INTERNATIONAL NEWS

Umakyat na sa 25 ang bilang ng mga nasawi sa pananalasa ng tropical storm Julia sa Central America, kung saan karamihan sa mga biktima ay mula sa El Salvador at Guatemala.

Ayon sa Salvadoran authorities, 10 indibidwal ang nasawi, kabilang ang limang sundalo, habang nasa 1,000 katao ang inilikas.

Walo ang nasawi sa Guatemala habang pito ang sugatan at daan-daang indibidwal ang naapektuhan.

Lima naman ang napaulat na namatay sa Honduras, kabilang ang 4-anyos na batang lalaki.

Kinumpirma naman ng emergency services ng Panama ang dalawang nasawi bunsod nang malalakas na pag-ulan, habang nasa 300 katao ang nananatili sa evacuation centers.

Noong linggo nang mag-landfall ang Bagyong Julia sa Caribbean Coast ng Nicaragua bago ito tumawid sa Pacific Ocean.

Niyanig ng magnitude 5.9 na lindol ang Taiwan.

Ayon sa Taiwan Weather Bureau, may lalim itong 17.9 kilometers o katumbas ng 11.1 miles.

Naramdaman ang lindol sa Northern, Central at Eastern parts ng Taiwan.

Wala namang napaulat na pinsala matapos ang naganap na pagyanig.

Muling nagpakawala ng dalawang ballistic missile ang North Korea na pang walong beses na sa kanilang pagpapalipad mula sa Pyongyang.

Sa pahayag ni Japan State Minister of Defense na si Toshiro Ino, bumagsak ang dalawang missile sa Exclusive Economic Zone ng kanilang bansa.

Ang inilunsad ng North Korea ay pinaniniwalaan na isang submarine-launched ballistic missiles kasunod ng tactical nuclear strike ng South Korea.

Sa ngayon, itinaas na ng Washington at mga kaalyado na Tokyo at Seoul ang kanilang alerto para sa pagpapaigting ng kanilang seguridad at masiguro ang kaligtasan ng bawat isa.

Patay ang 76 na indibidwal matapos tumaob ang isang bangka bunsod ng pagbaha dahil sa walang tigil na pag-ulan sa Anambra State, Nigeria.

Ayon sa mga otoridad, umapaw ang tubig sa Niger River dahilan para maapektuhan ng pagbaha ang 29 sa 36 na lugar sa nabanggit na bansa.

Napag-alaman na overloaded ang naturang bangka dahil sa sakay nitong 85 pasahero na ililikas sana mula sa kanilang mga tirahan.

Sa ngayon, nagsasagawa na ng emergency service sa lugar habang patuloy naman ang relief operation para sa mga apektado ng pagbaha.

Nabatid na mula nang magsimula ang tag-ulan, umabot na sa 200 milyong katao ang nasalanta ng pagbaha kung saan, 300 katao ang nasawi habang 100k naman ang nawalan ng tirahan.

13 katao patay habang 49 katao naman ang sugatan matapos ang panibagong missile strike ng Russia sa Zaporizhzhia, Ukraine.

Ayon sa mga otoridad, target sa naturang pag-atake ang Southern Ukrainian City, na itinuring ni President Volodymyr Zelensky na “absolute evil”.

Sinabi pa ni Zelensky na ang walang awang pag-atake sa mga Ukranian gayundin sa mga gusali’t tirahan ay kagagawan ng mga ganid at mga terorista.

Nabatid na nangyari ang insidente isang araw lamang matapos ang nangyaring pagsabog sa tulay na nagko-konekta sa Crimean Peninsula at Russia. —sa panulat ni Jenn Patrolla

Kinondena ng United Nations (UN) at ng Libyan Red Crescent ang pagkasawi ng 15 migranteng sakay ng isang barko sa baybaying dagat ng Sabratah, Libya.

Kasunod ito ng sagupaan sa pagitan ng rival trafficker o mga smuggler laban sa mga militar kasabay ng pagkasunog at pagkawasak ng nasabing barko sakay ang mga biktima.

Patuloy pang iniimbestigahan ang dahilan o motibo ng pagkasunog ng barko kung saan, nangako ang mga otoridad na kanilang ibibigay ang hustisya sa mga nasawi at pananagutin ang nasa likod ng insidente.

Ayon sa International Organization for Migration, mula nang magsimula ang taong 2022, umabot na sa 14,000 na migrante ang hinarang at pinabalik sa libya kung saan, 216 ang nasawi habang 724 pa ang nawawala at patuloy na pinaghahanap.

Patay ang 22 katao habang mahigit 50 naman ang sugatan matapos ang landslide na naganap sa Central Venezuela.

Natabunan ng putik at debris ang ilang mga kabahayan at mga establisyemento at nagtumbahan ang mga puno sa mga kalsada bunsod ng matinding pag-ulan.

Sinabi ni Interior at Justice Minister Remigio Ceballos Ichaso na libo-libong katao ang nagsanib-pwersa para sa ikinasang rescue efforts.

Nabatid na ang nangyaring landslide bunsod ng matinding pag-ulan, na nagdulot din ng pag-apaw ng ilog, ang pinakamalalang pag-ulan ngayong taon sa Venezuela.

Wala ng buhay nang matagpuan ang apat na miyembro ng pamilya kabilang ang isang walong buwang gulang na sanggol matapos dukutin ng armadong lalaki sa Merced, California sa USA.

Sa isang ulat, dinukot sa tanggapan ng kanilang trucking business ang mag-asawang sina Jasleen Kaur at Jasdeep Singh, maging ang kanilang anak na babae at ang kapatid ni Jesdeep na si Amandeep.

Nahagid sa CCTV footages ang pagdating ng suspek subalit nakatakip ng face mask ang mukha nito.

Sa isa pang video, unang inilabas ng salarin ang magkapatid na Singh na may tali ang mga kamay at saka isinakay sa pick-up truck saka isinunod ang pagkuha sa mag-ina.

Natunton ang mga labi ng biktima sa isang rural area.

Samantala, nasa kostudiya na ng pulisya ang suspek na kinilalang Jesus Manuel Salgado na ngayon ay nasa ospital matapos magtangkang magpakamatay.

Patuloy pang inaalam ng mga awtoridad kung may kasama si Salgado at ang motibo nito sa krimen. —sa panulat ni Maze Aliño – Dayundayon