Handa na ang Bureau of Immigration (BI) sa pagdating ng mga dayuhan kasunod ng desisyon na gobyerno na magbukas na sa mga turista simula Pebrero a-10.
Ayon kay Immigration Commissioner Jaime Morente, sapat ang kanilang manpower sakaling lumobo ang bilang ng mga pasahero sa mga paliparan.
Aniya, karamihan sa mga tauhan ng BI na nakatalaga sa Ninoy Aquino International Airport (NAIA) na tinamaan ng virus o naka-isolate, ay nakabalik na sa trabaho.
Sinabi pa ni Atty. Carlos Capulong, BI Port Operations Chief, na pansamantala rin silang kumuha ng mga personnel mula sa iba’t ibang opisina ng BI upang tumulong sa mga frontliner sakaling kailanganin ang mga ito.
