RONDA PROBINSYA

Nakakulong na sa Mabolo Police Station ang 2 Korean National matapos umanong pagnakawan ang isang negosyante sa loob mismo ng kanyang bahay sa Brgy. Banilad, Cebu City

Kinilala ang mga naaresto na sina Yong Hee Kim, 45- anyos, at Jun Hee Kim, 49 –  anyos.

Ang kanilang kasabwat na si Sun Young Choi ay napatay ng mga pulis matapos silang paputukan ng grupo at tumangging sumuko.

Sugatan din ang isang pulis sa pamamaril at nagpapagaling na sa ospital.

Nahaharap ang mga foreigner sa kasong Robbery at Frustrated Homicide

Dead on the spot ang isang babaeng senior citizen nang magulungan ng fuel truck sa Rosario, Cavite.

Sa kuha ng CCTV sa nasabing lugar, tumawid ang ginang sa kalsada habang nakahinto ang truck.

Ilang segundo lang bigla na lang umandar ang truck at nasagi ang matanda na ikinatumba ng huli sa hindi inaasahang pangyayari puma-ilalim ang babae sa truck.

 Ayon sa awtoridad, biglang dumaan ang senior citizen samantalang dahan-dahang umaandar ang truck.

Sinabi ng truck driver sa mga pulis na masyadong mataas ang truck kaya hindi niya napansing tumatawid ang biktima.

Mahaharap ang driver ng truck sa reklamong reckless imprudence resulting in homicide.

Dead on arrival ang 2 katao matapos masangkot sa aksidente sa kalsada Pamplona, Cagayan

Kinilala ang mga biktima na sina Patrolman Mario Martinez,      28 – anyos, na nakatalaga sa Regional Mobile Force Batallion 2, at kapatid nito na si Mark Anthony Martinez, 30 –  anyos

Batay sa inisyal na imbestigasyon ng awtoridad, nawalan umano ng kontrol sa pagmamaneho ang pulis nang iayos ang isinakay na mga lulutuin sa unahan ng kanyang motorsiklo.

Sa bilis ng pangyayari, hindi namalayan na bahagyang napunta ang motorsiklo sa kabilang linya ng kalsada

Na naging dahilan para masalpok ng paparating na forward truck na minamaneho ng isang Rodolfo mamuad 54- anyos.

Boluntaryo namang sumuko sa mga awtoridad ang driver ng trak.

Binawian ng buhay ang isang lalaki matapos saksakin sa Brgy. Bagumbayan, Lal-Lo, Cagayan.

Kinilala ang biktimang si Ramil Pacion.

Batay sa imbestigasyon, dumalo si Pacion at ang suspek na si Jaylord Ordillo, 23 anyos, sa isang lamay nang magkaroon ng alitan ang dalawa.

Dito na dumukot ng kutsilyo ang suspek at sinaksak ang biktima sa dibdib.

Nagtangka pa ang dalawang magkapatid na lalaki na awatin ang suspek, ngunit pati sila ay sinaksak din.

Agad na isinugod ang mga biktima sa ospital, kung saan idineklarang patay si Pacion.

Desidido ang pamilya ng mga biktima na magsampa ng mga kaukulang kaso laban sa nadakip na suspek.

Makatatanggap ng tulong mula sa lokal na pamahalaan ng Zamboanga ang mga magsasaka at mangingisdang apektado ng El Niño phenomenon.

Ito ang resolusyong ipinasa sa ginanap na pagpupulong ng Task Force El Niño kamakailan.

Matatandaang noong unang linggo ng Marso, nagdeklara ang Zamboanga ng state of calamity dahil sa nararanasang matinding tagtuyot.

Ayon kay City Disaster Risk Reduction Management Officer Elmer Apolinario, isinasaalang-alang ng lokal na pamahalaan ang pagsasagawa ng cloud seeding upang madagdagan ang suplay ng tubig.

Patuloy rin ang pagpapatupad ng water rationing scheme ng Zamboanga City Water District (ZCWD).

Tinatayang aabot sa P27 million ang naitalang pinsala ng El Niño sa agri-fishery sector.

Sugatan ang motorcycle rider at angkas nito nang sumalpok sila sa papalikong kotse sa Calasiao, Pangasinan.

Sa kuha ng CCTV sa lugar, hindi na nakapagpreno ang motorsiklo at natumbok ang papalikong sasakyan.

Sa lakas ng pagkakabangga, tumilapon at sumadsad sa ibabaw ng kotse ang isa sa mga sakay ng motorsiklo.

Sugatan pero ligtas naman ang dalawang sakay ng motorsiklo.

Ayon sa awtoridad, hindi na nauwi sa kasuhan ang insedente matapos magkaroon ng pag-uusap at nagkaaregluhan ang magkabilang panig.

Patay ang isang tricycle driver matapos pagsasaksakin ng kapwa tsuper sa Sampaloc, Manila.

Kinilala ang biktimang si Cansino Carlito, 54 – anyos na residente ng naturang lugar.

Batay sa imbestigasyon, matagal ng may alitan ang dalawa tungkol sa agawan umano ng pasahero sa terminal hanggang sa kalaunan ay nauwi ito sa pananaksak.

Mabilis na dinala sa paospital ang biktima ngunit idineklara itong dead on arrival ng mga sumuring doktor

Samantalang naka-detain na sa Sampaloc Police Station ang suspek na kinilalang si Alejandro Queqquegan na nahaharap sa kasong homicide.- sa panunulat ni Aira Ortega

Binawian ang buhay ang isang ginang habang nasugatan ang anak nito matapos pagsasaksakin ng lasing na kapitbahay sa San Andres, Quezon

Kinilala ang nasawing biktima na si Leonor Beñegas habang nilalapatan ng lunas dahil sa tinamong mga saksak sa katawan ang anak nitong si Rosalie

Base sa imbestigasyon ng awtoridad, nasa loob ng kanilang bahay ang mag-ina nang pumasok ang lasing na suspek na armado ng gulok at walang sabi-sabing pinagsasaksak si Leonor.

Nang makita ni Rosalie ang ginawa ng suspek sa kanyang ina ay sinubukan nitong tumulong subalit maging siya ay inundayan ng sunud-sunod na saksak at mabilis na tumakas.

Tinutugis na at nahaharap sa reklamong murder at frustrated murder ang suspek na nakilala lamang sa alyas na Garry

Bumulaga sa mga pulis ang dalawang bangkay na magkahiwalay na nakasilid sa dalawang drum na nakita sa ilog ng labo, Camarines Norte.

Ayon sa awtoridad, nakatanggap sila ng tawag mula sa mga residente na nangingisda sa ilog hinggil sa dalawang drum na natagpuan

Nang suriin ang drum, bumulaga ang ulo ng isa sa mga biktima at nakasemento ang katawan ng mga ito sa loob ng mga drum.

Patuloy ang imbestigasyon ng mga awtoridad para matukoy ang pagkakakilanlan ng mga biktima at mga nasa likod ng krimen.

Patay ang isang tindero matapos itong malunod sa dagat sa Brgy. Calao-an, Candon, Ilocos Sur.

Kinilala ang biktimang si Domell Peñaloza, 21 anyos.

Batay sa ulat, lasing ang biktima nang mapagdesisyunan nitong lumangoy kasama ang kanyang mga kaibigan.

Tinangay ito ng malakas na alon, at maya-maya, nakita na lang na palutang-lutang ang katawan nito sa dagat.

Binigyan pa ang biktima ng CPR bago isinugod sa ospital kung saan ito idineklarang patay.