METRO PATROL

Huli sa CCTV footage ang ginawang panghoholdap ng mga suspek sa isang Convenience store sa Quezon City kung saan, muntikan nang matangay ang kinita ng naturang tindahan.

Ayon sa imbestigasyon, pinagtulungan ng mga suspek na itali ang babaeng nagbabantay sa nasabing tindahan saka nilimas ang perang nagkakahalaga na P140K.

Nang akmang patakas na ang mga suspek ay nagawa umano ng biktimang kumawala sa pagkakatali saka hinabol ang mga holdaper.

Dito na naabutan ng biktima ang isa sa mga suspek saka hinampas ng suot na sapatos na sakto namang may mga dumaan na grupo ng mga manggagawa dahilan para makahingi ng tulong ang biktima.

Mabilis na hinabol ng mga grupo ng manggagawa ang mga suspek na sakto ding naharang ng isang guwardiyang nagbabantay sa kalapit na establisyimento.

Agad na nabawi ang perang ninakaw ng nahuling mga suspek na ngayon ay nahaharap sa patung-patong na kaso. —sa panulat ni Angelica Doctolero

Inaresto ng mga otoridad ang isang 47-anyos na babae matapos sitahin dahil wala umanong suot na facemask at nakuhanan ng iligal na droga sa Barangay Malanday, Valenzuela City.

Ayon sa mga tauhan ng Northern Police District, nagsasagawa sila ng oplan galugad nang sitahin ang naturang suspek kung saan, bibigyan lang sana ng Ordinance violation receipt nang bigla itong tumakbo.

Mabilis naman naahuli ang suspek na agad kinapkapan at nakuha ang anim na sachet ng hinihinalang shabu na nagkakahalaga ng mahigit P27K at ilang mga drug paraphernalia.

Mahaharap ngayon sa kasong paglabag sa Comprehensive Dangerous Drugs Act of 2002 ang suspek. —sa panulat ni Angelica Doctolero

Patay matapos mahit-and-run ang isang 33-anyos na babae sa kahabaan ng General Ordoñez Street, Barangay Marikina Heights, Marikina City.

Kinilala ang biktima na si Delsyn Mangui, isang Marketing Manager at residente ng lungsod ng San Jose Del Monte, Bulacan.

Base sa imbestigasyon ng mga otoridad, makikitang nakaangkas ang biktima sa motor ng kaniyang boyfriend pero bigla na lamang itong nahulog at nawalan ng malay.

Agad na itinabi ng nobyo ang kaniyang motor saka pinuntahan ang biktima pero nasagasaan ito ng humaharurot na kotse.

Sinubukan pang dalhin sa amang Rodriguez Memorial Medical Center ang biktima subalit idineklara itong dead on arrival.

Sa pahayag ng Marikina Traffic Investigation Unit, hirap pa rin silang matukoy ang pagkakakilanlan ng driver na responsable sa pangyayari na posibleng maharap sa kasong Reckless Imprudence Resulting in Homicide. —sa panulat ni Angelica Doctolero

Aabot sa P3.5-M ang halaga ng ibat-ibang uri ng exotic animals ang nakumpiska ng mga tauhan ng Bureau of Customs (BOC) sa Ninoy Aquino International Airport (NAIA) sa Pasay City.

Ayon sa mga otoridad, nadiskubre ang mga exotic na hayop at halaman nang inspeksyunin sa Logistics warehouse ang import shipment mula Thailand na nakapangalan sa isang tindahan ng Aquatic fish, Pets, Plants at Supplies sa Quezon City.

Kabilang sa mga nakumpiska ang 180 albino soft-shelled turtles, 120 pacman frogs, at 38,188 na ibat-ibang uri ng mga isda.

Bukod pa diyan, nasamsam din ang 718 anubias plants at 260 microsorium plants na pawang mga walang permit to import.

Dahil dito, posibleng mapatawan ng 500% surcharge ng singil na duty at tax hindi pa kasama ang posibleng pagkakakulong at multa ng sino mang mapapatunayang lumabag sa batas sa ilalim ng RA 10863 o ang Customs Modernization and Tariff Act.  —sa panulat ni Angelica Doctolero

Dead-on-arrival ang isang rider matapos sumalpok sa isang pick-up truck sa isang U-turn way sa Quezon Avenue, Quezon City.

Ayon sa mga otoridad, nayupi ang gilid sa bandang harapan ng pick-up truck dahil sa lakas ng pagkakabangga ng rider.

Ayon sa isang tauhan ng barangay sa lugar, nagkaroon ng matinding pinsala ang rider dahil wala umano itong suot na helmet.

Patuloy pang iniimbestigahan ng mga otoridad ang insidente. —sa panulat ni Angelica Doctolero