INTERNATIONAL NEWS

Pumalo na sa 33 ang bilang ng mga nasawi matapos matabunan ng lupa ang kanilang sinasakyang bus dahil sa landslide sa Colombia.

Kinumpirma ito ni Interior Minister Alfonso Prada, kung saan kabilang sa mga namatay ang tatlong menor de edad.

Sinabi naman ni Pueblo Rico Mayor Leonardo Fabio Siagama na dinala ang mga narekober na bangkay sa covered stadium ng bayan.

Nabatid na ang landslide ay bunsod ng malalakas na pag-ulang tumama sa bayan ng Pueblo Rico at Santa Cecilia sa Risaralda Province.

Samantala, nagpaabot naman ng pakikiramay sa pamilya ng mga biktima si Colombian President Gustavo Petro.

Itinaas ng bansang Ukraine ang alert level na higpitan ang seguridad sa kanilang embahada at konsulada na nasa ibang bansa.

Ito’y matapos makatanggap ng pagbabanta sa pamamagitan ng sulat kabilang ang bomba at bandalismo.

Kamakailan, nakatanggap ng package na may laman na parte ng hayop ang embahada ng Ukraine sa mga bansang Hungary, Netherlands, Poland, Croatia, Italy, Austria at ibang mga konsulada.

Magugunitang sugatan ang isang empleyado ng Ukraine Embassy sa Madrid matapos makatanggap ng mga sulat na may laman na bomba.

Kasalukuyang wala pa ring naitatalang grupo na nasa likod ng pagbabanta at pagpapadala. - sa panunulat ni Jenn Patrolla 

Patay ang isang Pulis habang 30 sibilyan ang sugatan sa naganap na pagsabog sa isang sasakyan sa Narathiwat, Southern Thailand.

Ayon sa mga otoridad, sinusuri pa ng pulisya ang footage ng security camera upang matukoy ang suspek.

May posibilidad pa anya na tumaas ang bilang ng mga sugatan dahil nililinis pa rin ang naturang lugar.

Sa ngayon, patuloy ang imbestigasyon ng mga otoridad hinggil sa insidenteng pagsabog. - sa panunulat ni Jenn Patrolla

Ibinida ng Amerika ang makabago nitong B-21 stealth bomber.

Ang stealth bomber na nagkakahalagang $700-m ay may kakayahang magdala ng nuclear at conventional weapons.

Kaya rin nitong lumipad na walang sakay na piloto.

Papalitan nito ang B-1 at B-2 Aircraft na ginamit pa noong Cold War.

Sinasabi rin ni US Air Force spokesperson Ann Stefanek na ang B-21 ay magiging kaagapay ng kanilang Army sa mga makabagong bomber na magtatanggol sa Amerika at mga kaalyadong bansa nito.

Kaugnay nito, inaasahan na sa unang bahagi ng susunod na taon ay lilipad na ito at pinaplano rin US Air Force na bumili ng nasa 100 piraso nito.

Ikinagalit ng China ang ginawang pagbisita sa Taiwan ng isang mambabatas mula sa United Kingdom.

Ito ay dahil sa ginawang pakikipagpulong ni Alicia Kearns, miyembro ng British Parliament, kay Taiwanese Foreign Minister Joseph Wu.

Inakusahanng China ang UK na nakikialam sa affairs nila ng Taiwan na itinuturing pang probinsya ng nauna.

Mababatid na nitong Agosto ay ikinagalit din ng China ang ginawang pagbisita ni US Speaker of the House Nancy Pelosi sa Taiwan. —sa panulat ni Hannah Oledan

Pumalo na sa 11 ang bilang ng nasawi mula sa naganap na landslide sa Ischia, Italy.

Ito’y matapos matagpuan ang tatlo pang labi ng isang 38 anyos na babae, dalawang lalake na edad 38 at 31 ang nakita at nakilala.

Sa ngayon ay isang indibidwal na lamang ang pinaghahanap habang tatlong bata kabilang ang isang sanggol ang kabilang sa kumpirmadong biktima.  – sa panulat ni Hannah Oledan

6 na katao ang nasawi habang 15 ang sugatan matapos ang salpukan ng 2 sasakyan sa India.

Ayon sa Utar Pradesh State Road Trasport Corporation, papunta sa Bahraich ang bus mula sa lucknow nang bumangga ito sa isang truck malapit sa Tappesipah village at Jarwal road.

Agad namang isinugod sa pinakamalapit na ospital ang mga sugatan.

Samantala, patuloy ang imbestigasyon ng mga otoridad sa naturang insidente.