INTERNATIONAL NEWS

Nakikiusap si Pope Francis kay Russian president Vladimir Putin na itigil na ang karahasan at patayan laban sa Ukraine.

Nabatid na direktang umapela ang Santo Papa kay Putin hinggil sa bakbakan ng Russia at Ukraine kung saan, marami nang luha at dugo ang dumanak.

Ayon kay Pope Francis, dapat na isipin din ni Putin ang kapakanan ng kanyang mga tauhan.

Kaugnay nito, tinawag ng Santo Papa na “Absurd” o walang katotohanan ang pangambang nuclear conflict kaya dapat nang matigil ang hidwaan sa pagitan ng dalawang bansa.

Bukod kay Putin, nanawagan din si Pope Francis kay Ukraine president Volodymyr Zelenskyy na maging bukas sa anumang peace proposal sa kabila ng nagaganap na tensiyon.

Sa ngayon, pumalo na sa $35.33 billion ang halaga ng environmental damage bunsod ng pananakop ng Russia sa Ukraine.

Gumagawa na ng paraan ang football association sa indonesia kung paano maiiwasan ang mga football related incidents sa kanilang bansa.

 Ito ay matapos umakyat pa sa 174 ang nasawi sa indonesia matapos magkaroon ng stampede sa pagitan ng mga fans ng Arema FC at mga otoridad nang matalo ang kanilang team ng Persebaya Surabaya.

 Ayon sa Football Association, simula noong 1994 ay marami na ang naitalang nasawi sa bansa dahil sa football related incidents.

 Sa ngayon, pinag-aaralan na ng football association kung ano ang dapat gawin para maiwasang maulit ang nangyari.

Patay sa airstrike ang 23 Kurdish militants sa pagitan ng Turkey at Iraq.

Ayon sa Turkish Defense Ministry, nagpalipad sila ng warplanes kung saan, 2019 pa nang simulan itong gawin ng mga militar para mapigilan ang anumang mga pag-atake sa cross border ng Turkey.

Nabatid na taong 1984 nang maglunsad din ng insurgency o pag-aalsa ang Kurdistan Workers Party (PKK) members kung saan, 40,000 ang nasawi sa kaguluhan kabilang na ang isang Turkish special forces officer.

Ayon kay Turkish Defense Minister Hulusi Akar, ang PKK ay itinuturing na isang teroristang grupo ng Turkey, Estados Unidos at European Union dahil sa pagsasagawa ng mga kaguluhan at mga pag-atake sa ibat-ibang mga bansa.

Umabot na sa 35 ang bilang ng mga nasawi habang 82 ang sugatan sa suicide bombing sa Kabul.

Ayon kay Khalid Zadran, spokeperson ng Taliban, naganap ang pagsabog ng bomba sa residente ng Shiite Muslim at minoryang komunidad ng Hazra.

Nakadamit bilang isang estudyante ang hinihinalang suicide bomber nang pumasok sa Kaaj Higher Educational Center sa Dashti barchi ng kabul noong Biyernes.

Gayunman, wala pa ring grupo ang umaako sa naganap na pag-atake sa Kabul. —sa panulat ni Jenn Patrolla

Tatlong katao ang patay, 15 ang nawawala at 14 ang sugatan matapos bumagsak ang isang tulay sa Brazil.

Batay sa ulat, bumigay ang tulay sa lungsod ng Careiro, 100 kilometro mula sa Maus, ang provincial capital.

Ang mga nasabing biktima ay sakay ng kanilang mga sasakyan nang bumigay ang naturang tulay.

Ayon sa mga saksi, ang naturang tulay ay may bitak na nagdulot ng matinding traffic bago mangyari ang naturang insidente.

Wala pa umanong pahayag ang kanilang gobyerno tungkol sa pangyayari.

Nakapagtala ang Switzerland ng pinaka mabilis na pagkatunaw ng glacier mula nang magsimula ang monitoring, makaraan ang mahigit isang siglo.

Batay sa pag-aaral ng Swiss Academy of Sciences, hindi bababa sa 3 cubic kilometers ng yelo ang nawala sa Alps.

Ito ay dahil sa mababang pag-ulan ng niyebe sa taglamig at patuloy na heat waves tuwing tag-araw.

Samantala, mababatid sa isinagawang pag-aaral na nasa 6% ng glacier ang nawala, at inaasahang mahigit 80% naman ang mawawala kung patuloy pang tataas ang greenhouse gas emissions. —sa panulat ni Hannah Oledan