Mas nakakiling kay Senador Grace Poe ang suporta ni House Speaker Feliciano Belmonte sa 2016 Presidential elections.
Hindi man direktang sinabi, ipinahiwatig ni Belmonte na kung ang kanyang puso ang tatanungin, si Poe ang kanyang napipisil.
Si Belmonte ay isa sa mga opisyal ng Liberal Party na nagtutulak naman kay Department of Interior and Local Government (DILG) Secretary Mar Roxas bilang standard bearer sa Presidential elections.
Kinontra ni Belmonte ang pahayag ng mga kontra kay Poe na magmimistula lamang itong On the Job Trainee sakaling manalong Pangulo ng bansa.
Kahanga-hanga aniya ang ginawa ni Poe na naipasa sa senado ang Freedom of Information Bill na matagal nang nakabinbin at ang pagbuo ng committee report sa Mamasapano incident nang walang sinasanto.
Gayunman, nilinaw ni Belmonte sa ngayon ay wala pa siyang kategorikal na napipisil na kandidatong susuportahan sa eleksyon.
By Len Aguirre
