FEATURES

Tinatayang nasa 150 pamilya ang nawalan ng tirahan matapos matupok ng apoy ang isang residential area sa Malabon City nitong Biyernes.

Batay sa ulat, dakong ala-1:40 ng madaling araw nang sumiklab ang sunog kung saan mabilis itong kumalat sa katabing mga bahay na gawa sa light materials.

Agad namang rumesponde ang mga tauhan ng Bureau of Fire Protection at idineklarang fire-out ng sunog bandang alas-6:35 ng umaga.

Wala namang naipaulat na nasaktan o nasawi sa naturang insidente habang inaalam pa ang pinagmulan ng sunog at kabuuang danyos nito.

Agad namang nagpadala ng tulong si Malabon City Mayor Jeannie Sandoval sa mga naapektuhan ng sunog.

Kaugnay nito, namigay ng food packs, tubig, banig, hygiene kit at portable tents ang lokal na pamahalaan ng Mandaluyong at nangako ang kanilang alkalde na magbibigay ito ng agarang tulong upang makabangon ang mga nasunugang residente mula sa nangyaring trahedya.—mula sa panulat ni Hannah Oledan

Alam niyo ba ang mga benepisyong taglay ng coconut water?

Ang coconut water ay mayroong 94% ng tubig at kaunting fat content.

Ito rin ay sagana sa iba’t ibang nutrients tulad ng carbohydrates, sugar, calcium, magnesium, phosporus at potassium.

Ang pag-inom ng coconut water ay nakatutulong din sa pagpigil na magkaroon ng kidney stones dahil pinipigilan nito ang mga crystals na dumikit sa kidney at iba pang bahagi ng urinary track.

Bukod rito, mayroon din itong antimicrobial properties na nakatutulong upang maibsan ang pagkakaroon ng pimple o acne.—mula sa panulat ni Hannah Oledan

Nasawi ang isang senior citizen habang dalawa ang sugatan matapos masagasaan ng fire truck na rumesponde sa isang sunog sa Makati City.

Sa isang video, makikita na nakatayo ang mga tao at bumbero sa kalsada ng barangay Viejo pero ilang saglit, dumire-diretso ang fire truck hanggang sa masagasaan ang mga residente.

Ayon sa hepe ng Makati City Police na si police Colonel Edward Cutiyog, nilagyan ng kalso ang sasakyan, ngunit pababa ang kalsada. Bumaba ang driver upang tumulong sa pag-apula ng apoy nang biglang umabante ang fire truck.

Binawian ng buhay sa ospital ang senior citizen na kinilalang si Florencio Balaoing Jr. matapos pumailalim sa truck na tumulong pa sa pag-apula sa sunog habang isinugod din sa ospital sina Rita Roxas at Relin Azuelo na nagkaroon ng mga bali sa katawan.

Humarap sa awtoridad ang driver ng sasakyan na si John Polinar Orbeta ngunit tumangging magbigay ng komento. Iimbestigahan pa ng pulisya kung may problema ang fire truck.—mula sa panulat ni Maize Aliño- Dayundayon

Naantala ang pagresponde ng mga tauhan ng Bureau of Fire Protection sa sumiklab na sunog sa lungsod ng Malabon matapos magkaroon ng water interruption bandang ala-1 ng madaling araw.

Nagsimula ang sunog sa isang bahay sa barangay Tonsuya at mabilis na kumalat ang apoy dahilan para itinaas sa ikatlong alarma ng BFP ang sunog.

Sinabi ni Senior Fire Officer-4 (SF04) Kriby Banglos ng BFP, nag-iigib pa sa Portero at Navotas ang mga fire truck dahil sa kawalan ng supply ng tubig. Tumulong naman ang mga residente sa pag-apula ng apoy.

Inaalam pa ng awtoridad ang sanhi ng sunog, bilang ng mga naapektuhang pamilya at halaga ng mga napinsalang ari-arian.

Walang namang naiulat na nasawi sa sunog.—mula sa panulat ni Maize Aliño-Dayundayon

Kinilala ang inasal na manok bilang panlima sa best chicken dishes sa buong mundo.

Batay sa top 50 list na inilabas ng International Aggregated Food Guide na Taste Atlas, nakakuha ang Visayas Region’S signature dish ng 4.6 score mula sa kabuuang 5.

Nanguna sa tala ang Pollo ala Brasa ng Peru na nakakuha naman ng 4.9 score.

Matatandaang bago nito, itinanghal ang lumpiang shanghai ng Pilipinas bilang best street food sa buong mundo, kaparehong buwan na itinanghal ang limang uri ng pancit bilang Best Noodles in the World.

Ang kalabasa o squash ay mayaman sa Vitamin C at beta carotene na tumutulong labanan ang ibang sakit na may kinalaman sa paglabo ng mata o paglaho ng paningin.
Maliban dito, nakatutulong din ang Vitamin C para makaiwas sa pagkakaroon ng cataract.
Nakatutulong din ang kalabasa upang tumibay at maging matatag ang buto sa ating katawan dahil sa manganese at Vitamin C.
Tumutulong din ito upang labanan ang iba’t ibang uri ng sakit lalo na ang cancer.
Dahil dito, maraming benepisyong taglay ang kalabasa na nakatutulong sa ating katawan hindi lamang ito pampalinaw ng mata.

Nakiisa si SM Prime Holdings Officer Hans Sy sa pagkakapit-bisig ng publiko at pribadong sektor sa pagkakasa ng mga polisiya tungo sa Climate at Disaster Resilience at Sustainable Development sa pagbubukas ng 2022 Department of Environment and Natural Resources (DENR) Multi Stakeholder Forum.

Binigyang-diin ni Sy, Chairman ng Executive Board ng SM Prime Holdings na ang vision niya para sa environmentally resilient Philippines ay isang clean, green at disaster resilient country.

Priority aniya sa mahalagang usaping ito ang lahat ng sektor na magkaisa, magpalitan ng mga impormasyon at magtulungan para sa survival ng mundo at maging ng ating mga sarili.

Ipinaabot din ni sy sa kanyang talumpati na ang pagkakaruon ng solid tripartite system na binubuo ng gobyerno, private sector at academe ay krusyal o pinakamalagang punto sa environmental resilience research at innovations, policy, education, budget at maging sa tax.

Tiniyak ni Sy na hindi nag-iisa o mag-isa ang gobyerno sa pagtataguyod sa bansa dahil handa ang pribadong sektor na tumulong at makipag-partner sa pamahalaan para makapagbigay ng aniya’y whole of society approach tungo sa inclusive, prosperous at sustainable Philippines.

Para sa mga negosyo, tinukoy ni Sy ang kahalagahan ng internal strategic planning para masiguro ang mga sapat na resources para mga susunod na henerasyon kasabay ang paghimok sa gobyerno at mga kasamahan sa pribadong sektor na maging handa sa mga kalamidad na dumadalas na lalo na sa mga panahong ito kayat dapat mai prioritize at magkaruon ng resilience sa Good Urban Planning, Infrastructure Development at Internal Processes.

Viral ngayon ang ibinahagi ng netizen na si Mathel ang isang video ng kanyang dryer na tila isang labada na lang ay bibigay na.

Kwento ni Mathel, mahigit 8 taon na din ang dryer niya kaya nagkaron na ito ng mga sira.

Pero dahil umano sa ilang mga youtube videos ay natutunan umano nito na ayusin at paganahin ang kanyang dryer.

Kwento pa niya na nagtatago umano ito sa tuwing ginagamit niya ang dryer dahil nagtatalsikan ang mga parte ng katawan nito kapag bukas na.

Pabiro pa ni Mathel ay aabot pa aniya ang kanyang dryer hanggang December kung saan plano nya itong palitan.

Viral ngayon ang isang litrato matapos kumain ng isang turon na may naka-sulat sa wrapper nito.

Batay sa ibinahagi ni Avi Miranda, binili niya umano ang turon bilang kaniyang pang-himagas matapos siyang kumain ng tanghalian, ngunit hindi niya inaasahan na may nakasulat pala rito.

Pagkagat umano niya dito ay nag-zoom yung mata nito at may nabasa itong salitang “Dan” sa kinakain niya.
Nagulat na lamang si Avi at ang kaniyang mga ka-work sa nakita nila.

Paglilinaw naman ni Avi, mula nang nakita niya ang nakasulat sa turon ay saging na lamang ang kinain niya.
Kinaaliwan naman ng mga netizens ang naturang larawan at tinawag nila itong ‘Fortune Turon’ dahil mistulan daw itong fortune cookie.

Kapag sinabing nangangati ang mga palad, unang kahulugang pumapasok sa ating mga isipan ay may paparating na pera o salapi sa atin.

Walang siyentipikong basehan ang paniniwalang ito ngunit marami pa rin sa ating mga kababayan ang naniniwala na magkakapera ang isang tao tuwing nangangati ang mga palad.

Mayroong mga nagsasabi na kapag kaliwang palad ang nangati, nangangahulugan itong may paparating na malaking halaga ng pera at kung paligid naman ng mga daliri, ibig sabihin maliit lang ang halagang salapi na aasahan.

Salungat naman ang ibig sabihin sa tuwing kanan na kamay ang makararanas ng pangangati. Ibig sabihin ay may paparating na gastusin o papalabas ang pera.

Pero muli, lahat ng paniniwalang ito ay walang siyentipikong basehan at magpasahanggang ngayon ay isa lamang itong supertitious beliefs o pamahiin.

Magpakonsulta sa doktor sakaling walang tigil ang pangangati ng mga palad dahil maaring sanhi lamang ito ng mikrobyo o sakit sa balat na kailangan lunasan ng isang dermatologist.—mula sa panulat ni Angelo Baiño