EXPLAINERS

Bahagi lamang ng “communications plan” upang patalsikin si Pangulong Ferdinand Marcos Jr. ang Senate hearings na pinamumunuan ni Sen. Ronald ‘Bato’ Dela Rosa.

Ito ang idiniin ni dating Sen. Antonio Trillanes tungkol sa isyu na nagdadawit kay Pangulong Marcos sa drug list umano ng Philippine Drug Enforcement Agency (PDEA).

Para naman kay dating Sen. Panfilo Lacson, “pira-pirasong papel” lamang ang iprinisenta ni ex-PDEA agent Jonathan Morales upang akusahan ang pangulo sa paggamit ng ilegal na droga.

Aniya, kahit sinong ahente ay maaaring lumikha ng naturang intelligence report, ngunit hindi man lang ito isinumite sa kanyang immediate supervisor para sa initial evaluation. Wala rin itong official report.

Nasira na rin ang kredibilidad ng ex-PDEA agent nang masiwalat ang kanyang criminal at administrative cases.

Pagbabahagi ni dating PDEA Director General Arturo Cacdac, umamin si Morales sa pagtatanim ng ebidensya sa isang operasyon laban sa Filipino-Chinese drug suspects.

Samantala, kinumpirma ni PDEA Legal and Prosecution Service Acting Director Atty. Francis del Valle na hindi lumalabas ang pangalan ni Pangulong Marcos sa national drug information system o interagency drug information database, kaya kailanman, hindi siya nakasama sa drug war list.

Sa panig naman ni Pangulong Marcos, ikinumpara niya si Morales sa isang jukebox na kakantahin ang anumang kanta basta huhulugan ng pera.

Ayon sa pangulo, “professional liar” ang ex-PDEA agent kaya hindi na dapat ito bigyan pa ng importansya, lalo na at may kaso itong false testimony.

Ika nga ni Senate President Juan Miguel Zubiri, kailangan ng matibay na ebidensya rito. Walang tsismis, walang politika. Katotohanan lamang.

Pinagdududahan ngayon ang pagkakakilanlan ng mayor ng Bamban, Tarlac na si Alice Guo.

Ito ay kasunod sa imbestigasyon tungkol sa kanyang pagkakasangkot sa sinalakay na Philippine Offshore Gaming Operators (POGOs) sa lugar.

Matatandaang noong February 2023, sinalakay ng mga operatiba ng Criminal Investigation and Detection Group-Central Luzon (CIDG-3) ang Hong Sheng Gaming Technology Inc., isang fraudulent cryptocurrency investment operation.

Nitong March 2024 naman, pinangunahan ng Presidential Anti-Organized Crime Commission (PAOCC) ang pag-raid sa Zun Yuan Technology Inc., isa sa pinakamalaking POGO compounds sa lalawigan na matatagpuan lamang sa likod ng Bamban Municipal Hall.

Nasangkot si Mayor Gou rito dahil naging incorporator at owner siya ng 50% shares ng Baofu Corporation, ang kumpanya na nagpaupa sa compound ng mga sinalakay na POGO.

Ngunit ayon sa alkalde, ibinenta na niya ang kanyang parte bago pumasok sa politika.

Dahil dito, kinuwestiyon ni Sen. Risa Hontiveros kung posible nga bang isang Chinese national si Mayor Gou na naging instrumento sa pagpasok ng malalaking POGO firms sa bansa.

Nang tanungin sa pagdinig ng Senado ukol sa kanyang kapanganakan at edukasyon, sinagot ng alkalde na hindi niya alam at hindi niya ito matandaan.

Pinaghihinalaan ding 17-anyos na si Mayor Guo nang mairehistro ang kanyang kapanganakan.

Patuloy ang imbestigasyon ng Senado hinggil sa pagkakakilanlan ng mayor at ang posibleng koneksyon nito sa China.

“Age is just a number” ang naging komento ng mga netizen sa ginanap na kasal nina Batangas Gov. Hermilando ‘Dodo’ Mandanas at Atty. Angelica Chua kamakailan.

Halos 50 years kasi ang agwat ng 32-year-old na si Atty. Chua kay Gov. Mandanas na 80 years old na.

Matagal nang magkakilala sina Gov. Mandanas at Atty. Chua dahil nagtrabaho ang ina ng abogada para sa gobernador noon bilang head ng provincial legal office.

Sa katunayan, dumalo pa si Gov. Mandanas sa 7th birthday ni Atty. Chua!

Hindi na muling nag-krus ang landas ng dalawa; ngunit makalipas ng ilang taon, kinailangan ng gobernador ang serbisyo ng isang law firm kung saan kasosyo si Atty. Chua.

Propesyonal ang kanilang naging relasyon, hanggang sa dumating ang Araw ng mga Puso kung saan tinanong ng gobernador si Atty. Chua kung pwede bang siya ang maging Valentine’s date nito.

Akala ng abogada, nagbibiro lamang si Gov. Mandanas. Nang malaman niyang seryoso pala ito, hiniling niya sa gobernador na humingi ng permiso sa kanyang mga magulang.

Gaya ng karamihan, age gap ang unang pumasok sa isip ni Atty. Chua; ngunit matapos ang ilang pagkikita, napagtanto niyang mas mahalaga ang mga katangian ni Gov. Mandanas kaysa halos limang dekadang agwat sa kanilang edad.

At makalipas ang tatlong buwang pagde-date, nagpakasal na ang dalawa sa Minor Basilica and Parish of the Immaculate Conception sa Batangas City.

Kinumpirma ng bagong kasal na mayroon silang nilagdaang pre-nuptial agreement. Pagbibigay-diin ni Gov. Mandanas, mas mayaman pa ang pamilya ng babae.

Ipinagdadasal din ng gobernador na makayanan nilang mag-asawa ang anumang pagsubok na darating sa kanila.

Aniya, “You cannot sustain it if you don’t pray.”

Pinag-aaralan ng pamahalaan ang posibleng pagpapalawak sa operasyon ng motorcycle taxis at iba pang katulad na serbisyo sa labas ng Metro Manila.

Ito ang inihayag ni Pangulong Ferdinand Marcos Jr. sa ginanap na Bagong Pilipinas Town Hall Meeting.

Ayon kay Pangulong Marcos, tinatayang mayroong 15 million motorcycle riders sa Pilipinas. Kinikilala niya ang benepisyo at kahalagahan ng mga serbisyo nito.

Dahil dito, pinag-aaralan na ng pamahalaan kung saang high-traffic areas maaaring palawakin ang motorcycle services, katulad ng transportation, delivery, at messenger.

Sa kasalukuyan, wala pang batas para sa legalisasyon ng motorcycle taxi bilang alternatibong transportasyon, ngunit nagsasagawa ng pilot study ang pamahalaan upang maging batayan.

Para naman kay Pangulong Marcos, dapat maging “holistic” o komprehensibo ang sistema nito.

Matapos ang matagumpay na pilot implementation, ipatutupad na simula ngayong Hulyo 2024 ang Food Stamp Program ng administrasyon ni Pangulong Ferdinand Marcos Jr. sa buong bansa.

Flagship program ng Department of Social Welfare and Development (DSWD) ang Food Stamp na layong sugpuin ang kagutuman sa buong bansa.

Sa ilalim ng naturang programa, makatatanggap ng Electronic Benefit Transfer (EBT) cards ang mga itinuturing na food-poor families. Maaari nilang gamitin ang EBT cards upang makabili ng mga masusustansyang pagkain mula sa eligible partner merchant stores.

Ayon kay DSWD Undersecretary Edu Punay, ipatutupad sa 10 rehiyon at 12 probinsya ang Food Stamp Program na inaasahang makatutulong sa initial target nitong 300,000 na pamilya.

Investment ng administrasyong Marcos ang Food Stamp Program dahil mabibigyan nito ng sapat na nutrisyon ang mga nagugutom na Pilipino. At kung mayroon na silang enerhiya, maaari na silang makapagtrabaho.

Sa katunayan, kailangang mag-enroll sa mga programa ng Department of Labor and Employment (DOLE) at Technical Education and Skills Development Authority (TESDA) ang mga benepisyaryo ng programa.

Hindi lang panandaliang solusyon ang Food Stamp Program. Hinihikayat na nito ang mga benepisyaryo na magtrabaho upang magkaroon ng sariling kakayahan na makapagbigay ng pagkain para sa kanilang pamilya; matutupad pa ang pangako ni Pangulong Marcos na tuluyang masugpo ang kagutuman sa buong Pilipinas.

Malaki ang posibilidad na magkakaroon ng panibagong salary increase ang mga manggagawang Pilipino.

Ito ang inihayag ni Senate Committee on Labor Chairperson Sen. Jinggoy Estrada, kasunod sa panawagan ni Pangulong Ferdinand Marcos Jr. na repasuhin o i-review ang minimum wage sa lahat ng rehiyon sa bansa.

Ayon kay Sen. Estrada, suportado niya ang “proactive approach” ng administrasyon sa pagtitiyak ng patas na kompensasyon para sa mga manggagawang Pilipino, sa gitna ng pagtaas ng presyo ng mga pangunahing bilihin.

Nilinaw rin ng senador na hindi magiging balakid ang pagrepaso sa minimum wage, sakaling maging ganap na batas ang naunang isinusulong na P100 daily minimum wage increase.

Aniya, kung mapagdesisyunan ng Regional Tripartite Wage and Productivity Boards (RTWPBs) na maglabas ng panibagong wage order, magiging malaking kaluwagan ito para sa mga kababayan nating pilit na pinagkakasya ang kanilang kita sa lumalaking gastusin ng kanilang pamilya.

Para naman kay Pangulong Marcos, itinayo ang Pilipinas sa pamamagitan ng pawis at pagsisikap ng mga manggagawang Pilipino, kaya nararapat lang aniya na patuloy silang alagaan ng pamahalaan.

Patuloy ang positibong galaw ng labor market ng Pilipinas sa nakalipas na taon sa ilalim ng pamumuno ni Pangulong Ferdinand Marcos Jr.

Noong March 2023, iniulat ng Philippine Statistics Authority (PSA) na 95.3% ng mga Pilipino ang may trabaho. Nitong March 2024, tumaas ito sa 96.1% o katumbas sa 49.15 milyong indibidwal.

Bumaba din ang unemployment rate nitong March 2024 sa 3.9%, mula 4.7% noong nakaraang taon.

Para kay Pangulong Marcos, mukha ng Bagong Pilipinas ang mga manggagawang Pilipino. Aniya, itinayo ang bansa sa pamamagitan ng kanilang pawis at pagsisikap.

Kasabay sa patuloy na pagtaas ng employment rate sa ilalim ng kanyang administrasyon, tiniyak ng pangulo na patuloy ring aalagaan ng pamahalaan ang mga karapatan at kapakanan ng mga manggagawang Pilipino, sa loob o labas man ng bansa.

Hindi gagamit ng water cannon ang Pilipinas katulad ng ginagawa ng China Coast Guard (CCG) sa mga sasakyang-pandagat ng Philippine Coast Guard (PCG) sa West Philippine Sea (WPS).

Ito ang iginiit ni Pangulong Ferdinand Marcos Jr. sa isang ambush interview sa ginanap na Government-Owned or -Controlled Corporations (GOCCs) Day.

Mayroong mga nagmumungkahi na lagyan ng water cannon ang mga barko ng pamahalaan, sakaling muling umatake ang CCG gamit ang naturang weapon.

Ngunit ayon kay Pangulong Marcos, hindi misyon ng PCG at Philippine Navy na magsimula o magpalala ng tensyon.

Aniya, “It is not the mission of Navy, our Coast Guard to start, or to increase tensions. Their mission is precisely the opposite, it’s to lower tensions.”

Nanindigan din ang pangulo na patuloy na ipagtatanggol ng Pilipinas ang soberanya at karapatan ng bansa sa diplomatikong paraan.

Sang-ayon naman ang ilang security analysts sa naging hakbang ni Pangulong Marcos dahil sa ganitong paraan, hindi makokompromiso ang 2016 Arbitral Award na iginawad sa Pilipinas, hindi rin lalala ang tensyon sa pinag-aagawang teritoryo.