METRO PATROL

Patay ang isang security guard matapos maengkwentro ang mga tauhan ng Manila Police District (MPD) habang nakatakas naman ang kaniyang kasama sa Manila.

Kinilala ang suspek na si Ernesto Onora, 46 anyos.

Ayon sa mga otoridad, nakatanggap ng ulat ang mga pulis patungkol sa presensiya ng dalawang lalaki na sinasabing sangkot umano sa serye ng pangho-holdap sa mga convenience store.

Tinungo ng mga operatiba ang area kung saan namataan sila ng mga suspek kaya biglang humarurot patakas subalit nabangga sa gutter na ikinabagsak nila. Bago pa malapitan ng mga operatiba ay nagpaputok si Onora sa direksyon ng mga pulis na nauwi sa palitan ng mga putok ng baril.

Sa ngayon, pinaghahanap at inaalam pa ng mga pulis ang pagkakakilanlan nakatakas na kasama nito. —sa panulat ni Kim Gomez

Timbog ang dalawang high value target sa isinagawang buy bust operation ng mga pulis sa caloocan city.

Kinilala ang mga suspek na sina rommel bobiles alyas dyosa, trenta’y tres anyos at michael ayuson, trenta’y otso anyos.

Narekober ng mga pulis ang mahigit isa puntotatlong milyong pisong halaga ng hinihinalang shabu.

Nahaharap ang mga suspek sa kasong paglabag sa ra 9165 o ang comprehensive dangerous drug act of 2002. —sa panulat ni Kim Gomez

Arestado ang tatlong lalaki dahil sa pagpatay sa isang batang lalaki sa gang war sa Tondo, Maynila.

Hindi pinangalanan ang kinse anyos na biktima habang kinilala ang mga suspek na sina Elan Crisostomo, 21 anyos; john Andrey Villanueva, 22  anyos, at Prince Jack Cabigao, 18 anyos.

Ayon sa mga pulis, sinabi nina Crisostomo at Villanueva na napilitan silang gumanti dahil pinapatay ng grupo ng biktima ang mga miyembro ng kanilang grupo.

Nakumpiska ng mga otoridad sa tatlong suspek ang dalawang revolver at isang patalim na ginamit sa pagpatay sa biktima.

Nakakulong at nakatakdang sampahan ng kaukulang kaso laban sa mga suspek. —sa panulat ni Kim Gomez

Tiklo sa mga otoridad ang isang barangay tanod na sinasabing most wanted sa Pandacan, Maynila dahil sa kasong pagpatay.

Inaresto mismo sa kaniyang bahay ang suspek na kinilalang si Edgar Gutierrez na pumatay sa isang alyas “Jepot” noong taong 2019.

Ayon kay Gutierrez, hindi niya alam na may hinaharap siyang kaso at hindi rin siya nagtatago sa batas.

Hawak na ngayon ng mga otoridad ang suspek na si Gutierrez na nakatakdang magbigay ng paliwanag sa korte. —sa panulat ni Angelica Doctolero

Namahagi ng tulong ang Manila LGUs sa 700,000 mga pamilyang naapektuhan ng kamakailang COVID-19 surge na nag dulot ng mas nakahahawang Omicron variant sa lungsod ng Maynila.

Nabatid na ang mga food box na ipinamahagi sa mga residente ng lungsod ay kasama sa Food Security Program (FSP) ng lokal na pamahalaan na nakaimbak sa San Andres Sports Complex.

Ayon sa pamahalaang lokal ng Maynila, mahalaga sa bawat isa ang pagkain lalo na sa mga mahihirap na pamilya ngayong nasa gitna parin ng pandemiya ang bansa. —sa panulat ni Angelica Doctolero

Arestado ng mga otoridad ang dalawang chinese na suspek sa pagdukot at pang to-torture sa kapwa nila Chinese kapalit ng ransom.

Ayon sa mga otoridad, ang dalawang suspek na tsino ay miyembro umano ng kidnap for ransom group sa Parañaque City.

Base sa video na nakuha ng mga tauhan ng National Bureau of Investigation – National Capital Region (NBI-NCR), makikitang naliligo sa dugo ang biktima matapos pagpapaluin ng mga suspek.

Agad na sinalakay ng mga operatiba ang hide-out ng grupo sa nasabing lungsod at dito nadakip ang dalawang chinese at narekober ang dalawang baril, isang long firearm, assorted na mga bala at mga posas.

Sa pahayag ni regional director ng NBI-NCR Jun Dongallo, modus na ng mga Chinese national na magpunta sa Pilipinas para magkunwaring legitimate na loan companies kung saan, magbibigay sila agad ng pera na walang collateral pero kapag na-default ka sa payment ay saka ka nila ikukulong at sasaktan para mapilitang makapagbayad.

Nahaharap ngayon sa reklamong kidnapping with serious illegal detention at illegal possession of firearms ang mga suspek.

Nagsasagawa na ng follow-up operation ang mga otoridad para matukoy ang iba pang kasabwat ng mga ito. —sa panulat ni Angelica Doctolero

Patay ang isang basurero matapos ma-hit and run ng isang kotse sa Quezon City.

Kinilala ng Quezon City Police District ang biktimang si Rodolfo Fontillas, 41 anyos.

Ayon kay Roma, nagpaalam lamang ang kanyang kapatid na mangangalakal ng basura matapos maghapunan.

Nalaman na lang umano niya ang sinapit ng kapatid matapos silang puntahan ng mga taga-barangay.

Batay sa imbestigasyon ng QCPD, tinangka ng isang rider na habulin ang kotse pero hindi na ito naabutan.

Bagaman hindi nakuha ang plate number ng kotse, naiwan naman nito ang basag na salamin mula sa headlight na may kasamang RFID sticker na magagamit para matukoy ang suspek. —sa panulat ni Mara Valle