INTERNATIONAL NEWS

Target ni North Korean leader Kim Jong Un na makapagpatayo ng anito’y pinakamalakas na nuclear missile.

Dahil dito, ipinabatid ni Kim ang pagsasagawa nila ng unang test fire ng makabagong uri ng Intercontinental Ballistic Missiles (ICBM) nitong nakalipas na November 18.

Gamit sa nasabing test fire ang isang Hwaseong-17 na isang malaking rocket na mayroong kapasidad na magdala ng mga nuclear warhead at aabot ng hanggang Amerika.

Una nang pinuri ni Kim ang mga gumawa ng aniya’y kakaibang uri ng ballistic missiles.

Nagbabala si Ukrainian President Volodymyr Zelensky ng mas marami pang missile attack ng Russia laban sa kanilang bansa.

Dahil dito, mahigpit na inalerto ni Zelensky ang kanilang defense forces at mga mamamayan para makapaghanda at magtagumpay sa inaasahang pag atake ng Russia.

Nababalot na ngayon ng snow at patuloy ang mababang temperatura partikular sa Kyiv na hindi pa nakakaagapay sa mga danyos na resulta ng Russian air strikes.

Ipinabatid ni Zelensky na mas magiging masalimuot pa ang linggong ito dahl hindi kakalma ang Russia hanggang mayruon pa silang missiles.

Una nang naapektuhan ang electricity infrastructure ng Ukraine sa mga pag atake ng Russia simula nuong Pebrero, dahilan kaya’t nakakaranas ng matinding kawalan ng power supply ang Ukrainians.

Wala pa namang reaksyon ang Moscow hinggil sa nasabing pagbubunyag ni Zelensky.

Limang indibidwal ang nasawi sa pagbagsak ng isang helicopter malapit sa isang Buddhist Temple sa Yangyang, South Korea.

Kabilang sa nasawi ang 71 taong gulang na piloto at 54 na taong gulang na mekaniko.

Ang nasabing helicopter ay gawa ng U.S. Helicopter manufacturer na Sikorsky.

Nagkapira-piraso ang bahagi nito at kalauna’y nagliyab na agad namang naapula ng mga otoridad kaya’t hindi na ito kumalat pa sa nasabing lugar.

Inatasan naman ni Prime Minister Han Duck-Soo ang Korea Forest Service at ang local authorities na pangasiwaan ito ng maayos at tiyakin ang pagbibigay ng tulong sa pamilya ng mga nasawing biktima.

Umakyat na sa 321 ang death toll sa magnitude 5.6 na lindol na tumama sa West Java Province, Indonesia.

Ayon kay Disaster Mitigation Agency chief Suharyanto, tatlong bangkay ang natagpuan ng mga rescuer nitong linggo at walo naman noong Sabado habang patuloy na pinaghahanap ang 11 indibidwal na nawawala.

Umabot naman sa mahigit 62,000 na kabahayan ang nagtamo ng sira at mahigit 73,000 katao ang naapektuhan ng malakas na pagyanig.

Sinabi ng West Java Search and Rescue Agency na magpapatuloy ngayong araw ang rescue operations kung saan tututukan ang mga lugar kung saan pinaniniwalaang naroroon ang mga nawawalang indibidwal.

Nakatakda namang talakayin ng mga otoridad sa susunod na linggo kung palalawigin pa ang emergency response period.

Aabot sa walong katao ang kumpirmadong nasawi sa nangyaring landslide sa Island of Ischia, sa Italy.

Ayon kay Infrastructure Minister at Deputy Prime Minister Matteo Salvini, resulta ito ng matinding sama ng panahon o malalakas na pag-ulan na kanilang naranasan doon.

Maliban sa walong binawian ng buhay, 13 pang katao ang patuloy na pinaghahanap ng mga otoridad.

Kabilang sa mga idineklarang Missing ang isang mag-asawa at kanilang bagong silang na sanggol na pawang naninirahan malapit sa lugar na pinagsimulan ng landslide.