SPORTS

Nabigo si Filipina tennis sensation Alex Eala na makuha ang ikalawang WTA title matapos talunin ni World No. 102 Claire Liu ng United States sa final round ng Hong Kong Open.

Nagtapos ang laban sa score na 6-3 pabor kay Liu, kaya nagswak ang Pinay tennis star sa runner-up finish sa huling torneo niya para sa 2026 season.

Naging mahirap ang laban para kay Eala matapos magpa-medical timeout upang ipa-tape ang kaniyang kanang tuhod habang lamang si Liu sa unang set.

Tuluyan namang kinontrol ni Liu ang laban sa ikalawang set at tinapos ito sa pamamagitan ng tatlong sunod-sunod na aces.

Sa kabila ng pagkatalo, naging makasaysayan ang 2026 season ni Eala matapos makamit ang ilang career-high rankings, ang una niyang WTA 500 title sa Mubadala Citi DC Open at ikalawang WTA 125 title sa Birmingham Open.

Samantala, naging kauna-unahang Amerikana si Liu na nagwagi ng Hong Kong Open title. | Sa panulat ni Jordan Gutierrez

Nagtapos na ang kampanya ni Filipina tennis sweetheart Alex Eala sa Toray Pan Pacific Open matapos talunin ni world number 13 Diana Shnaider sa quarterfinals.

Nakatanggap ng medical timeout si Eala sa deciding set, sa score na 2-3, matapos mabanat ang kanyang kanang binti habang sinusubukang saluhin ang isang tira ng kalaban.

Binigyan ng agarang medical attention ang world number 19 player bago nagpatuloy ang laban, ngunit nabigo siyang makabawi.

Dahil dito, umabante na si Shnaider sa semifinals, habang nabigo naman si Eala na makabawi sa Russian player matapos ang kanilang laban sa round of 16 ng Ningbo Open noong nakaraang linggo. | Sa panulat ni Reianne Antiquina

Nakuha ni double Olympic champion Carlos Yulo ang ikapitong puwesto sa vault final ng World Gymnastics Championships sa Netherlands.

Nakapagtala si Yulo ng average score na 13.883, mula sa 13.333 sa una niyang vault at 14.433 sa ikalawa.

Nasungkit ni Artur Davtyan ng Armenia ang gintong medalya sa score na 14.850, habang si Filipino-British gymnast Jake Jarman ang nag-uwi ng silver sa score na 14.650.

Nasikwat naman ni Sebastian Sponevik ng Norway ang bronze medal sa score na 14.366.

Nitong Sabado, October 24, nauna nang nakuha ni Carlos Yulo ang ikawalong puwesto sa floor exercise final sa kaparehong torneo. | Sa panulat ni Jordan Gutierrez

Hindi nakasungkit ng medalya ang two-time Olympic gold medalist na si Carlos Yulo sa men’s individual floor exercise final ng 54th FIG Artistic Gymnastics World Championships sa Rotterdam, Netherlands, nitong Sabado, Oktubre 24.

Pumuwesto si Yulo sa ikahuling puwesto sa walong finalists matapos makakuha ng 13.233 puntos. Binubuo ito ng 5.800 difficulty score, 7.633 execution score, at 0.10 bonus, ngunit nabawasan ng 0.30 puntos dahil sa penalty.

Pangalawang pinakamataas na qualifier si Yulo sa final matapos makapagtala ng 14.500 puntos, kasunod ni Arseniy Dukhno na nanguna sa qualifying round sa 14.700 puntos.

Nasungkit naman ng American gymnast na si Frederick Richard ang kaniyang unang world gold medal. Silver medalist si Fil-British gymnast Jake Jarman, habang bronze naman ang Israeli gymnast na si Artem Dolgopyat.

Target ni Yulo na makabawi sa men’s vault final ngayong araw ng Linggo.

Sinita ni Filipina tennis sensation Alex Eala ang isang fan matapos nitong ihagis ang isang puting cap sa kaniyang direksyon habang palabas siya ng court matapos ang kaniyang laban sa 2026 Asian Games sa Nagoya, Japan.

Sa isang video na kumakalat sa social media, makikitang naglalakad palabas ng court si Eala nang biglang ihagis ng isang lalaki ang cap, na nais papirmahan sa atleta.

Agad na huminto si Eala at pinulot ang cap bago pinagsabihan ang fan na hindi dapat naghahagis ng mga gamit sa mga manlalaro.

Aniya, maaari namang maayos na humingi ng autograph kung nais ng fan na magpapirma.

“Sir, hindi ka dapat nagtatapon ng mga gamit sa player. You say it nice and I will sign for you pero huwag kang magtatapon please?,” saad ni Eala.

Sa kabila ng insidente, pinirmahan pa rin ni Eala ang cap at ibinalik ito sa fan.

Nagkamit ng bronze medal si Karl Eldrew Yulo sa Men’s Horizontal Bar Final ng 2026 Asian Games sa Japan ngayong Biyernes, September 25.

Nagtala si Eldrew ng iskor na 13.666, mula sa 5.0 sa difficulty, 8.566 sa execution, at may dagdag na 0.1 bonus point, para makuha ang ikatlong puwesto.

Ito ang kauna-unahang Asian Games medal ni Eldrew, na muling nagpakita ng kaniyang galing sa international competition.

Samantala, mas maaga ring nakasungkit ng gintong medalya ang kaniyang kuya na si Carlos Yulo matapos magwagi sa Men’s Vault Final, kung saan ito na ang ikalawang gold medal ng Pilipinas sa Asian Games. | Sa panulat ni Reabelle Medina

Nagtapos sa ikaanim na puwesto ang Team Philippines sa men’s artistic gymnastics team final ng Aichi-Nagoya 2026 Asian Games matapos makapagtala ng kabuuang 227.359 sa Rainbow Hall ng Nagoya General Gymnasium nitong Miyerkules, Setyembre 23.

Hindi nakakuha ng medalya ang koponan na pinangunahan ng magkapatid na Carlos at Eldrew Yulo matapos ang anim na rotations. Nanguna ang China na may 255.095, sinundan ng host country na Japan na nagtala ng 254.026 at Chinese Taipei na may 239.896.

Kasama ng Yulo brothers sa koponan sina Justin Ace de Leon, Zachary Nuñez at Miguel Besana.

Si Carlos ang nanguna sa individual performance ng Team PH. Nakuha niya ang pinakamataas na marka sa floor exercise matapos magtala ng 14.266 mula sa 5.7 difficulty score. Nasa ikaapat naman siya sa vault sa 14.566, mula sa 5.2 difficulty.

Nagkaroon din si Carlos ng 14.166 sa parallel bars para sa tumabla sa ikalimang puwesto at 13.333 sa rings para sa ika-siyam na ranggo.

Samantala, nagtapos si Eldrew sa ika-siyam na puwesto sa horizontal bar matapos makakuha ng 13.166.

Bagama’t hindi umabot sa podium ang Pilipinas sa team event, may mga individual event pa ring haharapin ang magkapatid na Yulo sa pagpapatuloy ng Asian Games gymnastics competition.

Nakuha ng Philippine women’s soft tennis team ang bronze medal sa 2026 Asian Games.

Ito’y matapos silang talunin ng host nation na Japan sa semifinals sina Bien Zoleta at Princess Catindig sa doubles category, at si Christy Sanosa sa singles.

Gayunman, itinuturing pa rin ni Zoleta ang podium finish bilang makasaysayan para sa soft tennis sa Pilipinas dahil ito ang kauna-unahang panalo ng bansa sa naturang sport matapos itong gawing medal event sa Asian Games noong 1994.

Ito rin ang unang medalyang iuuwi ng Team Pilipinas sa nagpapatuloy na palaro.

Samantala, assured podium finish din ang nakamit nina Jean Claude Saclag at Carlos Alvarez matapos pareho silang makalusot sa semifinals ng men’s traditional mixed martial arts ng kani-kanilang mga dibisyon. | Sa panulat ni Anjo Riñon

Na-disqualify sa finals ng 4×100-meter freestyle relay ng 2026 Asian Games ang Philippine women’s swimming team na kinabibilangan nina Kayla Sanchez, Heather White, Xiandi Chua at Teia Salvino nitong Linggo, Setyembre 20 sa Tokyo Aquatics Center.

Malakas ang naging simula ng Pilipinas matapos ang unang leg ni Sanchez, habang naiangat naman ni White sa ikatlong puwesto ang koponan.

Gayunman, na-disqualify ang Pilipinas sa leg ni Salvino matapos umano siya umalis sa starting platform bago tuluyang mahawakan ni Chua ang wall.

Ayon kay Philippine Aquatics Secretary General Eric Buhain, nagkaroon ng “too early take off” dahil may pagitan sa touch ni Chua at pag-alis ng paa ni Salvino sa platform.

Dumating sa bansa kagabi, Setyembre 13 sina Elias at Ifeoma Adili, mga magulang ng yumaong Ateneo student-athlete na si Divine Adili.

Paglapag sa Ninoy Aquino International Airport (NAIA) Terminal 3, sinalubong sila ng mga kinatawan ng Ateneo de Manila University (AdMU).

Ayon sa pahayag na inilabas ng AdMU, makakasama ng mga magulang ni Divine ang Ateneo Men’s Basketball Team at dadalo ang mag-asawa sa unang dalawang laro ng Blue Eagles sa University Athletic Association of the Philippines (UAAP) Season 89.

Ang UAAP campaign ng Blue Eagles ngayong season ay iniaalay ng Ateneo sa alaala nina Divine Adili at Rene Clert Baterbonia.