INTERNATIONAL NEWS

Naitala ang Mexico bilang bansa na mayroong pinakamaraming journalist o mamamahayag na namatay ngayong kasalukuyang taon.

Ito ang inihayag ng media watchdog Reporters Without Borders (RSF) kasabay ng ulat ng kidnapping, assault at pagkaaresto ng mga mediamen.

Iniulat ng RSF na 11 pagpatay sa mga media professionals sa bansang Latin America mula Enero hanggang Disyembre 1, o halos 20% ng global total.

Sa kabilang banda, naitala ng RSF ang nasa 49 media workers na nawawala habang nasa 65 naman ang nadakip sa buong mundo. –  sa panulat ni Hannah Oledan

Hindi bababa sa 120 indibidwal ang nasawi dahil sa pagbaha at landslide sa Kinshasa, Democratic Republic of Congo.

Ayon kay Prime Minister Jean-Michel Sama Lukonde, nagpapatuloy ang kanilang search operations kaya’t posible pang madagdagan ang death toll.

Nagdeklara naman si President Félix Tshisekedi ng tatlong araw na pagluluksa para sa mga biktima at sinabing agad siyang aalis sa Estados Unidos pagkatapos ng kanilang pulong ni US President Joe Biden.

Nabatid na aabot sa 12 milyong katao na naninirahan malapit sa Kinshasa ang naapektuhan ng pagbaha.

Patay ang pitong indibidwal sa tumitinding kilos protesta sa Lima, Peru, sa loob lamang ng isang araw.

 Ito’y matapos manawagan ang mga protestante ng ‘general elections’.

 Nakaraang linggo, nanumpa na si Pangulong Dina Boluarte bilang pangulo ng Peru matapos sibakin ng kongreso ang dating pangulo na si Pedro Castillo.

 Inaresto si Castillo dahil sa pagtatangkang buwagin ang lehislatura upang mapigilan ang impeachment vote laban sa kanya. –  sa panulat ni Jenn Patrolla

Aabot sa mahigit 300,00 mga manok ang nasawi matapos ang bird flu outbreak sa scotland.

Ayon sa Scotland government, nakararanas ngayon ang kanilang bansa ng serious avian influenza kaya mahigpit nilang binabantayan ang mga poultry sa ibat-ibang lugar sa kanilang bansa.

Nagsasagawa narin sila ng biosecurity para maprotektahan ang domestic poultry kung saan, nanawagan narin sila ng tulong sa mga stakeholders hinggil sa naturang hakbang.

Nabatid na ang paglala ng bird flu outbreak sa Scotland ang ito kauna-unahang naitala sa buong bahagi ng UK.

Humirit si Ukraine President Volodymyr Zelensky sa group of 7(G7)nation na tulungan silang mabigyan ng gas at mga armas.

Sa isang video conference, sinabi ni Zelensky na nangangailangan sila ng 2 billion cubic meters ng gas upang maibsan ang tag-lamig sa lugar.

Hinimok din niya ang G7 na magpadala ng mga armas tulad ng mga modernong tangke, rocket artillery at long-range missiles.

Giit ni Zelensky na nakikita niyang hindi aatras ang Russia dahil desidido itong sakupin ang buong Ukraine.

Nabatid na maraming bansa ang nagbigay ng tulong pinansyal at armas sa Ukraine para labanan ang Russia.

Tatlong indibidwal ang nasawi habang isa naman ang nasa kritikal na kondisyon matapos ang naganap na pamamaril sa Chicago.
Kabilang sa mga biktima ang isang 50-anyos at 26-anyos na lalaki at isang 24-anyos na babae.
Ayon sa Chicago police, nag-ugat ang pamamaril sa away sa loob ng isang bar.
Agad namang tumakas ang suspek sakay ng isang SUV.
Sa ngayon ay nagpapatuloy ang imbestigasyon ng awtoridad sa insidente habang pinaghahanap ang naturang gunman

Nasawi ang anim na katao habang 17 sugatan matapos umatake ang Afghan Taliban force sa Chaman, Pakistan.

Ayon sa awtoridad, kinondena ng Pakistan military ang pag-atake ng nasabing grupo sa nabanggit na bansa.

Gumanti naman anya ang puwersa ng Pakistan at isang sundalong Afghan ang napatay.

Isa rin sa tinitignang dahilan nang patigilin ng Pakistan ang Afghan forces ang pagpapatayo ng border sa kanilang panig.

Kasalukuyan, hindi pa matukoy ang dahilan ng sagupaan sa dalawang grupo. —mula sa panulat ni Jenn Patrolla