RONDA PROBINSYA

Nagpositibo sa COVID-19 ang pitong bata sa Virac Town sa Catanduanes matapos paglaruan ang medical waste na itinapon sa bisinidad ng kanilang barangay.

Ayon sa mga otoridad, naglalaro sa 3 hanggang 11 ang edad ng mga bata na pinaglaruan ang mga syringes na itinapon sa baybayin ng barangay Concepcion.

Ang isa namang babae na sumaway sa mga bata ay nagpositibo rin sa COVID-19.

Agad na isinailalim sa isolation ang mga bata at nakatakdang isailalim sa RT-PCR testing sa Lunes.

Inako naman ng isang laboratoryo ang nangyari ang humingi na paumanhin sa council ng barangay. —sa panulat ni Abby Malanday

Sugatan ang apat na kataong sakay ng 12-wheeler truck matapos mahulog ang kanilang sinasakyan sa ilog na may lalim na 80 feet sa Majayjay sa Laguna.

Ayon kay Laguna Provincial Police Office Director Police Colonel Rogart Campo, galing sa Bacolor sa Pampanga ang truck na may lamang buhangin.

Dadalhin sana ang buhangin sa town proper, pero dahil sa lagpas sa 5 tons ang bigat ay hindi na nakayanan ng dinaanan nitong tulay na bakal na 5 tons lamang ang capacity.

Maaaring sampahan ng kasong Reckless Imprudence Resulting to Damage to Property ang driver dahil dumaan ito sa tulay kahit sobrang bigat ng dala.

Patuloy namang ginagamot sa ospital ang mga nasugatan na nakapagtala ng minor injuries.

Pinayuhan ang mga dumadaan sa tulay na gamitin ang alternatibong ruta sa bayan ng Liliw. —sa panulat ni Abby Malanday

Nabuking ang itinatago umanong droga ng isang lalaki matapos itong sitahin dahil sa hindi pagsusuot ng face mask sa lungsod ng Aguirre Road, Pilar Village, Brgy. Pilar, Las Piñas City.

Kinilala ang suspek na si Joden Jordan, 26 taong gulang, nakatira sa nasabing lungsod.

Nabatid na nasita si Jordan ng mga pulis habang nagsasagawa ng Oplan Galugad dahil wala itong suot na face mask.

Dito na nakumpiska ang mahigit anim na libong pisong halaga ng umano’y shabu mula kay Jordan na ngayo’y nahaharap sa kaukulang reklamo.

Naaresto na ng mga awtoridad ang top 19 most wanted person ng Parañaque City Police.

Kinilala ang akusado na si Christopher Boyles, 47 taong gulang, at nakatira sa nasabing lungsod.

Si Boyles na may kasong three counts ng child abuse cases at three counts ng paglabag sa Anti-Photo & Video Voyeurism Act sa isang korte sa Parañaque.

Mahigit anim na raang libong piso (666,000 pesos) ang itinakdang piyansa para sa pansamantalang paglaya ng akusado.

Hindi umubra ang tikas at yabang ng isang mekaniko nang maglabas ito ng baril sa pampublikong lugar matapos arestuhin ng mga awtoridad sa Purok 4, Barangay Putatan, Muntinlupa City.

Kinilala ang suspek na si Jeffrey Sison, 41 taong gulang, at residente ng nasabing lungsod.

Nabatid na nagsasagawa ng anti-carnapping operation ang mga pulis sa lugar nang bigla umanong maglabas ng improvised firearm o pen gun na naglalaman ng dalawang bala ng kalibre .38 baril.

Ayon kay Southern Police District (SPD) Director PBGen Jimili Macaraeg, sasampahan ang suspek ng reklamong paglabag sa omnibus election code (Comelec) gun ban at illegal possession of improvised firearms & ammunition.

Laglag sa kamay ng mga awtoridad ang anim na indibidwal sa magkahiwalay na anti-drug operations sa Pateros at Pasay.

Sa E. Quiogue Street, Brgy. Aguho, Pateros, nadakip sa buy-bust operation sina Myko Bayanin, Mykel Bayanin, at Rowena Villace kung saan nasabat mula sa kanila ang tatlong daang pisong buy-bust money at 6,800 pesos na halaga ng hinihinalang shabu.

Sa Lim-an St., Brgy. 4, sa Pasay, timbog naman sina Geronimo Jacobe, Glenn Barba, at Jose Labadia kung saan nakumpiska sa operasyon ang dalawang daang pisong buy-bust money at halos 22,000 pesos na halaga ng umano’y shabu.

Nakakulong na ngayon ang mga suspek at nakatakdang sampahan ng kaukulang reklamo.

Nagwakas naman ang maliligayang araw ng isang lalaking wanted sa kasong rape at pangmomolestiya matapos madakip ng mga awtoridad sa C5 Road, Western Bicutan, Taguig City.

Kinilala ang naaresto na si Rolando Fuselero Jr., alyas Kuyakol, 21 taong gulang, nakatira sa nasabing lugar.

Nahuli si Fuselero sa bisa ng warrant of arrest na inilabas ng Taguig RTC dahil sa kasong rape at acts of lasciviousness.

Walang inirekomendang piyansa ang korte laban sa akusado.

Timbog ang dalawang lalaki na matagal nang tinutugis ng batas sa magkahiwalay na operasyon ng mga elemento ng Southern Police District (SPD).

Ayon kay SPD Director PBGen Jimili Macaraeg, unang naaresto sa Barangay Ipil 1, Silang, Cavite si Joemar Parado na may kasong homicide sa isang korte sa Muntinlupa City kung saan aabot sa 40,000 pesos ang itinakdang piyansa laban sa akusado.

Sa BF Homes, Parañaque, nasakote naman ang top 3 most wanted person na si Robert Damasco na may kasong attempted murder sa isang korte sa Allacapan, Cagayan.

Aabot naman sa 120,000 pesos ang inirekomendang piyansa ng korte para sa pansamantalang paglaya ng akusado.

Naghihimas ngayong ng malamig na rehas na bakal ang dalawang indidbiwal dahil sa iba’t ibang paglabag kasunod ng ikinasang operasyon ng mga elemento ng Southern Police District (SPD).

Sa Brgy. San Antonio, Parañaque, arestado ang drug suspect na si Mendy Logmao matapos mahulihan ng halos dalawang daang libong pisong halaga ng umano’y shabu.

Sa Brgy. 94, Pasay City, timbog ang graphic artist na si Marcelo Cabansag dahil sa umano’y pamemeke ng COVID-19 vaccination cards na ibinebenta naman sa mga hindi bakunadong indibidwal.

Sasampahan ng kaukulang reklamo ang mga naturang suspek.

Timbog ang isang kilabot umanong tulak ng droga sa ikinasang Oplan Galugad ng mga pulis sa Admiral Road, Brgy. Talon Tres, Las Piñas City.

Kinilala ang suspek na si Freddie Caballero, 38 taong gulang, at nakatira sa nasabing lungsod.

Nabatid na sinita ng mga pulis si Caballero dahil wala itong suot na face mask pero dito na nakuhanan ng umano’y ipinagbabawal na droga na nagkakahalaga ng halos pitong libong piso.

Sasampahan ang suspek ng reklamong paglabag sa comprehensive dangerous drugs act.