INTERNATIONAL NEWS

Naghahanda na ang gobyerno at mga ahensya sa Thailand sa posibleng pagdagsa ng chinese tourist sa kanilang bansa.

Kasunod ito ng pagluluwag ng restriksiyon sa Beijing, China Matapos ang muling pagsirit ng kaso ng Covid-19.

Dahil dito, hinihikayat ng Tourism Authority ng Thailand ang mga business operator na tiyaking makatatanggap ng Covid-19 booster shot ang lahat ng kanilang staff lalo na ang mga hotel receptionist, driver at tour guides na posibleng maging close contact ng mga nasabing turista.

Kailangan din na istriktong sumunod sa safety and health administration standard ang mga hotel, restaurant at tour operators laban sa nakahahawang sakit.

Muling niyanig ng magnitude 5.4 na lindol ang Northern California sa gitna ng pagdiriwang ng bagong taon.

Namataan ang lindol, 30 milya ang layo sa timog bahagi ng baybayin ng Eureka Valley sa pagitan ng San Francisco at Portland Oregon habang 15 kilometro naman ang lapit nito sa Rio Dell California.

Batay sa report ng US Geological Survey, walang naitalang bilang ng mga nasawi o nasugatan pero nasira ang ilang mga kalsada at tulay sa lugar.

Matatandaang unang naitala ang magnitude 6.4 na lindol dalawang linggo bago naitala ang panibagong pagyanig sa nabanggit na lugar.

Nagsasagawa na ngayon ng operasyon ang mga otoridad matapos ang insidente.

Hindi bababa sa 15 turista ang nasawi matapos bumaliktad ang kanilang sinasakyang bus sa Mexico.

Ayon sa mga otoridad, kabilang sa mga biktima ang apat na mga bata habang 47 na indibidwal ang patuloy na ginagamot sa ospital dahil sa tinamong mga sugat matapos ang aksidente.

Nabatid na pabalik na sana ang mga biyahero mula sa Guayabitos, na isang beach town sa bahagi ng Puerto Vallarta.

Patuloy naman ang imbestigasyon ng mga otoridad sa insidente.

Siyam na indibidwal ang nasawi sa naganap na stampede sa Uganda kasabay ng pagsalubong sa bagong taon.

Nangyari ang insidente sa labas ng Freedom City Mall sa Kampala, na nagsilbing host ng event kung saan, hinimok ng Master of Ceremonies ang mga tao na lumabas upang panoorin ang fireworks display.

Ayon sa Kampala Police Spokesman Patrick Onyango, pawang edad 10, 11, 14 at 20 ang mga nasawing biktima, kung saan apat sa mga ito ay nasawi dahil sa suffocation.

Ilang indibidwal naman ang napaulat na nasugatan matapos ang naturang insidente ngunit patuloy pang inaalam ng mga otoridad ang eksaktong bilang ng mga ito.

Itinuturong dahilan sa trahedya ang ”Rash” acts gayundin ang pagkakaroon ng kapabayaan ngunit nagpapatuloy pa ang imbestigasyon ng Ugandan Police sa naganap na stampede.

Imamandato ng pamahalaan ng Canada ang pagpapakita ng negatibong resulta ng Covid-19 test sa mga pupunta sa  kanilang bansa mula China.

Gaya ito nang naunang ibinabang patakaran din ng gobyerno ng estados unidos at ng iba pang mga bansa bilang pag-iingat sa pagkalat ng Covid-19 bunsod ng mabilis na pagtaas ng kaso ng virus sa China

Kung saan kailangang hindi hihigit sa dalawang araw ang naturang pagsusuri bago umalis kasama ang kanilang boarding pass.

Magsisimula ang implementasyon ng naturang patakaran simula sa ika-5 ng Enero na muling susuriin pagkatapos ng 30 araw.

Pumalo na sa 61 ang death toll sa matinding winter storm sa Amerika.

Karamihan sa mga nasawi ay naitala sa Erie County kabilang ang siyudad ng Buffalo.

Dahil sa pagtaas ng temperatura sa lugar, nangangamba ang mga opisyal sa New York, sa posibleng pagbaha.

Nagdulot naman ang kalamidad ng labis na pagbaba ng temperatura sa ilang lugar kabilang ang Texas at Florida at pagkaantala ng libu-libong flights.