NATIONAL NEWS

Malugod na tinatanggap ng Department of Education (DepEd) ang pag-apruba ng Commission on Elections (COMELEC) sa pagbibigay ng karagdagang honoraria sa mga piling guro na nag-extend ng oras noong nakaraang eleksyon.

Ayon kay DepEd Sec. Leonor Briones at Election Task Force Chair at Undersecretary for Administration Alain Del Pascua, agad silang nakipag-ugnayan sa Comelec sa panukala nitong pagbibigay ng nararapat na pasahod sa mga gurong pinalawig ang oras ng serbisyo dahil sa aberya sa Vote Counting Machines (VCMs) at SD card.

Batay sa utos ng COMELEC, ang poll workers ay tatanggap ng karagdagang 2,000 pesos honoraria across the board.

Bagama’t ito ay mas maliit sa orihinal na panukala na 3,000 pesos, nagpapasalamat pa rin ang kagawaran sa komisyon sa pakikinig sa kanilang panawagan para sa kapakanan ng mga guro.

Samantala, nakikipagtulungan ang DepEd sa COMELEC at Kongreso para magtatag ng mas kapaki-pakinabang na mga probisyon na may kaugnayan sa botohan para sa  mga guro na nakatuon sa proteksyon ng kasagraduhan ng boto ng mga Pilipino.

Ikinalungkot ni incoming labor secretary Bienvenido Laguesma ang non-regularization ng contractual workers o mas kilala bilang “endo”

Ayon kay Laguesma, walang masama sa kontraktwal na trabaho lalo na kung ito ay project-based employment tulad ng construction work.

Pero “pang-aabuso” aniya ang hindi pag-renew ng kontrata sa trabaho dahil sa hindi magandang perfromance ng manggagawa pagkatapos ng probationary period na 6 months.

Sa ilalim aniya ng batas, ang mga empleyado ay dapat na abisuhan sa ikatlong buwan kaugnay sa status ng performance nito para may panahon pa upang ma-improve at ma-satisfy ang requirement ng employer.

Umakyat na sa 3,447 na indibidwal ang naaresto ng Philippine National Police (PNP) matapos lumabag sa umiiral na gun ban.

Batay sa datos ng PNP, 3,338 sa mga naaresto ay sibilyan, 61 ang security guard, 26 ang pulis, at 22 ang sundalo.

Naaresto ang mga ito sa 3,239 operasyon sa buong bansa na sinimulan noong January 9.

Sa bilang na ito, 1,242 ay nagmula sa Metro Manila, 373 sa Calabarzon, 359 sa Central Visayas, 312 sa Central Luzon at 200 sa Western Visayas.

Nakumpiska sa mga suspek ang mahigit 2,673 armas, 1,101 patalim, at 16,684 na mga bala.

Ayon sa Tuguegarao city health office, wala na kasing naitalang bagong kaso ng COVID-19 sa siyudad.

Pero sa kabila nito, nilinaw ni Tuguegarao City Health Officer James Guzman na hinihikayat pa rin nila ang kanilang residente na sundin ang umiiral na minimum health protocols.

Nagpapatuloy rin ang walk-in vaccinations at booster shots sa kanilang lugar para mapigilan pa ang hawaan ng COVID-19.

Nabatid na pumalo na sa 18,750 ang kumpirmadong COVID-19 cases sa Tuguegarao kung saan 606 ang nasawi at 18,144 ang gumaling.

Kontralado pa ang kaso ng dengue at COVID-19 sa bansa ayon sa Private Hospitals  Associations of the Philippines Inc. (PHAPI).

Ito ang inihayag ng PHAPI kasunod ng mga ulat na pagtaas ng kaso ng dengue at COVID-19 sa bansa

Ayon kay PHAPI president Dr. Rene Jose De Grano dulot ito ng madalas na pag-ulan kaya nagkaroon ng mataas na kaso ng dengue nitong nagdaang dalawang linggo partikular sa Visayas at Mindanao.

Aniya karamihan sa mga nasasawi ay dahil sa komplikasyon habang karamihan sa kaso ng dengue ay nagagamot naman at wala pang napauulat na namamatay sa ngayon dulot ng sakit

Gayunpaman, lumabas sa mga ulat na 19 na ang namatay dahil sa dengue sa Zamboanga City 11 ang namatay sa Cebu City.

Pagtitiyak naman ni  health undersecretary Myrna Cabotaje sa publiko kontrolado pa ang  kaso ng dengue ng bansa, ngunit pinayuhan na nito ang mga health facility na maghanda para sa pagtaas ng admission, lalo ng mga bata.

Binawian na ng buhay ang isang 8 taong gulang na batang lalaki matapos isugod sa ospital nitong ika-27 ng Mayo bunsod ng mga palo ng tsinelas ng kanyang ina at amain o stepfather.

Batay sa resulta ng cursory examination sa katawan ng bata  nagtamo ito ng hematoma o pamumuo ng dugo sa mga braso at binti habang inaalam pa ng awtoridad ang malalim pang sanhi ng pagkamatay ng bata, dahil sa dami ng mga pasa na tinamo nito.

Ayon sa pulisya, nasa kustodiya na nito ang ina ng bata na si alyas “kim” at kinakasama nitong si alyas ‘germarc’ na nahaharap sa kasong homicide at parricide.

Nasa higit isang milyong halaga ng hinihinalang ipinagbabawal na gamot ang nasabat ng awtoridad sa Siniloan, Laguna sa isinagawa ng mga ito na buy bust operation sa lalawigan.

Ayon kay Col. Ronald Florez, dinakip ang 51 taong gulang na suspek matapos bentahan ng ilegal na droga ang pulis na nagpanggap na buyer habang 11 sachet ng hinihinilang shabu, na may timbang na 150 gramo, ang nakuha rito.

Ayon sa pulisya, nahaharap sa kasong pagbebenta at pagmamay-ari ng ilegal na droga ang kakaharapin ng suspek.