Umabot na sa mahigit isang libong katao ang dumagsa sa isinagawang job fair sa Ortigas.
Kabilang sa mga employer na lumahok ang Aliw Broadcasting Corporation at Eternal Gardens Memorial Park Corporation upang makapagbigay ng oportunidad sa mga Pilipinong naghahanap ng trabaho.
Ayon sa job fair organizer na JobQuest, inaasahan nilang aabot sa mahigit dalawang libo ang kabuuang bilang ng mga dadalo sa job fair bilang bahagi ng kanilang layuning makatulong sa mga Pilipinong naghahanap ng hanapbuhay.
Mas pinilahan ng mga job seeker ang international hiring.
Paliwanag ng ilang aplikante, mas pinipili nilang magtrabaho sa ibang bansa dahil sa mas mataas na pasahod at mas magandang oportunidad.
Dagdag pa ng ilang aplikante, nais nilang makahanap ng mas maayos na kinabukasan sa abroad kumpara sa sitwasyon ng trabaho sa bansa.
Panawagan naman ng mga job seeker sa pamahalaan na sana ay maitataas ang sahod ng mga manggagawang Pilipino upang hindi na nila kailangang mangibang-bansa para lamang magkaroon ng disenteng kita.
Samantala, hinikayat ang mga nais pang mag-apply na magtungo na sa Robinsons Galleria sa Ortigas dahil huling araw na ng job fair ngayong araw at magtatapos ito alas-singko ng hapon. | via Jenn Patrolla (Patrol 38)
