INTERNATIONAL NEWS

Inihayag ng Hong Kong government na tatanggalin na nila ang mandatoryong hotel quarantine para sa mga dayuhang pumapasok sa kanilang bansa.

Ayon kay chief executive John Lee, tatanggalin na nila ang tatlong araw na mandatory quarantine partikular para sa mga dayuhang nanggagaling sa Taiwan at iba pang bansa.

Pero mananatili pa aniya ang RT-PCR test sa mga dayuhan at hindi pa rin sila puwedeng magtungo sa mga bars sa loob ng tatlong araw.

Samantala, malaking ginhawa naman para sa mga residente ng Hong Kong ang nangyari dahil mas lalong uunlad ang kanilang ekonomiya na malaking tulong sa mga negosyo.

Aalisin na ng Japan ang COVID-19 restrictions sa mga dayuhang turista simula sa buwan ng Oktubre.

Ayon kay Japanese Prime Minster Fumio Kishida, na sa mahigit dalawang taon ay naantala ang galaw ng mga tao at produkto.

Batay sa kaniyang mensahe sa United Nation General Assembly sinabi ni Kishida na magsisimula ang kanilang pagluluwag sa Oktubre 11.

Kasama ng Japan ang China na nagpatupad ng mahigpit na travel restrictions sa mga dayuhan sa gitna pa rin ng pandemya na nararanasan sa buong mundo.

Umakyat na sa 31 ang bilang ng mga nasawi sa naganap na kilos protesta sa Iran.

Sumiklab ang kaguluhan matapos magpunta ang mga sibilyan sa kalsada para magsagawa ng rally at ipanawagan ang kanilang karapatan at dignidad.

Nabatid na tumagal ng anim na araw ang pagsasagawa ng protesta ng mga sibilyan, dahilan para maalarma ang mga Iranian Security Forces.

Agad na inaresto ang mga sibilyan pero nanlaban ang mga ito na nagresulta para gumanti ang mga otoridad.

Sa ngayon, nagsagawa na ng operasyon ang Iranian Forces bunsod ng nagpapatuloy na kilos-protesta sa nabanggit na lugar.

Maraming mamamayan na sa Russia ang nagmamadaling umalis ng bansa matapos i-utos ni President Vladimir Putin ang pagkuha ng 300, 000 reservist na ipapanlaban sa giyera.

 Ayon sa ulat, ang mga direct flight mula sa Moscow at patungong Istanbul, Turkey at Yerevan ang naunang magsold-out ang ticket.

Maraming pasahero rin ang dumagsa sa mga paliparan na nagnanais na makaalis ng Russia.

 Dahilan ng mga residente, natatakot silang hindi makaalis ng bansa kung matatapos na ang giyera sa pagitan ng Russia at Ukraine.

Nanawagan si Ukrainian President Volodymyr Zelensky sa mga bansa na dapat patawan ng parusa ang Russia dahil sa ginawa nilang paglusob sa Ukraine.

Sa kaniyang video message sa United Nations, ang mga ginawa aniya ng russia na kumitil sa maraming buhay ng Ukraine ay nararapat na mabigyan ng karampatang parusa.

Iginiit nito na ang ukraine at maraming mga bansa ang nagnanais ng kapayapaan.

Tanging ang Russia lamang umano ang nasisiyahan sa ginagawang paglusob nito sa Ukraine.

Bukas ang Tsina para sa isang mapayapang muling pag-iisa sa bansang Taiwan.

Inaangkin ng China ang demokratikong pamahalaan ng Taiwan bilang teritoryo nito subalit hindi tanggap ng Taiwan ang pag-angkin nito.

Nagsagawa ang China ng drills malapit sa Taiwan mula nang bumisita si US House Speaker Nancy Pelosi sa Taipei.

Ayon kay ma Xiaoguang, tagapagsalita ng Taiwan Affairs Office ng China, na handa ang bansa para sa isang mapayapang reunification.

Ayon sa Mainland Affairs Council ng Taiwan hanggang 23 milyon katao ang magpapasya kung pabor sa pag-iisa sa China.

Subalit, malinaw na ito’y  tinanggihan ng mga Taiwanese, kabilang na ang mga mainstream na partidong pampulitika ng taiwan matapos ang karahasang naranasan ng  lungsod mula sa China.  —sa panulat ni Jenn Patrolla

Nananatiling lubog sa baha ang ilang lugar sa Puerto Rico na teritoryo umano ng US matapos ang walang tigil na pag-ulan dahil sa Hurricane Fiona.

Ayon sa mga otoridad, tumama ang bagyo matapos ang limang taon kung saan, itinuturing ito na pinakamalakas dahil sa laki ng epekto na idinulot nito sa nabanggit na lugar.

Nabatid na kabilang sa mga nasira ang ilang mga kabahayan, kalsada at tulay bunsod ng malawakang pagbaha.

Bukod pa dito, nawalan din ng suplay ng kuryente dala ng patuloy na malalakas na pag-ulan dahilan para magdeklara na ng State of Emergency sa US Island si President Joe Biden.

8 katao ang sugatan matapos ang naging pagsabog sa isang gusali sa Chicago.

Sa naturang bilang, tatlo sa mga biktima ang nagtamo ng matinding pinsala.

Maliban dito,  ilang mga sasakyan naman na nakaparada ang nadamay  mula sa gusali na matatagpuan sa West Washington Boulevard at North Central Avenue.

Samantala, patuloy na nagsasagawa ng imbestigasyon ang mga otoridad sa sanhi ng naturang insidente.