METRO PATROL

Patay matapos mahit-and-run ang isang 33-anyos na babae sa kahabaan ng General Ordoñez Street, Barangay Marikina Heights, Marikina City.

Kinilala ang biktima na si Delsyn Mangui, isang Marketing Manager at residente ng lungsod ng San Jose Del Monte, Bulacan.

Base sa imbestigasyon ng mga otoridad, makikitang nakaangkas ang biktima sa motor ng kaniyang boyfriend pero bigla na lamang itong nahulog at nawalan ng malay.

Agad na itinabi ng nobyo ang kaniyang motor saka pinuntahan ang biktima pero nasagasaan ito ng humaharurot na kotse.

Sinubukan pang dalhin sa amang Rodriguez Memorial Medical Center ang biktima subalit idineklara itong dead on arrival.

Sa pahayag ng Marikina Traffic Investigation Unit, hirap pa rin silang matukoy ang pagkakakilanlan ng driver na responsable sa pangyayari na posibleng maharap sa kasong Reckless Imprudence Resulting in Homicide. —sa panulat ni Angelica Doctolero

Aabot sa P3.5-M ang halaga ng ibat-ibang uri ng exotic animals ang nakumpiska ng mga tauhan ng Bureau of Customs (BOC) sa Ninoy Aquino International Airport (NAIA) sa Pasay City.

Ayon sa mga otoridad, nadiskubre ang mga exotic na hayop at halaman nang inspeksyunin sa Logistics warehouse ang import shipment mula Thailand na nakapangalan sa isang tindahan ng Aquatic fish, Pets, Plants at Supplies sa Quezon City.

Kabilang sa mga nakumpiska ang 180 albino soft-shelled turtles, 120 pacman frogs, at 38,188 na ibat-ibang uri ng mga isda.

Bukod pa diyan, nasamsam din ang 718 anubias plants at 260 microsorium plants na pawang mga walang permit to import.

Dahil dito, posibleng mapatawan ng 500% surcharge ng singil na duty at tax hindi pa kasama ang posibleng pagkakakulong at multa ng sino mang mapapatunayang lumabag sa batas sa ilalim ng RA 10863 o ang Customs Modernization and Tariff Act.  —sa panulat ni Angelica Doctolero

Dead-on-arrival ang isang rider matapos sumalpok sa isang pick-up truck sa isang U-turn way sa Quezon Avenue, Quezon City.

Ayon sa mga otoridad, nayupi ang gilid sa bandang harapan ng pick-up truck dahil sa lakas ng pagkakabangga ng rider.

Ayon sa isang tauhan ng barangay sa lugar, nagkaroon ng matinding pinsala ang rider dahil wala umano itong suot na helmet.

Patuloy pang iniimbestigahan ng mga otoridad ang insidente. —sa panulat ni Angelica Doctolero

Nasabat ng mga otoridad ang aabot sa P1.2 M na halaga ng shabu mula sa isang Drug dealer sa karagatang sakop ng Navotas City.

Ayon sa mga tauhan ng Navotas City Police Station, nagsagawa sila ng operasyon matapos makatanggap ng report mula sa isang concerned citizen tungkol sa iligal na gawain ng suspek.

Nabatid na naglalako umano ng iligal na droga ang suspek na kinilalang si Rudy Las Piñas, 40-anyos gamit ang kaniyang bangka sa nasabing lugar kung saan, isang under cover na pulis ang nagpanggap na bibili ng P1,000 halaga ng shabu.

Nang tanggapin ng suspek ang marked money mula sa poseur-buyer kapalit ng isang plastic sachet ng shabu ay agad siyang inaresto ng mga operatiba.

Narekober sa suspek ang tinatayang nasa 174 gramo ng hinihinalang shabu na nagkakahalaga ng mahigit P1-M, isang caliber .32 pistol na may magazine at kargado ng anim na bala, digital weighing scale, mobile phone, maliit na notebook, itim na timba, buy bust money, P1,500 cash at ang maliit na bangka na gamit umano sa pagbebenta ng illegal droga.

Paglabag sa R.A. 9165 o comprehensive dangerous drugs act of 2002 at R.A.10592 o ang Comprehensive law on firearms and ammunition act in relation to Omnibus Election Code ang isinampang kaso laban kay Las Piñas. —sa panulat ni Angelica Doctolero

Pumalo na sa 600 ang kabuuang bilang ng mga pamilyang nawalan ng tirahan makaraang lamunin ng sunog ang sang residential area sa Barangay Paligsahan, Quezon City.

Ayon sa Bureau of Fire Protection, pahirapan silang apulahin ang sunog dahil sa masikip na daan at dikit-dikit na kabahayan.

Wala namang naitalang nasawi pero sugatan ang dalawang indibidwal sa naganap na sunog.

Humihingi ngayon ng tulong ang mga pamilyang nawalan ng tirahan na ngayon ay nanunuluyan sa Manuel A. Roxas High School. —sa panulat ni Angelica Doctolero

Arestado ang apat na lalaki matapos magpanggap na pulis sa Tondo, Maynila.

Ayon sa Manila Police District-Station 1, sinabi umano ng apat na sila ay mga pulis at miyembro ng Criminal Investigation and Detection Group (CIDG) at nagpumilit pumasok sa isang condominium.

Dahil dito humingi ng saklolo ang guwardya ng naturang gusali sa mga nagpapatrolyang pulis.

Sa imbestigasyon ng Manila Police District 1, may bitbit ang mga suspek na matataas na kalibre ng baril na may mga bala pero walang dokumento.

Nahaharap naman ang apat na supek sa kasong paglabag sa COMELEC gun ban, illegal possession of firearms and ammunition at Usurpation of Authority. – —sa panulat ni Mara Valle

50 pamilya o aabot sa 375 ang naapektuhan ng sunog matapos maabo ang 25 bahay sa Barangay Nangka, Marikina City alas-10 ng umaga kahapon.

Ayon sa  Bureau of Fire Protection, umabot sa second alarm ang sunog bago idineklarang fire under control.

Sa pahayag ni Senior Fire Officer IV SFO4 Gemar V. Dela Torre, nagsimula ang sunog sa  Terrace ng 2-storey house na pagmamay-ari ni Marina Galla.

Wala namang naitalang nasawi o nasugatan sa naganap na sunog pero aabot sa 100K ang danyos na naabo sa sunog.

Samantala, nasunog din alas-10 kagabi ang isang residential area sa kahabaan ng Mother Ignacia st., Brgy. Paligsahan, Quezon City.

Umabot sa ikalawang alarma ang sunog pero patuloy pang inaalam ng mga otoridad ang detalye sa nasabing sunog.  —sa panulat ni Angelica Doctolero