SPECIAL REPORTS

Isang labingpitong taong gulang na batang lalaki ang patay habang nasa pagamutan ang limang iba pa makaraan umanong makainom ng tubig sa poso at sa bukal sa Barangay Tinucan, Tanay, Rizal.
Sa panayam ng Radyo Klinika sa DWIZ, sinabi ni Tinucan Barangay Captain Victoria Lacuesta na nasawi si Ariel Aspero makaraan ang ilang beses na pagsusuka at pagdumi bunga ng entamoeba coli, batay sa ulat ng mga doktor sa Cabading Hospital.
Ayon naman sa gurong si Carlota Paragas ng Tinucan Elementary School, ang mga nadala sa pagamutan dahil sa katulad na simtomas ay sina Nancy Lontayao, Kian Gallo, Judith Alvasan, Rowena Absalon at Hazel Rapsing.
Sinabi ni Paragas na may ilan pang matatanda at bata sa Sitio Korokan at Kamatsile na nakararanas din ng pananakit ng tiyan, subalit hindi na dinala sa ospital.
Hiniling nina Lacuesta at Paragas na testingin muli ng pamahalaan ang kanilang tubig sa poso at bukal upang malaman kung dito nanggagaling ang dahilan ng pananakit ng tiyan at tuloy-tuloy na pagdumi ng kanilang mga ka-barangay.
Samantala, tiniyak naman ni Dr. Bernadett Velasco ng Health Emergency Bureau ng Department of Health na iimbestigahan nila ito at ibibigay nila ang karampatang tulong sa mga taga-Barangay Tinucan.—mula sa panulat ni Marou Pahati-Sarne

Hinirang na “Best Fried Chicken in America” ang Chickenjoy ng Filipino fast-food giant na Jollibee.

Ayon sa Eater.com, ang global food website sa ilalim ng Vox Media, nanguna ang “Juicy-licious, Crispy-licious” na Chickenjoy ng Jollibee sa 15 brands.

Tinawag itong ”Satisfyingly light, flavorful at supremely moist,” ng projects editor ng Eater na si Lesley Suter.

Kinilala rin ang Gravy ng Jollibee na nagpapakita ng Filipino colors na kukumpleto sa Chickenjoy.

Kabilang sa mga brands na pinagpilian ay ang KFC, Popeyes, Mcdonald’s, Wendy’s, White Castle, Burger King , Panda Express, Del Taco, Shake Shack, Wingstop, Chick-Fil-A, at Fuku O.G.

Nabatid na mayroong 83 Jollibee stores sa North America at mahigit 1, 500 restaurants sa buong mundo.

Tumaas ang cash remittances ng mga Overseas Filipinos na idinaan sa mga bangko noong Hunyo.

Ayon sa Bangko Sentral ng Pilipinas (BSP), nasa $2.755 billion ang cash remittances noong hunyo, na 4.4% na mas mataas sa $2.638 billion sa kaparehong buwan noong 2021.

Mula Enero hanggang Hunyo, ang cash remittances ay tumaas ng 2.9% sa  $15.3 billion kumpara sa $14.9 billion sa parehong panahon sa nakalipas na taon.

Sa datos ng BSP, pinakamalaking remittances ang nagmula sa United States, Singapore at  Saudi Arabia.

Samantala, tumaas rin ang personal remittances ng 4.4% sa $3.1 billion noong Hunyo mula sa $2.9 billion sa parehong panahon noong 2021.