Isa nang ganap na bagyo ang binabantayang LPA o Low Pressure Area at tatawagin itong Bagyong Onyok na may international name na ‘Mitag’.
Ayon sa PAGASA, magdadala ng masamang panahon ang bagyo sa bahagi ng Cagayan Valley at Bicol Region.
Dagdag pa ng weather bureau, hindi naman inaasahang tatama ito sa lupa.
Taglay nito ang lakas ng hangin na aabot sa 95 kilometro malapit sa gitna at may pagbugsong aabot sa halos 115 kilometro.
Patuloy ang pagkilos nito sa bilis na 30 kilometro kada oras.
Inaasahang lalabas ang Bagyong Onyok sa Philippine Area of Responsibility sa Martes ng Umaga.
Nakataas na ang TCWS o Tropical Cyclone Wind Signal number 1 sa lalawigan ng Batanes at Babuyan Islands dahil sa Bagyong Onyok.
Tinatayang nasa 30 kilometro kada oras hanggang 60 kilometro kada oras ang bugso ng hanging mararamdaman sa lugar sa loob ng 36 na oras.
Dahil dito ay hindi muna pinapayagang maglayag ang mga maliliit na sasakyang pandagat sa northern at eastern seaboards ng Hilagang Luzon.
Paalala ng PAGASA, anumang oras ay pwedeng itaas ang TCWS 2 sa mga naturang lugar.
