila sa Madison Square Garden sa New York kamakailan. —sa panulat ni Drew Nacino

Pinag-iisipan na ngayon ni Ginebra Power Forward Japeth Aguilar kung tatanggapin niya ang offer mula sa tatlong team ng Japan kabilang na ang Japan B League.

Nabatid na sa mga naturang offer ay aabot sa dalawang milyon ang posibleng sahurin ni Aguilar sakaling ito ay kaniyang tanggapin.

Ayon kay Coach Tim Cone, nagpaalam na si Aguilar sa Ginebra management para sa kaniyang paglalaro sa ibang bansa pero malaki umano ang kanilang magiging problema kung iiwanan ni Aguilar ang kaniyang koponan.

Iginiit naman ni Cone na hindi niya pipigilan si Aguilar sa kaniyang future maging ang iba pa niyang mga manlalaro.

Dagdag pa ni Cone, kung siya umano ang masusunod ay mas magandang manatili si aguilar sa pba.

Sakaling umalis si Aguilar sa Ginebra team ay kailangan niyang kumuha ng 6″8 player na papalit sa kaniya sa Ginebra team.—sa panulat ni Angelica Doctolero

“Humbled” ang Milwaukee Bucks sa kanilang pagbisita sa White House bilang mga panauhin ng Presidente ng Estados Unidos.

Sinabi ni Bucks Center Brook Lopez na amazing at humbling na maging parte ng tradisyon, gayung sa higit limang taon. Bucks ang kauna-unahang NBA team na bumista kay US President Joe Biden.

Sinabi naman ni Donte Divicenzo na mula rin sa Delaware State kung saan nagmula si Biden. Na ang nangyaring pagtatagpo ngayong araw ay maaalala niya habang-buhay.

Nakipagpulong ang Bucks kay Biden para sa muling sisimulang tradisyon na nahinto sa pamumuno ni Donald Trump.—sa panulat ni Joana Luna

Irerekomenda na ng National Basketball Association (NBA) sa kanilang mga manlalaro, mga coaches at mga referees ang pagpapaturok ng booster shot laban sa COVID-19.

Ayon sa NBA Authority, dapat umanong makatanggap ng ikatlong bakuna ang mga sakop ng NBA lalo na sa mga naturukan ng single-dose Johnson & Johnson vaccine.

Sa pahayag ng NBA Public Health and Infectious Disease Experts, ang mga nakatanggap ng nasabing bakuna ng mahigit dalawang buwang nakalipas ay kailangang makapagpaturok ng booster shot.

Bukod pa dito, kailangan ding magpabooster shot ang mga nakatanggap ng Pfizer at Moderna vaccines anim na buwan matapos ang pagpapaturok.

Handa naman umano ang mga manlalaro, coaches at referees sa nabanggit na rekomendasyon sakaling maging available na ang booster shot.

Nabatid na humigit-kumulang 97% ng mga manlalaro ng NBA ang pinaniniwalaang nabakunahan nang magsimula ang season noong nakaraang buwan. —sa panulat ni Angelica Doctolero

Nagpasya na si Tokyo Olympic Gold Medalist Hidilyn Diaz na ipagpaliban ang paglahok sa World Weightlifting Championships sa Tashkent, Uzbekistan sa Disyembre 7 hanggang 17.

Aminado si Diaz na kapos ang kanyang limang linggong preparasyon.

Noong isang linggo lamang dumating ng Malacca, Malaysia ang Pinay Olympic Weightlifter para sa kanyang training.

Marami rin anyang weightlifter ang hindi lalahok sa naturang torneyo.

Sa ngayon prayoridad ni Diaz na tapusin ang kanyang thesis sa business administration degree sa College of St. Benilde. —sa panulat ni Drew Nacino

Sinikwat ng top seeded na si Novak Djokovic ng Serbia ang kanyang ika-anim na kampyonato sa Paris masters.

Niresbakan ni Djokovic ang tumalo sa kanya noon sa US Open final na si Daniil Medvedev ng Russia sa score na 4-6 6-3 6-3 sa kanilang paghaharap sa kagabi.

Naging dikdikan ang bakbakan ng dalawang superstar tennis player na kapwa nagpakita ng matinding depensa.

Samantala, ito na ang ika-pitong beses na naging world’s number 1 tennis player si Novak at binasag ang record ni Pete Sampras na anim na sunod na pagkakataong numero uno.–-mula sa panulat ni Drew Nacino

Gumawa ng kasaysayan si Mexican boxer Saul ‘Canelo’ Alvarez matapos patulugin si Caleb Plant sa ika-labing isang round ng kanilang laban sa MGM Grand Hotel sa Las Vegas.

Dahil dito, itinanghal si Alvarez bilang kauna-unahang undisputed world super middleweight champion matapos ma-unify o mapagsama-sama ang apat korona sa IBF, WBC, WBA at WBO.

Dalawang beses na pinagbasak ni Canelo si Plant sa 11th round at nang bumangon ay muli niya itong binakbakan ng kombinasyon kung kaya’t tuluyan itong bumagsak.

Nangibabaw ang Portland Trail Blazers sa kanilang laro sa NBA laban sa Los Angeles Lakers sa score na 105-90.

Tumipa ng 25 points si Damian Lillard para sa Blazers habang nagdagdag naman si Jusuf Nurkic ng 15 points.

Samantala, nakasungkit naman ang Phoenix Suns ng come from behind win laban sa Atlanta Hawks sa score na 121-117.

Ipinag-utos na ni PBA Commissioner Willie Marcial ang pagbabawal sa paglalaro ng mga import na hindi bakunado kontra Covid-19.

Kasabay ito ng ikinakasang Governors Cup sa Ynares Sports Arena, Pasig City, sa November 28.

Ayon kay Marcial, mahigpit na ipatutupad ang quarantine protocols para sa mga pasaherong mula sa “green” o “yellow” list countries sa kabila ng pagluluwag sa alert level 2 ng Metro Manila.

Sa format ng Governors Cup, magkakaroon ng single round eliminations, 8 team sa quarterfinals na may top four placers na bibigyan ng twice-to-beat advantage, best-of-five semis at best-of-seven finals.

Nilinaw naman ni Marcial na tentative pa ang schedule ng torneyo at kailangan pang aprubahan ng board of governors.  —sa panulat ni Drew Nacino