INTERNATIONAL NEWS

Isang pulis ang nasawi matapos pagsasaksakin sa Belgium.

Nangyari ang insidente sa train station sa Brussels.

Agad namang dinala ito sa pinakamalapit na ospital.

Samantala, inaalam pa ng mga kapulisan ang motibo sa pananaksak

Tuloy-tuloy ang pagkalat ng Ebola virus sa Uganda.

Ito’y dahil wala pa ring bakuna o panlaban sa naturang sakit.

Ang strain ng Ebola ay mayroong mortality rate na 41% hanggang 100% na sanhi ng Sudan virus.

Bago ang nasabing outbreak ng Ebola, huling nadiskubre ang Sudan virus sa Uganda noong 2012.

Kahit na nakapaglabas na ang ilang eksperto ng bakuna laban sa Ebola, hindi ito tumatalab sa Sudan virus na mas malakas ang epekto sa katawan ng isang tao.

Samantala, isinailalim na sa lockdown ang ilang lugar sa bansa upang mapabagal ang pagkalat ng nasabing virus.

Hindi dadalo nang personal si Russian President Vladimir Putin sa isang pagtitipon ng mga pinuno mula sa group of 20 sa Bali, Indonesia sa susunod na linggo.

Sa halip si Russian Foreign Minister Sergey Lavrov ang kakatawan dito.

Sinabi ni Yulia Tomskaya, Chief of Protocol ng Russian Embassy sa Indonesia na pinag-iisipan pa ni Putin kung dadalo ito virtually.

Gayunman, ang desisyon ni Putin na hindi dumalo nang personal ay magliligtas dito na ma-kompronta ng mga pinuno ng naturang summit kaugnay sa pagsalakay ng Russia sa Ukraine.

Ang G20 ay binubuo ng 19 na bansa at ng European Union (EU) kung saan ang mga ito ay nagtitipon-tipon upang pag-usapan ang mga krisis na kinahaharap sa ekonomiya.

Nagbitiw na sa pwesto si Gavi Williamson bilang Government Minister ng United Kingdom dahil sa alegasyon ng pambu-bully.

Inakusahan si Williamson ng pambu-bully sa isang Senior Civil Servant bilang Defense Secretary at pagpapadala ng mapang-abusong mensahe sa isang kapwa Tory MP o Conservative party member noong Oktubre.

Pinabulaanan naman ito ni Williamson ngunit aniya, ang mga paratang ay naging isang distraction sa kanyang panunungkulan sa gobyerno.

Sa kanyang resignation letter, ipinabatid ni Williamson ang kalungkutan sa ginawang pagbaba sa pwesto.

Gayunpaman, buo naman aniya ang kanyang suporta para kay Prime Minister Rishi Sunak. - sa panulat ni Hannah Oledan

Pina-atras na ni Russian Defense Minister Sergei Shoigu ang mga sundalo nito sa pag-atake sa lungsod ng Kherson sa Ukraine.

Sinabi ng commander ng Russia na nasa ukraine na si Sergei Surovikin na isa ito sa mahirap na desisyon at itinuturing na major retreat o potential turning point sa giyera sa pagitan ng dalawang bansa.

Pinatitiyak din Shoigu na ligtas na mapu-pullout ang lahat ng mga kagamitan ng mga sundalo sa pagtawid sa DNIPRO river

Hindi naman kampante ang ukraine sa balitang ito dahil may ilan pa ring mga Russian forces ang nananatili sa Kherson.

Nabatid na ang naturang kabisera ang tanging regional capital na napasakamay ng Russia mula ng maglunsad ng special military operations noong Pebrero.

 Bawal na ring magtungo sa mga amusement parks ang mga kababaihan sa Afghanistan.

Ito ay matapos lalong maghigpit ng panuntunan ang Taliban na nagbalik sa kapangyarihan noong Agosto 2021.

Ang tagapagsalita mismo ng ministry for the Propagation of Virtue and Prevention of Vice ng Afghanistan ang nagkumpirma ng batas.

Maliban sa mga amusement parks, sakop din ng direktiba ang mga open spaces at pampublikong paliguan.

Nagpapatuloy pa ang bilangan ng boto kaugnay sa 2022 midterm election sa US.

Sa datos hanggang kaninang alas-onse:bente singko ng umaga (oras sa Pilipinas), nangunguna ang Republican party sa US Senate na nakakuha ng 49 seats habang ang Democratic party ay may 48 seats.

Nakakuha rin ang Republican party ng mataas na bilang ng boto sa House of Representatives na may 208 seats habang 189 seats naman sa Democratic party.

Nabatid na ang naturang election ay isinagawa noong November 8, 2022, kung saan nasa 35 seats mula sa 100 seats sa senate at 435 seats sa House of Representatives ang pinaglalabanan.