Lantarang pinuri ni Energy Regulatory Commission (ERC) Chairperson Atty Monalisa Dimalanta ang More Electric and Power Corporation (More Power) sa maayos nitong pamamalakad at pagsunod sa Magna Carta for Residential Electricity Consumers kasunod ng ipinatupad na bill deposit refund sa kanilang mga customers at pagkakaroon ng mababang power rate sa bansa.
Ayon kay Dimalanta, ang ginagawa ng More Power ay dapat na sundan ng mga Distribution Utilities (DUs) o mga electricity providers sa buong bansa.
“We encourage this culture of accountability among the regulated entities as demonstrated by the actions of More Power on the refund and least cost supply,” pahayag ni Dimalanta.
Sinabi ni Dimalanta na kung kayang gawin ng More Power ang ganitong maayos na sistema ay dapat ganoon din sa ibang DUs habang patuloy aniya ang ginagawang monitoring ng ERC upang matiyak ang resonableng presyo ng kuryente alinsunod sa probisyon ng RA 9136 o Electric Power and Industry Reform Act (Epira Law).
“The commission has been implementing heightened monitoring of regulated entities and this exercise is bringing to the surface the negative practices to correct as well as positive practices to promote,”dagdag pa ni Dimalanta.
Sa loob ng magkakasunud na 6 na buwan ngayong taon ay bumaba ang singil sa kuryente ng power firm para sa mga residente na sineserbisyuhan nito sa Iloilo City.
Ang residential rate ng More Power para sa buwan ng Mayo hanggang Hunyo ay bumaba ng halos P1 sa P12.2990 per kilowatt-hour (kWh) mula P13.2511 per kWh na dito’y baligtad naman sa mga sinerserbisyuhan ng Manila Electric Company (Meralco) na nag-anunsyo ng rate adjustment sa buwan ng Hunyo o dagdag na P 0.4183 per kWh.
Positibo ang More Power na patuloy pa ang pagbaba ng kanilang singil sa kuryente hanggang sa pagtatapos ng taon.
Paliwanag ni Niel Parcon, vice president for corporate planning and regulatory affairs ng kompanya, dalawa sa naging malaking factor sa pagbaba ng presyo ng kuryente ay ang pagbili nila ng geothermal energy mula sa geothermal plant ng Energy Development Corp sa Leyte at ang pagbaba din ng presyo ng coal sa world market mula sa $488 per ton ay naging $200 per ton.
Matatandaan na pinasimulan din ng More Power ang inisyatibo na ibalik ang bill deposit ng kanilang mga “good paying customers” kung saan nasa P5 million bill deposit ang nakatakdang ibalik ng kumpanya ngayong taon.
Ang More Power ay nagsimula lamang mag-operate noong 2020 matapos lagdaan ni dating Pangulong Rodrigo Duterte ang kanilang franchise law kapalit ng Panay Electric Company (PECO) na nagserbisyo sa Iloilo City mula 1923 hanggang 2019.
