NATIONAL NEWS

26 na katao ang napaulat na nawawala matapos lumubog ang isang pampasaherong bangka mula sa Makassar Paotere Harbor patungo sa Kalmas Island, Central Indonesia sakay ang 43 pasahero habang 17 mula sa mga ito ang nailigtas na.

Batay sa ulat ng Regional Office of the Search and Rescue Agency ng Indonesia lumubog ang bangkang Ladang Pertiwi bandang alas-3:30 ng madaling araw noong Huwebes sa straits makassar at natanggap lamang na Makassar search and rescue office ang naturang ulat nitong Sabado

Ayon naman sa South Sulawesi Provincial Capital ng Makassar pinaniniwalaang naubusan ng gasolina at na-trap ang naturang bangka dulot ng masamang panahon at posibleng higit pa sa naunang ulat na 43 katao ang lulan ng bangka na maaaring nasa higit kumulang 60 pasahero pa ang sakay.

Nasabat ng Bulacan PNP ang P144,000 na halaga ng pinatuyong dahon ng Marijuana sa limang araw na pinaigting na Simultaneous Anti-Criminality and Law Enforcement Operations (SACLEO) nito ayon kay Malalos Camp General Alejo Santos.

Kinilala ang mga suspek na sina Gerardo Padawan at Minerva Tamayo kapwa residente ng Sto. Rosario sa Malolos gayundin sina Fidel Cayco, Monte Carlo Remolano, Ric Orjaleza; Michael Avien Dela Cruz at Mark Aaron interior na mga kapwa nahuli sa ikinasang anti-illegal drug operations ng Balagtas, Marilao at Pandi Municipal Police Station.

Nasamsam sa mga suspek ang 11 sachet at isang brick ng pinatuyong dahon ng Marijuana na humigit-kumulang 1,000 at dalawang gramo na may tinatayang nagkakahalaga ng P144,000.

Samantala inihahanda na ang mga kaukulang kasong kriminal laban sa mga naarestong suspek.

Hayagang kinukuwestiyon ng Quezon City Advocates for Responsible Entertainment, Sports, Gaming & Wellness (QCARES) at Globaltech Mobile Online Corporation ang legalidad ng kasalukuyang operasyon ng Small Town Lottery (STL) sa lungsod.

Batay sa nakalap na impormasyon, ang STL operator ng lungsod ay di-uman’oy dummy lamang na sinasabing lumagda ng kasunduan sa isang personalidad na siyang totoong nag-ooperate nito kapalit ang halaga para sa paggamit ng lisensya na iginawad dito ng Philippine Charity Sweepstakes Office (PCSO).

Binigyang diin ng QCARES na batay sa umiiral na Revised Implementing Rules and Regulations o RIRR ng PCSO, ipinagbabawal  sa mga license holder ang subcontracting, maging sa winning bidder.

Ayon sa grupo, ang paglabag na ito ay isang pangunahing dahilan upang mapawalang bisa ang lisensya ng isang operator.

Kasabay nito, nagpahayag din ng pagkabahala ang Globaltech matapos sumingaw na umano’y fixed bidding ang posibleng naganap sa proseso ng pagkakaloob ng pribilehiyo para sa operasyon ng STL sa QC.

Bukod dito, tinukoy din ng magkabilang kampo na lumutang ang ulat na nagsasaad na ilang buwan na umanong hindi nakakabayad nang buo sa kanilang obligasyon sa PCSO ang operator ng STL sa kabila ng patuloy na operasyon nito sa siyudad.

“Nagtataka kami kung bakit ‘di pa ipinapahinto ng PCSO ang operasyon ng STL sa aming lugar kung totoo ngang ‘di sila tumalima ng kanilang obligasyon sa pamahalaan,” pahayag ng isang barangay captain mula sa ikalawang distrito na ayaw magpabanggit ng pangalan.

Palaisipan din umano sa kanila ang impormasyon na kamag-anak ni PCSO General Manager Royina Garma ang STL operator kaya ganoon kalakas, bagay na mariing ipinagbabawal ng batas.

Samantala, nanawagan din ang mga barangay captain sa lungsod na tutukan at aksyunan ng mga kinauukulan ang iligal na sugal.

Maaalalang pumutok ang impormasyon na paggamit umano na front ng mga illegal gambling operator at ng kanilang mga kubrador na umiikot at nagpapataya sa bawat barangay ng inisyung ID sa kanila para sa operasyon ng STL sa QC.

Bunga nito, hindi umano makakakilos ang mga operatiba ng PNP Anti-Illegal Gambling Task Force sapagkat maliban sa ID, may pa-uniporme rin ang mga nangangasiwa ng iligal na sugal na nagtatago sa STL.

Nagpapatuloy ang sinasabing malawakang operasyon ng illegal numbers game sa lungsod sa kabila ng mahigpit na kampanya na isinasagawa ng Quezon City Police District (QCPD), batay na rin sa kautusan ni QCPD District Director Remus Medina.

“Hindi talaga masusugpo ang iligal na sugal, kasi kahit anong gawing ikot ng mga pulis dito sa barangay namin, wala silang mahuhuli kasi iisipin nilang legal ang galawan ng mga nagpapataya rito,” wika naman ng isang residente ng ikalawang distrito kung saan umano nangyayari ang iligal na sugal.

Nasawi ang tatlong bata sa sunog na sumiklab sa kanilang bahay sa barangay Tatalon, Quezon City bandang alas-4 ng madaling araw nitong linggo.

Batay sa ulat,  isang 9 years old, 8 years old at 4 years old ang edad ng tatlong bata na natupok ng apoy sa isang residential building sa Kaliraya street.

Ayon sa kwento ng ama ng mga biktima nagising ang kanyang misis at ikinagulat ang usok sa ikatlong palapag ng gusali at pagbukas nila ng pinto ng kanilang kwarto, nilamon na ng usok ang sala at kumakalat na ang apoy.

Aabot sa pitong mangingisda ang naipaulat na nawawala matapos bumangga ang sinasakyang bangka sa isang cargo vessel sa Agutaya, Palawan.

Ayon kay Philippine Coast Guard spokesperson Commodore Armando Balilo, may natanggap silang maritime incident report  kung saan isang bangkang pangisda ang bumangga sa cargo vessel na MV Happy Hiro sa Marshall Island na sakop ng bisinidad ng Maracanao Island sa nasabing bayan.

Aniya, tinatayang bandang alas 5:40 ng hapon nang nangyari ang insidente.

Nasa 20 ang laman ng nasabing bangka kung saan 13 na rito ang nailigtas.

Sa ngayon, nagsasagawa na ng malawakang search and rescue operations ang MRRV 4406 BRP Suluan kasama ang rescue team ng coast guard station Cuyo at substation Agutay sa Iloilo.