Nanawagan ang isang health group sa Kamara De Representantes na gamitin na lamang ang nakalaang pondo sa imprastraktura sa pagpapatayo ng cold storage facilities.
Inihayag ito ni Dr. Nemuel Fajutagana, medical action group chairperson matapos mabisto sa senado ang bilyong-bilyong pisong infra funds na isiningit ng mga kongresista sa panukalang 2021 General Appropriations Act o budget.
Ayon kay Fajutagana, dapat mas dagdagan ng pamahalaan ang pondo para sa bakuna kontra COVID-19 sa halip na sa imprastraktura upang tuluyan nang makabangon ang ekonomiya ng bansa.
Maganda siguro bawasan ang budget for infrastructure sa mga congressional district and ipagpatayo ng cold storage facility. The thing is, you may be able to buy the vaccines but before they reach the communities, they are not effective anymore because of the problem on the cold chain”, paliwanag ni Fajutagana.
Ayon naman kay Health Program Officer na si Luz Garcia ng Department of Health (DOH) Disease Prevention and Control Bureau, aabot sa P3-B ang gugugulin para sa negative 70 degrees Celsius storage facility na pakikinabangan ng 25 milyong Pinoy.
Para naman sa vaccinologist na si Melvin Sanicas, mahalaga ang cold storage facilities para sa COVID-19 vaccine dahil kailangan itong manatiling frozen upang maging epektibo ito.
