RONDA PROBINSYA

Isang babae mula sa Davao Del Norte ang nagsunog ng sarili makaraang magselos sa isa pang babae na nagme-message at tumatawag umano sa kanyang asawa sa Facebook.

Ayon sa nakakita, namataan niya ang babaeng kinilalang si Marie na nagliliyab ang buhok sa isang palengke kaya agad itong binuhusan ng tubig.

 Nang maapula ang apoy ay muli nitong sinunog ang sarili dahilan ng pagkakasunog ng kaniyang mukha.

 Sa pahayag ni Dr. Mark Joseph Del Fierro, Chief of the Surgery department, nasunog ang lalamunan ni marie matapos langhapin ang apoy.

 Ayon kay Marie, posibleng may relasyon ang kaniyang asawa sa babaeng palagi nitong nakakausap at nakakasama.

 Sa ngayon, nananawagan ang ina ng biktima na sana ay matulungan sila sa gastusin para sa paggaling ni Marie. – sa panulat ni Angelica Doctolero

Patay ang apat (4) na indibidwal matapos malitson sa nagliliyab na kotseng kanilang sinasakyan sa sa Brgy. Anquiray, amulung sa lalawigan ng Cagayan.

Kinilala ang mga biktima na sina Nicole Molina, isang negosyante; at ang tatlong (3) tauhan nito na sina Oliver Taganna, Jr.; Benjie Pascual; at Michael Indita.

Base sa imbestigasyon ng mga otoridad, pauwi na sana mula sa isang Café Restaurant  na kanilang pinagtatrabahuhan ang mga biktima nang bigla itong bumangga sa isang poste ng ilaw saka dumiretso sa puno ng acasia hanggang sa ito ay magliyab.

Mabilis na nag-spark ang wire mula sa poste at sumabit sa sinasakyan ng mga biktima dahilan upang masunog ito kasama ang mga biktima.

Patuloy pang iniimbestigahan ng mga otoridad ang insidente. —sa panulat ni Angelica Doctolero

Niyanig din ng Magnitude 3.7 na lindol ang Surigao del Sur alas-11 ng umaga kahapon.

Namataan ang pagyanig sa layong 21 kilometer northeast nang Cagwait at may lalim na 28 kilometers at tetonic ang origin o pinanggalingan nito.

Wala namang naitalang nasawi, nasugatan o nasirang ari-arian at wala ding inaasahang aftershock sa nabanggit na lugar. —sa panulat ni Angelica Doctolero

Nalambat ng ilang residente ang isang butanding o whale shark sa ng San Juan sa La Union nitong Biyernes.

Ayon sa mga residente, nagulat daw sila dahil bihira itong mamataan sa kanilang lalawigan.

Dahil dito, nagtulong-tulong sila para maibalik sa dagat ng nahuling butanding.

Samantala, isang thresher shark din ang nakita ng ilang diver sa Punta Bunga isang dive site sa Boracay, Aklan. - sa panulat ni Abie Aliño-Angeles

Umaabot sa 11K hanggang 14K ang average na bilang ng mga bumibisita sa Baguio City.

Matatandaang inalis na ng lokal na pamahalaan ang limitasyon nito sa bilang ng mga turista.

Sa panayam ng DWIZ, sinabi ni Baguio City Mayor Benjamin Magalong na layon nitong matukoy ang threshold ng bilang ng mga turistang dumarating sa summer capital ng bansa.

Kasalukuyang nakapailalim sa Alert level 1 ang Baguio City hanggang Marso 15.

 Hindi namin nilalagyan ng cap para ma-determine nga namin yung treshold, titignan namin yung traffic situation namin, nung nagkaroon tayo ng long weekeend nung February 21, meron kaming isang araw na almost 20K ang umakyat na mga bisita pero nakita namin yung traffic manageable pa rin maski na nagkaroon ng congestion pero gumagalaw ang lighting capacity  , second is tinitignan namin kung manageable ang mga tao sa mga places, malls, sa markets  at sa parks and the third is yung air quality.

Nagbigay naman ng paalala ang alkalde sa mga nais bumisita sa kanilang lugar.

 Remind ko lang po sa inyo na please lang po magregister po kayo sa visita.baguio.gov.ph at pag-akyat niyo po rito sa Baguio mas mabilis na po yung process po namin dito, tinry na po namin dito yung buong proseso dun sa 3 edge at the same time isa lang po ang aming strictly na ipinapatupad, mag-suot lang po kayo ng medical grade mask dito sa siyudad ng Baguio at iwasan po ninyo ang mag-suot ng cleft mask kasi may mga lugar talaga na hindi namin pinapayagan yung pagsusuot ng cleft mask, kaya sumunod lang po kayo at wala kayong magiging problema dito sa siyudad ng Baguio.

 

Patay ang isang dating board member at re-electionist matapos pagbabarilin ng isang 80-anyos na suspek sa Dagawe, poblacion ng Mt. Province.

Kinilala ang nasawing biktima na si Carino Tamang, 56-anyos na dead-on arrival sa ospital dahil sa tama ng mga bala ng baril sa ulo at dibdib.

Kinilala ang suspek na si Efren Tariago na nagtangka pang tumakas matapos ang pamamaril gamit ang isang 9.mm pistol.

Base sa nakuhang impormasyon, nagtalo muna ang dalawa kaugnay sa usapin umano sa lupa.

Nahaharap ngayon ang suspek sa kasong murder at paglabag sa gun ban ng Commission on Elections (COMELEC) at paglabag sa Republic Act 10591 o Comprehensive Firearms and Ammunition Regulation Act. —sa panulat ni Angelica Doctolero

Aabot sa P500K ang halaga ng marijuanang nasabat sa dalawang turista sa Benguet.

Ayon kay Benguet Provincial Police Office Director, Col. Reynaldo Pasiwen, nagsasagawa ng checkpoint ang mga otoridad sa barangay Ampusongan nang maharang ang mga suspek na kinilalang sina Merbyn Larawan Gravador, 45-anyos at Samuel Flor Christian Singson, 23-anyos.

Nang siyasatin ng mga otoridad ang loob ng sasakyan ng dalawa ay dito na natuklasan ang 5K gramo ng Marijuana.

Nasa kustodiya na ng Bakun Municipal Police Station ang dalawang suspek na nahaharap sa kasong paglabag sa Republic Act 9165 o Comprehensive Dangerous Drugs Act of 2002. —sa panulat ni Angelica Doctolero

Patay ang isang indibidwal habang tatlo ang nawawala matapos ang nangyaring pagguho ng lupa sa Sitio Diat, Barangay Napnapan, Davao De Oro noong Martes ng gabi.

Ito ang kinumpirma ng Provincial Risk Reduction Management Office (PDRRMO) kung saan sanhi ng landslide ang ilang araw na pag-ulan sa lugar dahil sa low pressure area.

Patuloy pang biniberipika ang pagkakakilanlan ng nasawi gayundin ang search and retrieval operations.

Noong Enero 2012, umabot sa apatnapu ang nasawi sa isang landslide sa naturang lugar. —sa panulat ni Airiam Sancho