INTERNATIONAL NEWS

Tila hindi tatantanan ng Russia ang Ukraine.

Kasunod na rin ito ng pahayag ni Russian President Vladimir Putin na patuloy nilang pababagsakin ang energy grid ng Ukraine sa kabila ng mga sistematikong pag-atake na nag resulta sa milyun-milyong pagkasira ng mga imprastruktura.

Sinisisi rin ni Putin ang Ukraine sa pagsisimula ng anito’y isang trend nang pag-atake sa mga imprastruktura ng sibilyan tulad ng pagsabog sa isang pangunahing tulay sa pagitan ng mainland ng Russia at Annexed Crimean Peninsula na una niyang binisita.

Ang ilang linggong pag-atake ng missile ng Russia sa buong Ukraine ay nakaapekto na sa mga pangunahing imprastruktura sa nasabing bansa gayundin sa supply ng tubig at iba pang pangangailangan ng mga ito.

Tatlong indibidwal ang nasawi sa naganap na sunog sa isang bahay sa Schuylkill County, Pennsylvania.

Ayon sa Pennsylvania State Police, namatay ang dalawang bumbero na rumeresponde lamang sa sunog habang isang katawan naman ng lalaki ang natagpuan sa labas ng naturang bahay.

Wala namang inilabas na impormasyon ang mga otoridad kaugnay sa kung ano ang ikinasawi ng nasabing lalaki.

Sa ngayon ay patuloy pang inaalam ng mga otoridad ang pinagmulan ng sunog.

Nahatulang guilty sa kasong katiwalian si dating Guatemalan President Otto Perez.

Nasintensyahan si Perez ng 16 na taon sa bilangguan.

Nahatulan ding guilty ang noong vice president nito na si Roxana Baldetti dahil sa kaparehong kaso.

Taong 2015 nang mapilitang magbitiw sa pwesto sina Perez at Baldetti.

Kinasuhan naman si Perez noong 2017 nang akusahan itong mastermind ng malawakang customs fraud. – sa panulat ni Hannah Oledan

Inihayag ng gobyerno sa Iran na kanila nang sisimulan ang pagbitay sa mga magsasagawa at masasangkot sa mga rally at iba pang aktibidad.

Kasunod ito ng malakihang kilos protesta matapos ang pagkamatay ng isang babae na hinuli ng mga morality police dahil umano sa hindi pagsusuot o maling pagsusuot ng hijab.

Matatandaang hinatulan si Mohsen Shekari ng revolutionary court kung saan, umapela ito ngunit hindi pinagbigyan ng supreme court na nagresulta naman sa kaniyang kamatayan.

Umabot sa 475 katao ang nagprotesta sa pagkamatay ni Shekari habang nasa 18,240 naman ang naaresto ng mga otoridad.

Ayon sa Iranian government, maaari pang masundan ang pagbitay sa mga raliyista kung saan, sampu na ang kasalukuyang nililitis matapos umanong magkasala sa Diyos.

Hinirang ng Time magazine si Ukranian President Volodymyr Zelensky gayundin ang spirit of Ukraine” bilang 2022 ‘person of the Year.

Ayon sa Time, naging inspirasyon ng mga Ukranian si Zelensky at nakilala sa buong mundo dahil sa tapang na ipinamalas nito sa harap ng pananakop ng Russia.

Sinabi pa ng naturang magazine na ang ”Spirit of Ukraine” ay sumasalamin naman sa mga Ukrainian sa iba’t ibang panig ng mundo na tahimik na nakikipaglaban para sa kanilang bansa.

Ang nasabing award ay ipinagkakaloob sa mga kaganapan o indibidwal na may pinakamalaking impluwensya sa mga nangyayari sa buong mundo sa nakalipas na labindalawang buwan.

Samantala, pinangalanan naman bilang 2022 Heroes of the Year ang mga kababaihan sa Iran.

Hinatulan ng New York jury ng kasong fraud ang family business ni dating US President Donald Trump.

Ayon sa prosecutor na si Manhattan District Attorney Alvin Bragg, ang kumpaniya ng dating pangulo kabilang na ang Trump organization at separate entity na Trump payroll ay kinasuhan ng guilty on all counts dahil sa pagiging sakim at pandaraya nito.

Ang nabanggit na kumpaniya ay pinatatakbo umano ng mga anak ni trump na sina Eric at Donald Jr. kung saan, tinago ng mga ito ang kompensasyon na ipinambayad sa mga top consecutives ng kompanya sa pagitan ng taong 2005 hanggang 2021.

Nabatid na ito ang unang beses na kinasuhan ang kumpaniya ni Trump na plano muling tumakbo bilang presidente ng Amerika sa darating na eleksyon.

Inakusahan na ang suspek sa pagpatay ng lima katao sa loob ng LGTBQ Nightclub sa Colorado, USA.

 Kinilala ang suspek na si Anderson Lee Aldrich, 22 anyos, kung saan dumalo sa pagdinig ng kaso nito sa El Paso District Court.

 Sinampahan na ng kasong murder, hate crimes at assaults si Aldrich.

 Wala namang piyansa ang inilaan laban sa suspek.

 Matatandaang pumasok ang suspek na armado at walang awang pinagbabaril ang mga tao sa loob ng club. –  sa panulat ni Jenn Patrolla