RONDA PROBINSYA

Patay ang isa habang sugatan naman ang isa pa matapos sumalpok ang isang motorsiklo sa isang concrete barrier sa Brgy. Boalan, Zamboanga City.

Sa imbestigasyon ng Sta. Maria Police Station 7, nawasak muna ang harapang bahagi ng motorsiklong minamaneho ng rider na si Jimboy Ropejeno, 19-anyos bago bumaliktad.

Sinubukan pang dalhin ng rescue team sa ospital ang biktima pero idineklara itong dead-on-arrival dahil sa natamong matinding pinsala sa katawan.

Samantala, sugatan naman ang kasamahan nito na kinilala namang si Guen Delos Santos.

Nagpaalala naman ang mga otoridad na doblehin ang pag-iingat, ugaliing i-check ang sasakyang gagamitin bago ibyahe at huwag magmaneho kung nakainom upang maiwasan ang anumang sakuna.—sa panulat ni Angelica Doctolero

Kalaboso ang dalawang tulak ng droga sa bayan ng Tiaong, Quezon.

Kinilala ang mga suspek na sina Jonathan Cunanan, 45 anyos at Rhovic Lopez, 20 anyos.

Ayon kay Quezon Provincial Police Director, Col. Joel Villanueva, nagbenta umano sina Cunanan at Lopez ng dalawang pack ng droga sa isang undercover police.

Nasabat ng mga otoridad ang tatlong sachet ng shabu na nagkakahalaga ng 80,000 pesos at isang patalim.

Nahaharap sa kasong paglabag sa Comprehensive Dangerous Drug Act 2002 ang dalawa.  —sa panulat ni Mara Valle

Patay ang isang miyembro ng LGBTQ Community matapos pagsasaksakin ng dalawang menor de edad sa Zamboanga City.

Kinilala ng Zamboanga City Police ang biktima na si Arnel Fabian.

Ayon sa pulisya, nagtamo ng sampung saksak si Fabian matapos siyang pasukin ng mga suspek sa kanyang kuwarto sa Zampen Urban Poor Community.

Tumakas naman ang mga binatilyo tangay ang bagong biling motorsiklo ng biktima.

Sa tulong ng social media, nadakip ang mga salarin na kapwa 17 anyos habang narekober sa kanila ang motorsiklo ni Fabian na itinago sa isang bodega sa Tundo, Maynila.

Kahit menor de edad ay sasampahan ng kasong Robbery with Homicide ang dalawang suspek. —sa panulat ni Mara Valle

Arestado ang isang negosyante sa isinagawang buy-bust operation sa Valenzuela City.

Kinilala ng Valenzuela City Police ang suspek na si Michael Alejandrino, 43 anyos.

Nasabat mula kay Alejandrino ang nasa kalahating kilo ng marijuana na nagkakahalaga ng 60,000 pesos, isang sachet ng shabu, marked money, caliber 45 at 40 pistol na kapwa may magazine at tig-anim na bala, bag at iba’t ibang ID.

Nahaharap naman ang suspek sa kasong paglabag sa Comprehensive Dangerous Drug Act of 2002 at Comprehensive Law on Firearms and Ammunation in Relation to COMELEC Resolution 10728. —sa panulat ni Mara Valle

Isang bangkay ng sanggol ang nakitang inaanod sa Kabulig River sa bayan ng Jasaan, Misamis Oriental.

Ayon sa saksing si Inday Dela Peña, pamangkin niya ang unang nakakita sa walang saplot na bangkay ng sanggol kaya agad silang tumawag ng mga rescuer at pulis.

Narekober naman ng Jasaan Municipal Police ang bata mula sa ilog na kalaunan ay napag-alamang babae.

Dinala na ang labi ng sanggol sa isang simbahan upang para ma-bendisyonan at agad inilibing.

Samantala, patuloy na iniimbestigahan ng mga otoridad kung disgrasya, may kapabayaan o sinadyang ihulog sa ilog ang sanggol habang tinutunon na ang pagkakilanlan ng mga magulang o kamag-anak nito. —sa panulat ni Mara Valle

Inireklamo ng mga residente sa paligid ng Quezon Medical Center sa Lucena City ang ga-bundok na hazardous medical waste.

Ayon sa pamunuan ng ospital, hindi na kinaya ng kanilang storage facility ang dami ng mga basura kaya’t umapaw na ito at sa tagal na walang humahakot ay kumakatas at nagdudulot na ng mabahong amoy, lalo na kapag umuulan.

Doble umano ang volume ng hazardous waste na naiipon ng ospital kumpara sa kakayahan ng kanilang integrated sterilizer at shredder machine na nasa 200 kilos kada araw lamang ang kayang iproseso.

Samantala, tiniyak naman ng Quezon Medical Center na gumagawa na sila ng paraan upang alisin ang mga basura at inaasahang magsisimula na muling maghakot ngayong linggong ang kanilang contractor. —sa panulat ni Mara Valle

Apat na suspek sa pagpapakalat ng mga pekeng pera ang naaresto ng National Bureau of Investigation-Special Action Unit sa Angeles City, Pampanga.

Kinilala ni NBI Officer-In-Charge, Director Eric Distor ang mga suspek na si Joeylyn Castro, Virgilio Yalung, Zenia Andres at Marilyn Lucero.

Nakipag-ugnayan anya ang NBI sa Payments and Currency Investigation Group, Office of the Assistant Governor, Payments and Currency Development Sub-Sector, Bangko Sentral ng Pilipinas (BSP) at sa lokal na otoridad.

Nagtungo sa isang money changer sina Yalung at Castro pero hindi pinalitan ang dala nilang dolyar dahil peke at sa pagkakataong ito ay nilapitan na sila ng mga otoridad at inaresto.

Nakumpiska mula sa kanila ang 78 piraso ng pekeng US dollar bill na may iba’t-ibang serial numbers.

Matapos ituro nina Castro at Yalung ang pinanggagalingan ng mga pekeng dolyar ay agad nagsagawa ng follow up operation ang NBI hanggang sa matimbog sina Andres at Lucero sa Bamban, Tarlac.

Nahaharap ang mga suspek sa kasong Illegal Possession at Use of False Treasury o Bank Notes.

Isang lalaki ang pinugutan at natagpuang nakahandusay sa gitna ng kalsada sa Barangay Tibag, Tarlac City.

Kinilala ang biktimang si Vivencio Colipano, 45 anyos at suspek na si Rommel Apolinario, 42 anyos na may problema umano sa pag-iisip.

Ayon sa Tarlac City Police, nagkaroon ng alitan sa pagitan ng dalawa na nauwi sa batuhan hanggang sa biglang kumuha ng tabak ang suspek at pinugutan ang biktima.

Binitbit pa ni Apolinario ang pugot na ulo ng biktima at iniwan sa gitna ng kalsada.

Agad binaril sa hita si Apolinario ng rumespondeng pulis na tinangka rin niyang tagain.

Isinugod naman ang suspek sa Tarlac Provincial Hospital at mahaharap sa kasong murder.

Natagpuang wala nang buhay sa isang ilog ang isang sanggol sa bayan ng Jasaan, sa Misamis Oriental.

Ayon sa nakakita, palutang lutang sa tubig ang sanggol kaya agad silang humingi ng tulong sa mga rescuer at mga pulis.

Wala umanong saplot ang biktimang sanggol kung saan, nakapulupot pa ang umbilical cord nito.

Iniimbestigahan na ng Jasaan Municipal Police kung may kapabayaan o sinadya ang nangyari sa sanggol.

Patuloy pang inaalam ng mga otoridad kung sino ang mga magulang o kamag-anak ng sanggol.  —sa panulat ni Angelica Doctolero

Patay ang isang pulis habang pinaniniwalaang dinukot ng mga armadong lalaki ang tatlo pang pulis sa bayan ng San Miguel sa Catanduanes.

Base sa impormasyon, nagkasa ng imbestigasyon ang mga biktimang pulis para maglabas ng warrant of arrest sa Baranggay J.M Alberto Sitio Tucao nang makasagupa nila ang mga armadong kalalakihan.

Dito na umano binaril ang isang pulis habang isinakay naman sa motorsiklo ang tatlo pang pulis.

Ayon sa Bicol PNP, wala pang kabuuang detalye sa pangyayare pero patuloy pa nilang iniimbestigahan ang naganap na insidente kung saan, hinihinalang mga miyembro ng New People’s Army (NPA) ang salarin sa krimen.  —sa panulat ni Angelica Doctolero