METRO PATROL

Aminado ang Pamahalaang Lungsod ng Taguig na marami pa silang dapat gawin at hindi dapat magpakakampante ang kanilang mga kababayan.

Ito ang inihayag ni Taguig City Mayor Lino Cayetano matapos i-ulat ng OCTA Research Group na isa ang Taguig City sa mga lugar sa Metro Manila na may pinakamaliit na fatality rate sa COVID 19.

Ayon kay Cayetano, malaking naging ambag nito ay ang mabilis na pagtugon at pagpapakalat ng impormasyon hinggi sa mga benepisyo ng pagpapabakuna kontra sa virus.

Gayundin aniya ang pagiging disiplinado ng kanilang mga mamamamayan sa pagsunod sa health protocols kaya’t kanilang napababa ang bilang ng mga nasasawi sa lungsod.

Nagpasalamat naman ang Alkalde sa mga medical frontliner na walang sawang nagtatrabaho para ingatan at alagaan ang kanilang mga pasyente at tiniyak niyang magdodoble kayod pa upang mabakunahan ang lahat ng mga residente ng Taguig sa lalong madaling panahon.

Binuksan ng Pamahalaang Lungsod ng Taguig ang ika-9 na vaccination hub nito bilang bahagi ng laban kontra COVID 19.

Pinangunahan mismo ni Taguig City Mayor Lino Cayetano ang pagpapasinaya ng ika-9 na COVID 19 vaccination hub ng lungsod sa Venice Grand Canal Mall sa Fort Bonifacio.

Giit ng Alkalde, malaking tulong aniya ito upang mapalakas at mapataas ang kapasidad ng mga vaccination hubs sa Lungsod.

“ Iyung dalawang ito kakayanin na 400, 400 ibig sabihin walong daan ang papasok dito araw araw, in one month, 24 thousand people will be vaccinated here … yung other malls po vista mall, sm, ayala, lahat ho ng malls sa lungsod ng taguig have also volunteered there facilities to be vaccination hubs” wika ni Cayetano.

Sa ngayon, may 4 na Mega Vaccination Hubs ang Taguig sa mga Mall at 4 ding Community Hubs naman sa mga Paaralan.

Tiniyak din ni Cayetano na accessible ang mga vaccination hubs ng lungsod upang madali rin lalo na sa mga Senior Citizen ang makapunta.

Base sa datos ng Taguig City Local Government Unit (LGU), umabaot na sa 54,287 residente mula sa A1 (medical front-liners); A2 (senior citizens) at A3 (persons with comorbidities) ang nabakunahan na hanggang Mayo 18, 2021.

Mula Hunyo 1, 2021, target naman ng Taguig City LGU na makapagbakuna ng 5,600 kada araw upang pagdating ng Nobyembre o Disyembre, bakunado na ng 2 dose ang lahat na ng residente sa Lungsod.

Nagbahay-bahay na ang Pamahalaang Lungsod ng Taguig para mabakunahan kontra COVID 19 ang kanilang mga residenteng bedridden.

Ginawa ng lungsod ang nasabing hakbang sa layuning palakasin pa ang kanilang COVID 19 vaccination program sa pamamagitan ng home service.

Ayon kay Taguig City Mayor Lino Cayetano, marami kasi sa kanilang constituents ay mga Senior Citizen na may karamdaman at iyong mas nakababata subalit hindi na makapunta sa mga vaccination centers dahil sa kanilang sakit.

Pinangunahan nila Dr. Jennifer Lou De Guzman, head ng Taguig City Immunization at Dr. Regie Santos, Supervisor ng SM Aura Vaccination Hub ang patients for home service vaccination at isinagawa ang unang pagbabakuna kontra COVID-19 sa bahay ng mga babakunahan.

Kinakailangan lang tumawag ng mga residente na magre-request ng home service vaccination sa kanilang mga bedridden na miyembro ng pamilya sa mga designated telephone numbers ng Taguig Telemedics sa 31 barangay health centers ng lungsod gayundin sa Taguig City COVID-19 hotline

“In Taguig City, working diligently and deliberately is important, especially in the event of a health crisis. We must ensure that there are more locations and safer ways for residents, especially the vulnerable sector, to have access to the vaccine.” Pahayag naman ni Mayor Lino Cayetano.

Target ng Pamahalaang Lungsod ani Cayetano na mabakunahan ang lahat ng kanilang mga residente partukular ang tinatawag na vulnerable sector bilang pagsunod sa prioritization ng lungsod.

Asahan nang mas bibilis pa ang pagbabakuna kontra COVID 19 sa Lungsod ng Taguig.

Ito’y makaraang mabuksan na ang ika-6 at ika-7 vaccination hub ngayong linggong ito.

Abril a-13 nang buksan ang ika-6 na vaccination site sa Western Bicutan National High School sa Brgy. Western Bicutan.

Habang nitong ika-14 naman ng Abril binuksan ang ika-7 vaccination site ng Lungsod na nasa Samsung Hall, SM Aura.

Ang huli ang ika-3 Mega Vaccination hub at ang kauna-unahan sa Central Business District na Bonifacio Global City.

Ayon kay Taguig City Mayor Lino Cayetano, tuluy tuloy ang vaccination program ng Lungsod kung saan, target nilang mabakunahan ang kanilang buong populasyon.

“The city continues to vaccinate those who are in categories A1, A2, at A3. We prioritize them because they are the most vulnerable sector. These are the most vulnerable sectors that if infected, there are high chances that they will experience severe symptoms,” wika ni Mayor Lino Cayetano.

Mula nitong April 12, 2021, nakapagbakuna na ang Lungsod ng Taguig City ng aabot sa 17,375 citizens: A1 (Health Workers) – 9,445; A2 (Senior Citizens) – 3,503 at A3 (Non-senior w/ comorbidities) – 4,427.

Nasa 926 naman ng kabuuang 9,445 frontliners ang nakakumpleto na ng bakuna matapos na sila’y maturukan ng ikalawang dose.

Inaasahang mapapalakas pa ng Pamahalaang Lungsod ng Taguig ang kanilang kampaniya para mabakunahan kontra COVID 19 ang kanilang nasasakupan

Ito’y makaraang buksan ang ika-4 at ika-5 vaccination sites na matatagpuan sa sa Maharlika Elementary School sa Brgy. Maharlika at EM’s Signal Village Elementary School na nasa Brgy. Central Signal nitong Miyerkules.

Ayon kay Taguig City Mayor Lino Cayetano, karagdagan ito sa naunang 3 vaccination sites na kinabibilangan ng Mega vaccination hubs sa Lakeshore sa Brgy. Lower Bicutan, Vista Mall Parking Building sa Brgy. Calzada at community vaccination center sa RP Cruz Elementary School na nasa Brgy. New Lower Bicutan.

Magugunitang nagsimula na ang pagbabakuna sa lungsod nuong Marso a-31 sa mga nasa COVID 19 priority list buhat sa Inter-Agency Task Force on Emerging Infectious Diseases (IATF-EID) at magpapatuloy ito hanggang sa maubos ang kanilang suplay ng bakuna.

Inaasahan namang sa ika-3 bahagi ng taong ito darating na sa Lungsod ang mga biniling bakuna ng Lokal na Pamahalaan mula sa AstraZeneca, Covovax, Covaxin, at Moderna kasabay ng pagdaragdag ng vaccination sites.

“Vaccination is one of the main components to contain the virus and move forward to the new normal. Despite the case surges and being under the ECQ guideline, Taguig is pushing all its efforts to strengthen our science-based and expert-approved initiatives,” pahayag ni Taguig City Mayor Lino Cayetano.

Dahil dito, hinikayat din ng alkalde ang mga residente ng lungsod na magparehistro sa TRACE Taguig para sa vaccination schedule.

Natanggap na ng Pamahalaang Lungsod ng Taguig ang emergency assistance mula sa pamahalaan kahapon, Abril a-5

Layunin ng emergency assistance na magbigay ng ayuda sa mga mamamayang apektado ng kasalukuyang pagpataw ng ECQ.

Kasunod nito, ipinag-utos ni Taguig City Mayor Lino Cayetano ang agarang pag proseso at paggawa ng listahan ng mga benipisyaryo.

Batay sa Joint Memorandum Circular No. 1, Series of 2021 na nilabas ng DILG, DSWD at DND, ang pamahalaang lokal ang inatasang magbibigay ng ayuda sa mga sumusunod na indibidwal batay sa nakatakdang prayoridad:

1. Beneficiaries ng Social Amelioration Program sa ilalim ng Bayanihan Act 1 at karagdagang beneficiaries ng emergency subsidy batay sa Section 4, (f) 3 ng Bayanihan Act 2;

2. SAP wait-listed beneficiaries

3. Mga kabilang sa vulnerable groups kagaya ng mga low-income individuals na walang kasama, PWDs, solo parents at iba pa.

4. Iba pang indibidwal na apektado ng ECQ na matutukoy ng LGU kung meron pang natitirang pondo.

Magsisimula ang pamimigay ng ayuda ngayong Miyerkules, Abril 7.

Samantala, tuloy ang pamimigay ng 3-day stay-at-home food packs at hygiene kits ng pamahalaang lungsod sa bawat pamilyang Taguigeño. Nagsimula ang pamimigay noong unang araw ng ECQ, Marso 29.

Lalo pang mapalalakas ng Pamahalaang Lungsod ng Taguig ang kanilang kampaniya para mabakunahan kontra COVID 19 ang lahat ng mga residente sa kanilang nasasakupan.

Ito’y makaraang buksan ng Lokal na Pamahalaan nitong Huwebes Santo, April 1,2021 ang ika-3 vaccination site at unang community vaccination center na matatagpuan sa RP Cruz Elementary School sa Brgy. New Lower Bicutan.

Ayon kay Taguig City Mayor Lino Cayetano, makatutulong ang bagong vaccination hub sa 2 pang Mega Vaccination centers na nasa Lakeshore at Vista Mall Parking Building sa Brgy. Calzada.

Halos 1,000 Senior Citizen at Persons with Disabilities na mayruong comorbidity ang mapagsisilbihan ng bagong bukas na community quarantine center gayundin ang may 260 pang indibiduwal sa nasabing Barangay.

“Our target here is not only speed but safety, efficiency and accessibility. Our mega vaccine hubs and our community vaccine centers will help us hit our objectives. This will open the opportunity for more citizens to get vaccinated,” wika ni Mayor Lino Cayetano

Sa kasalukuyan, nasa 98% na ng mga Medical Frontliners ng Lungsod ang nabakunahan na gamit ang alokasyon nito ng Astrazeneca at Sinovac na handog ng Pamahalaan.

Dagdag pa ng Alkalde, inihahanda na rin ang kanilang portfolio para maisama sa mga gagamiting bakuna ang mula sa Novovax, IP Biotech, Moderna at karagdagang suplay naman mula sa Astrazeneca.

Agad namahagi ng ayuda ang Pamahalaang Lungsod ng Taguig sa mga pamilyang apektado ng pagpapatupad muli ng Enhanced Communnity Quarantine o ECQ sa NCR plus Bubble

Magkatuwang ang Barangay Affairs Office at Mayor’s Action Team ng Lungsod, nagbahay-bahay sila sa mga residente ng 28 Barangay na nasasakupan nito

Ang ipinamahaging foodpacks ay tatagal ng 3 hanggang 4 na araw na kayang makapagpakain sa pamilyang mayruong 5 miyembro

Ayon kay Tgauig City Mayor Lino Cayetano, kahit na bukas ang mga palengke, grocery at tuloy ang dine-in / take out services ay siniguro ng lokal na pamahalaan na pwedeng hindi na lumabas ang mga residente ng Taguig para bumili ng kanilang pangangailangan at hindi na rin ma expose sa COVID-19

“This week we need to stay safe. Dito po muna tayo sa piling ng mga mahal natin sa buhay, sa ating mga household, sa mga pamilya natin,” pahayag ni Cayetano.

“Sa aking mga kababayan, dito sa lungsod ng Taguig, we will take care of each other. Bayanihan po tayo. Ang lungsod natin ay kilala sa pagkalinga at pag-aaruga ng isa’t isa.” Dagdag pa ng alkalde.

Ang food packs ay kinabibilangan ng bigas; canned goods, energy drinks; hygiene/anti-COVID kit with face masks, face shields, alcohol at sabon upang masiguro na mapoprotektahan sa nakamamatay na sakit ang bawat pamilya.

“Itong one week na ito ay makakatulong sa atin para lalong mapababa ang ating mga kaso sa lungsod.The City of Taguig remains to have one of the lowest number of active cases in Metro Manila. At naniniwala ako, pag tayo’y nagtulungan, kaya rin natin babaan pa lalo,” pahayag pa ni Cayetano.

Pinasinungalingan ng Pamahalaang Lungsod ng Taguig ang ulat ng University of the Philippines (UP) OCTA Research Group na ang Brgy. Fort Bonifacio ang nangunguna sa mga Baranggay sa bansa na may pinakamaraming naitalang kaso ng COVID 19 sa bansa sa nakalipas na linggo.

Ayon sa Pamahalaang Lungsod, aabot lamang sa 116 ang COVID cases na naitala sa nasabing Baranggay mula Marso a-18 hanggang 24 taliwas sa inilabas ng OCTA na 342 na mga kaso ang naitala ruon.

Bagama’t nangunguna ang Brgy. Fort Bonifacio sa mayruong pinakamaraming kaso ng COVID 19 sa Lungsod ng Taguig na nasa 1,581 kabuuang kaso, nasa 42 lamang dito ang aktibo o kasalukuyang ginagamot sa mga quarantine facility duon.

Nanindigan ang Pamahalaang Lungsod ng Taguig sa accuracy ng kanilang mga datos gayundin ang integridad nito na lagi anilang nakikita ng publiko sa kanilang website maging sa mga social media platform.

Dahil dito, iginiit ng Taguig LGU na nananatili ang kanilang Lingsod sa may pinakamababang reproduction at fatality rate dahil mataas ang bilang ng mga naisasagawa nilang testing sa kanilang mga mamamayan.