RONDA PROBINSYA

Patay ang walong miyembro ng Islamic State of Iraq and Syria (ISIS) sa naganap na engkwentro ng mga rebelde at mga sundalo sa bayan ng Maguing, Lanao del Sur.

Isang sundalo ang namatay habang limang iba pa ang nasugatan matapos atakihin ng mga militar ang kampo ng ISIS na malapit din sa kampo ng Moro Islamic Liberation Front (MILF).

Narekober ng mga otoridad ang 40 matataas na kalibre ng baril, mga pampasabog, pitong kilo ng shabu at isang kilo ng marijuana makalipas ang engkwentro.

Samantala, hindi pa malinaw kung kabilang sa mga napatay sa bakbakan ang pinuno ng rehiyon ng ISIS na si Abu Zacharia. – sa panulat ni Mara Valle

Inaresto ang dalawang most wanted persons sa magkahiwalay na operasyon ng mga tauhan Ng Leyte Police Station sa Barangay Ponong Carigara, Leyte.

Kinilala ang mga suspek na sina Joel Dela Lauron Cerna, 66 years old na top 7 most wanted person-provincial level list at Ernie Pacala Dotillos, 29 years old na top 10 naman sa listahan ng mga otoridad.

Nahuli si Cerna sa pamamagitan ng warrant of arrest na inisyu ng Carigara, Leyte Regional Trial Court’ (RTC) Presiding Judges Hon. Emelinda Maquilan at Hon. Lauro Andres Castillo dahil sa paglabag sa section 5B ng Republic Act 7610 na nahaharap sa kasong rape at walang inirekomendang piyansa.

Nahuli naman si Dotillos sa Barangay Mazawalo, Palompon, Leyte sa bisa ng warrant of arrest na inisyu ni Palompon, Leyte RTC Presiding Acting Judge Hon. Dexter Aguilar para sa krimen ng statutory rape na walang ring inirekomendang piyansa. – sa panulat ni Angelica Doctolero

Sa ika-4 na araw ng Fire Prevention Month, 16 na bahay ang natupok sa isla ng Boracay, sa Malay, Aklan.

Ayon sa Malay Municipal Disaster Risk Reduction Management Office, naganap ang sunog sa Zone 1, Sitio Bantud, Barangay Manoc-Manoc.

Inihayag naman ni Mayor Frolibar Bautista na 16 sa mga bahay ang totally damaged, habang isa ang bahagyang napinsala.

Ilan anya sa mga bahay ay inuupahan ng mga manggagawa sa sektor ng turismo.

Napag-alaman ng Bureau of Fire Protection (BFP) na nagsimula ang apoy sa kusina ng isa sa mga bahay.

Inaalam na rin ang halaga ng mga natupok o napinsalang ari-arian.

Natagpuan ang bangkay ng magkapatid na pinagbabaril sa isang sapa sa bayan ng Vintar, Ilocos Norte.

Batay sa imbestigasyon, nagtungo umano ang mga biktima sa naturang sapa para ayusin ang water pump.

Ayon sa hepe ng Vintar Police na si Police Major Reginaldo Dalipias, may dalawang testigo sa pamamaril kaya agad na nakilala ang suspek na kapit-bahay umano ng mga biktima na dating nakulong ng 30 taon sa kasong arson, robbery at robbery with homicide.

Usaping right-of-way ang motibo ng suspek ayon sa mga otoridad dahil matagal ng may alitan ang mga ito sa bahay ng mga biktima na nasa tabi ng kalsada at ang bahay ng suspek na nasa likod, ang dating dinadaanan na bahagi ng lupa ng biktima ay ipinagbawal kung saan wala nang daanan ang suspek papuntang kalsada.

Samantala, sinampahan na ng mga otoridad ang suspek ng 2 counts of murder. —sa panulat ni Airiam Sancho

Nasawi ang isang tres-anyos na lalaki matapos masagasaan ng isang truck sa Cebu South Coastal Road ng Talisay City.

Batay sa Talisay Traffic Operation and Development Authority, nakasakay sa motorsiklo ang bata habang karga ito ng kaniyang ina na si Roanne Balansag.

Hindi nakita ng truck nang tumigil sa stop light na nasa gilid nito ang motorsiklo na minamaneho ni Rebecca Alcontin.

Nang umandar ang truck ay bumangga ang motorsiklo dito kung saan nabitawan ng ina ang bata kaya ito nasagasaan.

Sugatan ang ina ng bata at drayber ng motor habang nahaharap sa kasong reckless imprudence resulting in homicide ang drayber ng truck. —sa panulat ni Airiam Sancho

Sumiklab ang sunog sa isang residential area sa barangay Habay II, Bacoor City, Cavite, nitong Huwebes alas-3:30 ng hapon.

Ayon sa Bacoor Bureau of Fire Protection, umabot sa ikalawang alarma ang sunog at naapula bandang alas-4:56 ng hapon.

Inilikas naman sa Basketball ourt ang mga naapektuhang pamilya na nasa 30 hanggang 33.

Patuloy namang iniiimbestigahan ng BFP ang dahilan ng sunog. – Sa panulat ni Airiam Sancho

Nasunog ang isang sasakyang pandagat habang may sakay na pasahero sa Bulan, Sorsogon.

Ayon sa Philippine Coast Guard (PCG) sub-station Bulan, nagsasagawa ng pre-departure inspection ang Coast Guard Personnel sa MB Sun Riser 9 nang mapagatanto na nasususnog ang mv cooperative sjm-7.

Ang nasabing sasakyang pandagat ay pag-aari at inooperate ng San Jacinto Small Scale Sea Trans Cooperative ay sakay ang walong crew members nang mangyari ang insidente.

Samantala, ligtas naman ang lahat ng mga tripulante at agad ring naapula ng Bureau of Fire Protection ang apoy sa nasunog na barko.  – sa panulat ni Mara Valle 

Himalang nakaligtas ang Municipal Administrator ng Marilao, Bulacan makaraang tambangan at pagbabarilin ng dalawang lalaki na sakay ng isang motorsiklo.

Kinilala ang biktima na si Wilfredo Dela Cruz, 54 anyos.

Ayon sa Marilao Police, papasok na sa trabaho si Dela Cruz na lulan ng kulay puting mitsubishi montero nang biglang pagbabarilin ang passenger seat ng sasakyan, hindi naman natamaan ng bala ng baril ang biktima dahil siya mismo ang driver nito.

Narekober ng Scene of the Crime Operatives (SOCO) sa pinangyarihan ng krimen ang walong basyo ng cal. 45.

Samantala patuloy ang imbestigasyon ng mga pulis sa insidente.  – sa panulat ni Mara Valle