FEATURES

Patay ang isang security guard ng isang condominium habang sugatan naman ang dalawa niyang kasamahan matapos pagbabarilin ng isang Chinese national sa Taguig City.

Kinilala ang suspek na si Tan Xing o Tan Zhennan, na nang-agaw pa umano ng kotse sa Barangay Ususan, sa nabanggit na lungsod.

 Base sa imbestigasyon, inabutan ng biktima na nag-aaway ang apat na indibidwal sa isang unit kung saan, pinababa ng tatlong security guards ang suspek pero agad itong bumunot ng baril at pinagbabaril ang tatlong sekyu.

 Dead on arrival ang isa sa mga security guard habang stable na ang condition ng dalawa pang guard sa ospital.

 Patuloy ang pinaghahanap ng mga otoridad na tumakas sakay ng isang grey Honda City na may plakang DR 2911 at posibleng maharap sa kasong murder at carnapping.

 Patuloy pang iniimbestigahan kung ano ang pinagmulan ng commotion sa condominium matapos marekober ang ilang piraso ng droga. – sa panulat ni Angelica Doctolero

Timbog ang isang 35 anyos na lalaki matapos makuhaan ng higit 200,000 pisong halaga hinihinalang shabu sa Lungsod ng Taguig.

Sa ikinasang buy-bust operation ng otoridad, nahuli ang suspek na kinilalang alyas ‘Jon-Jon’ na isang driver sa Barangay Santa Ana.

Ayon sa pulisya, kilala ang suspek bilang nagbebenta ng ilegal na droga sa mga tambay at kapwa tricycle driver sa kanilang lugar.

Kakasuhan ang suspek ng paglabag sa Comprehensive Dangerous Drugs Act of 2002. —sa panulat ni Abie Aliño-Angeles

Nasabat sa apat na indibidwal ang nasa higit kalahating milyong pisong halaga ng hinihinalang shabu sa lungsod ng Muntinlupa.

Ayon sa otoridad, nakuha sa mga suspek ang aabot sa 77 gramo ng shabu na tinatayang may halagang limangdaan at sampung libo piso (P510,000).

Hindi na pinangalanan pa ng pulisya ang mga suspek pero kilala raw bilang mga supplier ng ipinagbabawal na gamot sa iba’t ibang barangay sa nasabing lungsod.

Kasalukuyan nang nahaharap sa kasong may kinalaman sa ilegal na droga ang mga nahuling suspek. —sa panulat ni Abie Aliño-Angeles

Umabot na sa 350 pamilya ang nawalan ng tahanan matapos sumiklab ang sunog sa isang residential area sa Quezon City.

Ayon sa Quezon City Fire Department, nasa 200 kabahayan ang naabo ng sunog na matatagpuan sa Halamanan Street sa Barangay Commonwealth, na nagkakahalaga ng 250,000 pesos.

Tatlo ang nasugatan sa sunog na hindi pa pinapangalanan.

Nagsimula ang sunog sa isang dalawang-palapag na bahay dakong 6:41 ng umaga na umabot sa ikalawang alarma bago naapula dakong alas-9 ng umaga.

Patuloy naman ang imbestigasyon ng mga otoridad sa sanhi ng sunog. —sa panulat ni Abby Malanday

Maglulunsad ng Protection Center para sa kababaihan, kabataan at LGBTQ members ang pamahalaang lokal ng Mandaluyong.

Ito ay para bigyang tugon o matulungan at mabigyan ng kanlungan ang mga nasabing gender na nabiktima ng pang-aabuso at diskriminasyon.

Ayon kay Mandaluyong City Mayor Menchie Abalos, ang Mandaluyong City Protection Center for Women, Children & LGBTIQ ay itatayo sa Dr. Fabella Street sa barangay Mauway na pangungunahan ng Gender and Development Office ng Mandaluyong, City Engineering, City Planning Office, at ng National Center for Mental Health.

Layunin ng lungsod na maprotektahan ang kapakanan ng bawat kasarian at matiyak na ang mga kabataan ay nagagabayan nang maayos kasabay ng pagiging responsable ng mga magulang para sa kanilang mga anak. —sa panulat ni Angelica Doctolero

Halos 200,000 pisong halaga ng umano’y shabu ang nakumpiska ng mga awtoridad sa ikinasang operasyon sa General Luna St., Brgy. Tuktukan, Taguig City.

Kinilala ang mga suspek na sina Norbert Flores, Akbar Maing at Erick Leal, pawang mga residente ng lungsod.

Maliban sa 500 pisong buy-bust money, nakuha rin mula sa tatlo ang 170,000 pesos na halaga ng hinihinalang shabu, isang kalibre .38 baril at dalawang bala.

Nakatakdang sampahan ng kaukulang reklamo ang mga suspek. —sa ulat ni Gilbert Perdez (Patrol 13)