RONDA PROBINSYA

Arestado ng mga otoridad ang isang lider ng Jamal Criminal Gang sa ikinasang follow up operation sa Caloocan City.

Kinilala ang suspek na si Jamaloden Assirong y Marcelino alyas Jamal, 28-anyos na nakuhanan ng P136K halaga ng shabu na may timbang na aabot sa 20 gramo.

Ayon sa mga otoridad, agad silang nagkasa ng operasyon matapos makatanggap ng tip mula sa isang concerned citizen kaugnay sa iligal na aktibidad ng suspek.

Dito na naaktuhan ang suspek na nag-aabot ng isang plastic sachet na naglalaman ng shabu sa isang lalaki na buyer pero agad itong nakatunog sa mga pulis.

Mabilis na tumakas ang suspek pero agad ding nahuli ng mga otoridad kung saan, nakuha din ang P510 cash money.

Nakakulong na ang suspek sa Caloocan Police Detention Cell at nahaharap sa kasong paglabag sa RA 9165 o Comprehensive Dangerous Drugs Act of 2002. —sa panulat ni Angelica Doctolero

Patay sa chainsaw ng sariling ama ang isang 13-anyos na batang lalaki sa bayan ng Laoang, Northern Samar.

Base sa imbestigasyon ng mga otoridad, pinuputol ng suspek ang puno katuwang ang kaniyang anak nang biglang mabitawan ng suspek ang chainsaw at tumilapon sa kaniyang anak.

Dahil sa insidente, nahiwa ang tiyan hanggang dibdib ng biktima na agad isinugod sa pagamutan.

Sa ngayon, nangangailangan ng tulong sa pagpapagamot ang mag-ama na minabuting hindi na pangalanan dahil sa aksidente.  —sa panulat ni Angelica Doctolero

Sa kulungan ang bagsak ng dalawang suspek sa pagnanakaw ng cellphone ng dalawang biktimang estudyante sa magkahiwalay na lugar sa Cabuyao, Laguna.

Kinilala ang mga suspek na nadakip na sina Raul Almarinez Gonzaga, 32-anyos at Gerald Valdez, 39-anyos na residente ng barangay San Antonio, Binan, Laguna.

Ayon sa mga otoridad, isang dalagita ang kiniladkad ng mga suspek at inagawan ng cellphone na nagkakahalaga ng P16K.

Nagkataong nagpapatrolya ang mga tauhan ng Cabuyao City Police Station na sina CPL. Ronn Michael Juanito at CPL. Marc Arman Perino kaya’t agad na dinakip ang dalawang suspek.

Dito na napag-alaman na may isang lalaki pa ang nagsumbong na inagawan din ng cellphone ng mga naarestong suspek na nagkakahalaga naman ng P25K.

Nabawi sa mga suspek ang dalawang cellphone kasama ng isang motorsiklo na ginamit sa pagnanakaw ng mga suspek.

Nahaharap ngayon sa kasong robbery ang mga naarestong suspek. —sa panulat ni Angelica Doctolero

Patay ang isang lalaki mataos saksakin ng kaniyang sariling biyenan sa Sitio Camansi Barangay Cabalic, Balasan sa Iloilo.

Kinilala ang biktima na si Jomar Panes, 34 anyos habang ang suspek ay si Hernane Arcenas, 50 anyos.

Ayon kay Police Staff Sergeant Ramon Allan Elambre, imbestigador ng Balasan Municipal Police Station pinagsabihan ng suspek ang biktima matapos makita na sinasaktan nito ang kanyang live-in partner.

Sa halip na sumunod, pinalo ni Panes sa ulo ang kanyang byenan na naging dahilan ng alitan at nauwi sa pananaksak.

Dead on arrival sa ospital ang biktima dahil sa malubhang sugat sa dibdib.

Agad namang sumuko ang suspek sa otoridad. – sa panulat ni Abby Malanday