INTERNATIONAL NEWS

Nasa 6M kabahayan pa rin ang apektado ng pagkawala ng kuryente, dalawang araw matapos ang mga target na welga ng Russia sa imprastraktura ng enerhiya ng Ukraine.

Ito ang inihayag ni Ukraine President Volodymyr Zelensky.

Sinabi ni Zelensky na humigit-kumulang 600,000 subscriber ang nakararanas ng pagkawala ng kuryente sa kabisera ng Kyiv kasama na ang mga rehiyon ng Odessa, Lviv Vinnytsia at Dnipropetrovsk na kabilang din sa mga pinakamalubhang naapektuhan.

Ang sistematiko at naka-target na pag-atake ng Russia nitong mga nakaraang linggo ay nagpaluhod sa imprastraktura ng enerhiya ng Ukraine habang papalapit ang taglamig, na nag-uudyok ng mga takot sa isang krisis sa kalusugan at isang karagdagang pag-alis mula sa bansang nasalanta ng digmaan. —sa panulat ni Hannah Oledan

Nasawi ang tatlong indibidwal kabilang rito ang isang batang babae habang 11 naman ang sugatan sa naganap na twin school shooting sa Brazil.

Ayon kay Aracruz Town Mayor Lios Carlos Coutinho, umatake ang grupo ng kriminal sa isang eskwelahan na ikinasawi ng dalawang katao at siyam ang nasugatan.

Matapos ang ginawang pamamaril ay lumipat ang mga ito sa isa pang eskwelahan at binaril ang isang babae na ikinasawi nito habang dalawa naman ang sugatan. —sa panulat ni Hannah Oledan

Aprubado na ng Russian Congress sa huling pagbasa ang panukalang nagbabawal sa anumang uri ng lesbian, gay bisexual, transgender, queer (LGBTQ) agenda.

Ito’y dahil nais isulong ni Russian President Vladimir Putin na ang kanyang bansa ay taliwas sa Western liberal values.

Kabilang sa mga nakasaad sa panukalang batas ang pagbabawal sa pagbabago ng kasarian at paglalabas sa mga advertisement, libro, media at sinehan ng mga may kaugnayan sa LGBTQ.

Ang mga lumalabag ay mahaharap sa mabigat na multa na hanggang $165,000. —sa panulat ni Hannah Oledan

Sumampa na sa 271 ang bilang ng mga nasawi sa tumamang magnitude 5.6 na lindol sa West Java, Indonesia.

Batay sa pinakahuling datos ng mga otoridad, karamihan sa mga nasawing biktima ay pawang mga bata habang patuloy na pinaghahanap ang 40 indibidwal.

Ayon sa National Disaster Mitigation Agency, 22,000 kabahayan ang napinsala habang mahigit 58,000 katao ang naapektuhan ng malakas na lindol.

Sinabi naman ng Save the Children na nasa 80 mga paaralan ang nagtamo ng pinsala.

Samantala, nagpapatuloy ang ikinasang rescue operations ng mga otoridad at nangako naman si Indonesian President Joko Widodo na tutulungan ang mga naapektuhang komunidad.

Tuloy na ang pulong ng United Nations Security Council at ni Ukrainian President Volodymyr Zelensky.

Kaugnay ito sa apela ni Zelensky sa UN na tutukan nito ang patuloy na pagpapakawala ng missile ng Russia sa ilang kabahayan sa Kyiv kung saan 10 katao na ang nasawi.

Iginiit ni Zelensky na patuloy ang isinasagawang terorismo ng Russia na idinadamay maging ang mga sibilyan.

Bukod sa mga nasawi, nagdulot din nang pagkawala ng power supply ang nasabing pagpapaulan ng missile.

Muling kakandidato sa eleksiyon si US Vice President Kamala Harris.

Matatandaang sa naging pagbisita ni Harris sa Pilipinas, kaniyang inihayag na kaniyang ipagpapatuloy ang mataas na posisyon sa Estados Unidos kung tatakbo bilang re-eleksyunista si US President Joe Biden sa 2024.

Sinabi pa ni Harris na hindi matatawaran ang nagawa na nilang trabaho ni US President Biden sa nakalipas na dalawang taon.