NATIONAL NEWS

Tatlong gamot para sa mental illness ang tinanggal ng Food and Drug Administration sa listahan ng mga exempted sa 12%- value-added tax.

Sa liham na ipinadala kay BIR Commissioner Lilia Catris Guillermo, sinabi ni FDA Director General Samuel Zacate na inalis nila ang naturang mga gamot mula sa VAT exempt drugs dahil sa kabiguan ng mga ito na sumunod sa provisions ng Corporate Recovery and Tax Incentives for Enterprises (CREATE) law.

Inalis sa vat-exempt medicines ang dexmedetomidine for intravenous infusion; dexmedetomidine, concentrate solution for intravenous infusion; at dopamine hydrochloride, solution for reconstitution.

Sa ilalim ng CREATE law, exempted sa ipinapataw na vat ang mga gamot para sa ilang mga sakit gaya ng cancer, diabetes, tubercolosis, at mental illness.

Magdaragdag ang Department of Transportation (DOTr) ng 50 bus para sa EDSA bus way project.

Ayon kay Transport Secretary Jaime Bautista, nakikita niya itong solusyon para mapalakas ang transportation system at masolusyonan ang problema ng trapiko sa Metro Manila.

Hinikayat din ng DOTr ang publiko na gumamit ng mass transit system tulad ng Mrt-3 at Lrt 1 at 2 upang maibsan ang masikip na daloy ng trapiko.

Una rito, inihayag ng Land Transportation Franchising and Regulatory Board (LTFRB) na bubuksan nito ang mahigit 50 ruta ng jeep para mapagserbisyuhan ang mas marami pang pasahero. - sa panunulat ni Hannah Oledan

Sapat pa ang tubig sa Angat Dam bagamat kapos ng 4 na metro ang minimum operating level nito.

Batay sa huling datos, 176 out of 180 meters ang laman nito.

Sa panayam ng DWIZ, inihayag ni Executive Director Sevillo David ng National Water Resources Board (NWRB) na patuloy nilang binabantayan at pinag-aaralan ang lebel ng tubig sa naturang Dam.

Normal pa na alokasyon po ang kaya pang idulot ng dagdag sa ngayon,kaya lang po iyan ang tinitingnan natin, ano po ang pwedeng idulot ng panahon sa mga susunod na buwan at iyan po ang minomonitor natin at nagsasagawa din po tayo ng mga pag-aaral para po sakali pong kakailanganin nating magadjust sa alokasyon at magdudulot ng epekto sa mga kababayan po natin kapag ang pinaguusapan ay ang suplay ng tubig magbibigay po tayo ng karampatang abiso naman.”

Samantala, sinabi rin ni David na suspendido pansamantala ang pagsasagawa ng cloud seeding dahil sa sama ng panahon.

Sa kasalukuyan po ay suspended po ang cloud seeding kasi ito nga umiire po tayo ngayon sa abiso ng PAGASA kung kailan po ang nararapat na panahon pero ayon po sa pakikipagpanayam natin, tayo po ay hindi pa napapanahon na magcloud seeding operation, usually po pag kascammer ngayon ang cloud seeding operations ito po kasi ngayon ang panahon na medyo maulan na kailangan po na ang pakikipagpanayam natin ay mukhang hindi naman po kakailanganin pa”

Ang tinig ni NWRB Executive Director Sevillo David sa panayam ng DWIZ. - sa panunulat ni Hannah Oledan

Dahil sa pinsala na maaaring idulot ng bagyong Karding, inatasan ng National Telecommunications Commission (NTC) ang lahat ng public telecommunications entities na tiyakin ang kanilang kahandaan.

Batay sa ipinalabas na memorandum ni NTC Commissioner Gamaliel Cordoba, ipinag-utos nito sa mga telco na tiyakin na mayroong sapat na bilang ng technical at support personnel, standby generators na may extra fuel, at iba pang gamit sa mga lugar na posibleng tamaan ng bagyo.

Iniutos din ni Cordoba na madaliin ang repair at restoration ng telecommunication services kung mayroong naapektuhan ng kalamidad.

Bukod dito, inatasan din ang mga network company na magtalaga ng “Libreng Tawag” at “Libreng Charging” stations sa mga apektadong lugar.