INTERNATIONAL NEWS

Ipinatupad ni Uganda president Yoweri Museveni ang tatlong linggong lockdown sa dalawang distrito sa lugar dahil sa kumakalat na ebola virus.

Kabilang sa isasara ang mga simbahan, pamilihan, bar at restaurant sa Mubende at Kassanda.

Ipinagbawal din ni Museveni ang pagpasok at paglabas sa nasabing mga distrito.

Papayagan naman ang mga cargo trucks na pumasok at lumabas sa dalawang lugar pero ang lahat ng transportasyon ay suspendido.

Nabatid na nasa 58 kumpirmadong kaso ang naitala sa Uganda at 19 ang namatay.

Matatandaan noong 2019 nang huling nakapag-ulat ang Uganda ng nasawi sa naturang sakit.

Pumalo na sa 11 ang bilang ng mga nasawi sa lumubog na bangka sa Mekong River sa Cambodia.

Ayon sa mga otoridad, apat na indibidwal kabilang ang dalawang estudyante at dalawang crew ang nasagip matapos ang aksidente na naganap noong Huwebes.

Nitong Sabado nang matagpuan ang katawan ng 14- anyos na lalaki na unang napaulat na nawawala.

Paliwanag ng mga otoridad, overloading ang dahilan ng paglubog ng bangka at wala ring life jacket ang mga biktima.

Nakatakda namang kasuhan ang dalawang operators na nasugatan matapos ang aksidente.

Apat na preso ang nasawi habang 61 naman ang sugatan sa naganap na sunog sa isang bilangguan sa Iran.

Batay sa mga ulat, smoke inhalation ang ikinamatay ng mga biktima habang apat sa mga nasugatan ay nasa kritikal na kondisyon.

Ayon sa Iranian Authorities, sumiklab ang sunog sa Evin Prison sa Tehran kasunod ng Anti-government protests na naganap sa bansa.

Ngunit sinabi ng state media na walang kinalaman ang insidente sa nagpapatuloy na protesta sa Iran.

Sa pahayag naman ng Gobernador ng Tehran, nagkaroon ng riot sa isang bahagi ng bilangguan.

Nabatid na ilang Dual-National Iranians at Foreign citizens ang nakakulong sa Evin Prison dahil sa security-related charges.

Hindi bababa sa 12 katao ang nasawi sa naganap na pamamaril sa isang bar sa siyudad ng Irapuato sa Mexico.

Kabilang sa mga biktima ang anim na babae at anim na lalaki habang tatlo naman ang nasugatan sa insidente.

Nabatid na ito na ang ikalawang mass shooting sa Central State ng Guanajuato ngayong buwan.

Sa ngayon ay hindi pa malinaw ang pagkakakilanlan ng mga biktima at kung ilan ang sangkot sa pamamaril.

Nagpapatuloy ang imbestigasyon ng mga otoridad sa insidente na pinaniniwalaang may kaugnayan sa drug cartels.

Aabot sa 25 indibidwal ang nasawi habang 20 ang sugatan sa naganap na pagsabog ng Coal mine sa Turkey.

Naganap ang pagsabog sa state-owned TTK Amasra Muessese Mudurlugu mine sa Amasra.

Ayon kay Energy Minister Faith Donmez, batay sa preliminary Assessment, sinasabing firedamp ang naging sanhi ng explosion.

Ilang Rescue Team ang ipinadala sa lugar, kabilang ang mga kalapit na probinsya.

Sinabi naman ni Pangulong Recep Tayyip Erdogan na kinansela nito ang isang nakaplanong pagbisita sa timog-silangang lungsod ng Diyarbakir at sa halip ay maglalakbay sa Amasra upang i-coordinate ang rescue operation. —sa panulat ni Hannah Oledan

Labing-apat patay habang isang katao nawawala matapos lumubog ang overloaded na ferry sa Mekong River ng Cambodia.

Ayon sa mga otoridad, sanhi ito ng pag-overload ng ferry at walang mga life jacket ang mga pasaherong estudyante.

Nasa 11 hanggang 14 na taong gulang ang mga biktima habang dalawang estudyante at dalawang operator ang nakaligtas sa insidente.

Nagpahayag naman ng pakikiramay ang Punong Ministro Hun Sen at inatasan ang otoridad na tulungan ang mga pamilya ng mga biktima. —sa panulat ni Jenn Patrolla