NATIONAL NEWS

Iniimbestigahan na ng Department of Education ang naganap na insidente sa Laua-An, Antique, kung saan lantarang ipinag-utos ng isang Principal sa mga estudyante na hubarin ang mga toga nito sa kasagsagan ng Senior High School Graduation ceremony sa  Col. Ruperto Abellon National School.

Ayon sa DEPED, ikinalungkot nito ang nangyari dahil sa halip na maging panahon ito ng pagdiriwang para sa mga estudyante ay nagdulot ito ng pagkabahala sa mga mag-aaral at kanilang pamilya.

Sa nag-viral na video, sinabi ng Principal ng nasabing paaralan na si Venus Divinia Nietes na paglabag sa polisiya ng DEPED ang pagsuot ng toga sa graduation at nagbanta na tatawag ito ng pulis kapag hindi hinubad ng mga graduates ang kanilang mga toga.

Pinasinungalingan naman ito ng DEPED at nilinaw na hindi ipinagbabawal ang pagsusuot ng graduation robes sa mga  end-of-school-year rites.—sa panulat ni John Riz Calata

Planong ng Land Transportation Franchising and Regulatory Board na maglabas ng show cause order sa mga bus operator ng mga driver na nagpositibo sa paggamit ng iligal na droga nitong Semana Santa.

Ayon kay LTFRB Chairman Teofilo Guadiz III, dapat ipaliwanag ng mga bus operator kung bakit hindi dapat parusahan ang mga ito, sa kabila ng pagkakaroon ng mga driver na nag-positibo sa paggamit ng droga.

Dagdag pa ni Chairman Guadiz,  banta sa kaligtasan ng mga pasahero ang pagkakaroon ng driver na nasa impluwensya ng iligal na droga.

Batay sa isinagawang Oplan: Harabas ng Philippine Drug Enforcement Agency noong April 16, nagpositibo ang 84 na Public Utility Vehicle Driver; kabilang dito ang 13 Bus Driver, 19 na Jeepney Driver, at 47 Tricycle Driver.—sa panulat ni John Riz Calata

Pumalo na halos 300 ang bilang ng mga motoristang nasangkot sa aksidente sa kalsada ngayong Semana Santa.

Ito ay batay sa pinakahuling tala  ng Department of Health mula sa 47 reporting sites nito.

Mula sa nasabing bilang ng mga biktima ng road accidents sa buong bansa, 235 ang hindi gumamit ng mga safety accessory tulad ng helmet o seatbelt; habang 20 ang nakainom ng alak.

221 naman ang kinasangkutan ng motorsiklo.

Dahil dito, pinaalalahanan ng DOH ang mga motorista na iwasang uminom ng alak at siguruhing kumpleto ang tulog bago magmaneho upang maiwasan ang aksidente sa kalsada. —sa panulat ni John Riz Calata

Binigyan na lamang ng hanggang July 1 ng International Criminal Court ang prosecutor nito upang ilabas ang mga ebidensyang gagamitin laban kay dating Pangulong Rodrigo Duterte na nahaharap sa kasong crimes against humanity sa International Criminal Court.

Sa 20 pahinang kautusan na inilabas ng  ICC pre-trial 1, binigyang-diin nito na kailangan nang iprisinta ng prosekusyon ang mga ebidensyang gagamitin nito sa confirmation of charges, sa lalong madaling panahon upang makapaghanda ang defense team ng dating pangulo.

Ayon kay  ICC Spokesman Fadi El Abdallah, alinsunod sa Rome Statute, karapatan ng defendant o ni Duterte na malaman ang mga ebidensyang hawak ng prosekusyon.

Nauna nang ipinangako ni  ICC Prosecutor Karim Khan na target nitong isumite ang mga ebidensya nang hindi lalagpas ng tatlumpung araw bago ang confirmation hearing na nakatakda sa September 23.—sa panulat ni John Riz Calata

Magbubukas na sa darating na Hunyo 16 ang pasukan sa mga pampublikong paaralan sa bansa.

Ito ayon sa Department of Education, ay matapos aprubahan ni Pangulong Ferdinand Marcos Jr. noong nakaraang taong ang pagbabalik sa June-to-March school calendar sa school year 2025-2026.

Magtatapos naman ang nasabing school year sa May 31 na mayroong kabuuang 197 class days, kabilang na rito ang  end-of-school-year rites.

Gayunman, nilinaw ng deped na posible pang magbago ang bilang ng mga araw ng pasok dahil sa mga hindi inaasahang pangyayari at mga bagong kautusan na ilalabas ng ahensya.

Samantala, nakatakda namang ilunsad ang Brigada Eskwela sa Hunyo 9 hanggang Hunyo 13.—sa panulat ni John Riz Calata

Pumalo na sa 15 ang kabuuang bilang ng mga namatay dahil sa pagkalunod ngayong Semana Santa sa buong bansa.

Ito ayon sa pinakahuling datos ng philippine national police ay mula sa 18 kaso ng pagkalunod.

Siyam sa mga biktima ay matatanda, habang anim naman ang menor de edad.

Dahil dito, patuloy ang paghimok ni PNP Chief Gen. Rommel marbil sa publiko na maging alerto at maingat sa lahat ng pagkakataon lalo ngayong kaliwa’t kanan ang outings.

Hindi pa maituturing na suspek ang pitong pulis na idinadawit sa pag-ambush kay Albuera Mayoral Candidate Rolando Kerwin Espinosa, Jr. kundi persons of interest pa lamang, ito ay sa gitna ng patuloy na imbestigasyon sa nasabing insidente.

Iginiit ito ni Leyte Provincial Police Director Police Colonel Dionisio Apas, Jr. matapos kumpirmahin ang pagsasampa ng mga kasong illegal possession of firearms at paglabag sa election gun ban laban sa mga naturang pulis.

Ayon kay Col. Apas, 14 na armas ang nakuha sa mga naturang pulis na kinabibilangan ng isang Police Colonel, Lt. Col, Staff Sergeant, tatlong Corporal at isang Patrol Woman kung saan pito sa mga ito ay nasa administrative custody at nakatakdang sumailalim sa administrative proceedings.

Samantala sa isinagawang paraffin test ay nag negatibo ang pitong pulis subalit positibo naman sa gunpowder residue ang lahat ng 14 na baril na nakuha sa kanila.

Nilinaw naman ni Police Lt. Col. Vivien Malibago ng forensic unit na ang negatibong resulta ng paraffin test ay hindi conclusive dahil maraming factors ang maaaring maka apekto rito tulad nang pagsusuot ng gloves, haba ng baril gayundin ang kondisyon ng kapaligiran.

Ibinunyag ng Philippine National Police na sinadya at plinano simula pa noong Enero ang pagpatay sa negosyanteng si Anson Que.

Ito ayón kay PNP Spokesperson Brigadier General Jean Fajardo ay matapos kumpirmahing hawak na ng PNP-Anti Kidnapping Group ang tatlong suspek sa pagpaslang kay Que at driver nitong si Armanie Pabillo na kinilalang sina Ricardo Austria David, Raymart Catequista at David Tan Liao.

Ang mga nasabing suspek anya ay sumailalim na sa inquest proceedings sa Department of Justice at kinasuhan na ng tig dalawang count ng kidnapping for ransom with homicide.

Isa sa mga suspek na si David Tan Liao na kilala rin sa aliases na Xiaoxiang Yang, Yang Jianmin at Michael Abadyung ay natukoy na Chinese national at sumuko sa mga otoridad kasunod nang pag amin sa partisipasyon sa pagpaslang kay que at driver nito.

Ipinabatid pa ni Brig. Gen. Fajardo na nakita si Liao sa lugar o sa 345 Martha St., Barangay Langka, Meycauayan, Bulacan kung saan dinala ang mga biktima at pinatay.

Nakilala ang mga suspek sa pamamagitan ng surveillance footage, cyber monitoring at intelligence reports.

Nanguna si Vice President Sara Duterte sa apat na pinakamataas na opisyal ng gobyerno.

Ito’y batay sa isinagawang survey ng Pulse Asia kung saan umabot sa 59% ang approval rating ng bise Presidente mula sa mahigit 2,000 respondents.

Sa resulta ng Pulse Asia, nakatanggap naman si Pangulong Ferdinand Marcos Junior ng 25% habang 39% kay Senate President Francis “Chiz” Escudero.

Nakakuha naman si House Speaker Ferdinand Martin Romualdez ng pinakamataas na disapproval rating na 54%.

Isinagawa ang survey noong March 23 hanggang 29, mahigit isang buwan matapos i-impeach si VP Sara ng mga mambabatas mula sa mababang kapulungan.

 Pinag-aaralan na ng Department of Transportation na ibalik ang drug test sa mga motoristang kukuha ng driver’s license.

Sa gitna ito ng pagtaas ng bilang ng mga naaaksidente sa kalsada ngayong semana santa dulot ng mga “Kamote riders”.

Bukod dito, sinabi ni Transportation Assistant Secretary at Office of Transportation Cooperatives Executive Director Mon Ilagan sa DWIZ, na nirerepaso na ng kagawaran ang road action plan upang maibsan ang aksidente sa mga kalye.

Tiniyak naman ni Asec. Ilagan na 24/7 nilang babantayan ang transport sector dahil maraming motorista ang hindi pinapansin ang batas trapiko at inilalagay pa sa panganib ang kaligtasan ng mga pasahero.