SPECIAL REPORTS

Sa likod ng isang matagumpay na istorya sa bawat karera, ay may isang guro na naging bahagi ng kwento ng pag-asa, pagkalugmok at muling pagbangon.

Kung hindi mo pa napapasalamatan si ‘teacher’ na naging bahagi ng iyong pagkatao ngayon, hindi pa huli ang lahat, ito na ang pagkakataon.

Sa pamamagitan ng Proclamation No. 242 na nilagdaan ni dating pangulong Benigno Aquino III noong ika-24 ng Agosto taong 2011, ay mga guro naman ang sesentro sa entablado.

Taunang ipinagdiriwang ang National Teachers’ Month mula ika-5 ng Setyembre hangang ika-5 ng Oktubre na iprinoklama namang World Teachers’ Day.

Binibigyang-halaga rito ang kadakilaan at malaking ambag ng mga guro sa lipunan at sa pag-unlad ng bansa.

Batay sa proklamasyon, ang naturang pagdiriwang ay nagbibigay daan upang kilalanin at bigyang halaga ang hindi mapapantayang serbisyo ng mga guro sa paggabay sa bawat pamilya, pagbubuklod sa komunidad at maging sa pag-unlad ng buong bansa.

Bida ngayong linggo ang mga lolo’t lola dahil ipinagdiriwang ngayon ang Linggo ng Katandaang Pilipino (Elderly Filipino Week) mula Oktubre 1 hanggang Oktubre 7.

Ito’y matapos iproklama ni dating pangulong Fidel Ramos (Proclamation No. 470) noong 1994 ang unang linggo ng Oktubre bilang linggo ng mga nakatatanda.

Sa pamamagitan ng nasabing taunang pagdiriwang, natutugunan ng pamahaalan, maging ng mga Local Governmment Units (LGU), ang ilang mga pangunahing pangangailangan ng mga matatanda.

Pinangungunahan ng Department of Social Welfare and Development (DSWD) ang Elderly Filipino Week na syang nagsasagawa ng mga programa tulad ng pagbibigay ng mga libreng maintenance medecines para sa mga matatandang mayroong iba’t ibang uri ng karamdaman gaya ng diabetes at hypertension.

Bukod sa tulong pang-kalusugan, iba’t ibang ahensya at institutsyon rin ang nag-alok ng libreng sakay at libreng panonood sa sinehan.

Una nang nag-anunsyo ang Department of Transportation (DOTr) na walang bayad ang mga senior citizens sa MRT-3 mula Oktubre 1 at Oktubre 7.

Samantala, libre din ang mga matatanda ngayong linggo sa mga sinehan ng ilang piling branches ng SM Cinema.

Maliban sa mga nabanggit ay may mga batas na rin sa bansa na nagbibigay ng karapatan sa mga senior citizens na mabigyan ng mga benepisyo tulad ng:

• 20% discount sa medisina, transportasyon, entertainment facilities, recreation centers, at funeral services;
• 5% discount sa buwanang bill ng tubig at kuryente (kung nakapangalan sa senior citizen ang linya);
• individual income tax exemption (kung minimum wage earners);
• libreng training fees sa mga socio-economic programs ng DTI, DOLE, DA, TESDA at DOST-TRC;
• libreng medical at dental services;
• libreng bakuna;
• monthly social pension;
• mandatory PhilHealth coverage;
• GSIS, SSS, at PAG-IBIG benefits;
• social safety assistance;
• express lanes sa mga establishment; at
• educational privileges.

Layon ng Elderly Filipino Week na mabigyang-pansin at halaga ang mga matatandang may edad 60 pataas na syang labis na nag-ambag sa paglago ng mamamayan at maging sa lipunan.

Kanin ang pangunahing pagkain dito sa Pilipinas.

Kaya naman malaking usapin kapag ang bigas at palay na ang nagsimulang gumalaw ang presyo sa merkado.

Ang pagpapababa sa presyo ng bigas ang pangunahing dahilan kaya isinulong at ginawang batas ang Republic Act 11203 o kilala bilang Rice Tariffication Law.

Sa ilalim ng bagong batas ay bubuksan ang unlimited importation ng bigas para mapababa ang presyo nito sa merkado.

Layon din nitong mapababa ang production cost ng pagtatanim ng palay sa pamamagitan ng pagbibigay ng makinarya, pagbibigay ng training, magandang binhi at loan grants sa mga magsasaka.

Ngunit bago pa naging second largest rice importer ang Pilipinas pangalawa sa China ay nagawa na ng bansa na maging rice sufficient noong 1970’s.

Noong mga panahon iyon ay mismong ang Pilipinas ang siyang nagsusupply ng bigas sa mga kalapit bansa nito tulad ng Indonesia, China at Myanmar.

Nag-aral pa ng pagtatanim ng palay sa International Rice Research Institute (IRRI) ang mga Vietnamese.

Ngunit ngayon, kabilang bansang Vietnam sa kinukuhanan ng bigas ng ating bansa.

Posible ba na ang batas na Rice Tariffication Law ay ang maging susi para muling makuha ng bansa ang rice sufficiency?

Ito na ba ang magiging pamamaraan para mapalakas at magawa nang makipagsabayan ng mga Pilipinong magsasaka sa mga kasama nito sa Timog Silangang Asya?

O ito na ba ang batas na papatay sa mga magsasaka ng palay?

Alamin bukas sa Siyasat — Rice Tarrification Law: https://www.facebook.com/dwiz882/

Hindi matapos-tapos ang usapin ng ‘red tagging’ sa mga maka-kaliwang grupo.

Kapwa nagbabatuhan ng alegasyon ang mga otoridad at mga militante.

Ito ang nagtulak sa isinagawang pagdinig ng senado para alamin ang katotohanan sa mga pakikibakang ito ng iba’t ibang grupo.

May mga matapang na lumantad para amining “minsang” naging bahagi ng maka-kaliwang grupo.

Anu-ano naman ang apela ng mga magulang na tila napipighati sa pagsama ng kanilang mga anak sa mga militanteng grupo?

Paano naman tumugon ang mga otoridad sa pagnanais ng mga nasabing magulang na makapiling muli ang kanilang mga anak na umano’y dinukot at tila na brainwash na ng mga maka-kaliwa?

Paano naman tinanggap ng kabilang panig ang mga pag-aalalang ito ng mga magulang sa kanilang nawalay na mga anak?

Alamin sa Siyasat — Aktibismo: http://bit.ly/2lV1Cj2

Forever ang nais ng mga nagmamahalan kaya sila nagpapakasal.

Nakapaloob sa forever na ito ang pagbuo ng isang masayang pamilya na binubuo ng tatay, ng nanay at kanilang mga anak.

At upang maabot ang forever, maraming sakripisyo ang dapat gawin ng mag asawa tulad na lamang ng pagtanggap sa kung ano ang pagkatao ng isa’t isa.

Pero paano kung sa pagdaan ng panahon ay magkaroon ng pagbabago ang pagsasama ng mag asawa, at magkaroon ng pagbabago sa pag-uugali ng bawat isa?

Paano kung sa halip na masayang pamilya ay maligalig at magulo na ang loob ng tahanan na hindi maganda para sa mga bata?

Paaano kung umabot na sa sukdulan ang pagtitiis, tatagal ka pa ba?

Mula pa noong 14^th congress ay hindi nawawala sa mga inihahaing panukalang batas ang diborsyo.

Gayunman, pinakamalayong naabot nito ay nang pumasa ito sa ikatlong pagbasa ng komite sa Mababang Kapulungan ng Kongreso nitong 17^th congress.

Muli itong binuhay ngayong 18^th congress dahil panahon na raw para magkaroon ng diborsyo sa Pilipinas.

Handa na nga ba ang mga Pilipino sa diborsyo?

Abangan sa Siyasat, bukas, Sabado (Setyembre 7): Siyasat — ‘Til divorce do us part?’ 

Humayo kayo’t magpakarami…

Ang mga katagang sinabi ng Panginoong Diyos noong kaniyang lalangin ang mundo.

Ngunit hanggang sa ngayon ba ay nananatili pa rin bang utos ito?

Naangkop pa rin ba ito sa panahon ngayon kung saan mabilis ang paglaki ng populasyon sa mundo.

Salat sa maayos na tirahan at masustansyang pagkain; kawalan ng edukasyon at malapit sa sakit; ito ang mukha ng kahirapan dulot ng paglaki ng populasyon sa Pilipinas.

Hindi lamang sa Pilipinas maging sa ibang panig ng mundo ay problema ito.

Ito ay nararamdaman dahil sa malawakang epekto sa resources ng mundo kahit pa ang kalikasan ay apektado.

Ang paglaki ng populasyon ay isa sa mga banta sa mayamang kalikasan dahil sa mas lalong lumalaking demand at mabilis na pagkonsumo ng mga likas na yaman.

Ngunit sa kabila ng nararanasang hirap at bantang kaakibat, patuloy pa rin ang paglobo ng populasyon.

Ilan sa mga pangunahing dahilan ng patuloy na paglaki ng populasyon ay teenage pregnacy at kawalan ng kaalaman sa family planning.

Sa panahon ngayon sinasabing mas lumalala ang pagka-ugnay ng mga kabataan sa pre-marital sex na nagreresulta sa teenage pregnancy.

Mas batang bumuo ng pamilya mas malaki ang tyansang lumaki ng husto ang pamilya lalo na kung salat ito sa kaalaman sa family planning.

Kaya’t malaki rin ang papel ng gobyerno sa paglobo ng populasyon na silang bubuo ng konkretong solusyon para makontrol ito.

Samahan kami at ating siyasatin ang mas lalo pang paglaki ng populasyon sa Pilipinas.

Pakinggan ang buong Siyasat — Paglobo ng Populasyon: http://bit.ly/2ZoyYcr

Ang lamok na kay liit, hindi dapat maliitin

Dahil kapag ang kamandag nito, sa katawan mo’y makasingit

Baka ang buhay mo, o ng mga mahal mo sa buhay, ang maging kapalit.

Ito ay dahil sa isang sakit na kung tawagin ay ‘DENGUE’ mula sa klase ng bababeng lamok na ‘Aedes aegypti’.

Karaniwang nangingitlog ang ‘Aedes aegypti’ sa malilinis at stagnant o hindi umaagos na tubig.

Umaatake o nangangagat lamang ito tuwing umaga, simula alas-singko ng umaga hanggang alas-singko ng gabi.

Kadalasang nabibiktima ng sakit na dengue ay pawang mga kabataan dahil sa mas madaling humina ang kanilang resistensya.

Batay sa pinakahuling datos mula sa Department of Health (DOH), pumalo na sa halos 150,000 ang kaso ng mga nagkakasakit ng dengue sa buong bansa kung saan mahigit 600sa mga ito ang kumpirmadong nasawi.

Hindi basta-basta ang sakit na dengue. Nagsisimula lang ito sa simpleng lagnat, subalit tumatagal ito ng ilang linggo hanggang sa buwan na kadalasang nauuwi sa komplikasyon o ang mas masaklap.. KAMATAYAN.

Kaya naman dahil sa naka-aalarmang bilang na ito ng naitalang kaso ng dengue sa bansa, inatasan na ni pangulong rodrigo duterte ang lahat ng ahensya ng pamahalaan na sama-samang kumilos para labanan ang nakamamatay na sakit na ito.

Gaano na nga ba kalala ang kaso ng dengue sa Pilipinas?

Pakinggan ang buong ulat ng Siyasat: Panganib ng Dengue