INTERNATIONAL NEWS

Niyanig ng magnitude 5.3 na lindol ang Western Texas.

Ayon sa European Mediterranean Seismological Centre (EMSC), natunton ito sa layong 45 kilometro mula sa bayan ng Pecos.

May lalim ang lindol na dalawang kilometro o katumbas ng 1.24 miles.

Sa ngayon ay wala pang inilalabas na ibang impormasyon ang mga otoridad kaugnay sa malakas na pagyanig.

Niyanig ng magnitude 6 na lindol ang Southwest Indonesia kagabi.

Ayon sa European-Mediterranean Seismological Centre (EMSC), naitala ang pagyanig sa Indonesian island ng Sumatra na may lalim na 10 kilometers o 6.2 miles.

Sa ngayon, inaalam pa ng mga otoridad kung mayroong naitalang nasawi o nasugatan matapos ang pagyanig.

Pormal nang naghain ng kandidatura para sa pagka-Pangulo sa 2024 si dating US President Donald Trump.

Ito ay matapos kumpirmahin noong linggo ng longtime advisor ni Trump ang desisyon ng dating presidente, na ilalabas ngayong araw, oras sa Pilipinas.

Ang aide ni Trump na si Bradley Crate ang naghain ng paperworks sa U.S. Federal Election Commission para sa pagbuo ng komite na binansagang “Donald J. Trump for President 2024.”

Dahil sa desisyong ito, posibleng maging kalaban muli ni Trump sa pwesto si Democratic President Joe Biden.

Sa ngayon, nagpapatuloy pa rin ang bilangan ng boto sa U.S para sa 2022 midterm election.

Nasawi ang dalawang katao matapos tumama ang dalawang Russian missile sa Poland.

Dahil dito, nagsagawa ng pagpupulong si Polish Prime Minister Mateusz Morawiecki.

Beneberipika pa ng bansang Poland kung aksidente ang nangyari o sinadya ang pag-atake.

Samantala, ang Poland ay miyembro ng North Atlantic Treaty Organization (NATO).

Nakasaad sa Article 5 ng NATO na ang pagatake sa isang miyembro ay pag-atake sa lahat. —sa panulat ni Jenn Patrolla

Nanawagan si Indonesian President Joko Widodo sa mga lider ng G20 na tapusin na ang digmaan sa pagitan ng Russia at Ukraine.

Ayon kay Widodo, na wala ng ibang opsyon kundi kailangan ng magtulungan ang mga bansa upang mailigtas ang mundo.

Ang G20 anya ang dapat maging dahilan para sa pag-angat muli ng ekonomiya.

Samantala, sa pamamagitan ng video link sa summit, nagbigay din ng pahayag si Ukrainian President Volodymyr Zelenskyy, na maging co-creator ng kapayapaan at wakasan din ang agresibo na digmaan ng Russia.

Sinabi pa ni Zelenskyy, kumbinsido siyang wakasan ang alitan ng dalawang bansa. —sa panulat ni Jenn Patrolla

Nanawagan ng tulong sa United States ang Ukraine para sa dagdag na suplay ng kanilang kagamitan bilang paghahanda sa mas pinalakas o makapangyarihang Drones at Anti-drone na kanilang magagamit laban sa Russia.

Kasunod ito ng kumakalat din na Kamikaze-drones na ipinalipad ng Russia para sa pag atake sa Ukraine partikular na sa mga sibilyan at imprastraktura.

Sa liham na ipinadala ni Ukrainian Defense Minister Oleksii Reznikov, kaniyang hiniling ang apat na MQ-1C Gray Eagle Unmanned Aerial Systems o Drones, maging ang kauna-unahang pagkakataon ng Counter-Drone Missile na nagkakahalaga umano ng $10M.

Ang nasabing panawagan ay malaki umanong tulong para mapalakas ang Civilian Air Defense ng Ukraine para ma-counter ang tumataas na paggamit ng Russia ng Iranian-Made Kamikaze Drones.