Ipinaliwanag ni Sarah Discaya sa kanyang mga kababayang Pasigueño na kung palarin siyang maiupo bilang alkalde ay hindi na kailangang hingiin ng mga ito ang serbisyo para sa mga pangunahin nilang pangangailangan salagkat gagawin niyang priority ng City Hall na ipahahatid na ito sa mga bahay-bahay, gaya ng mga gamot at gamit sa eskwela.
“Ang hangad ko sa Pasig ay ‘yung hindi na kailangang humingi pa ang kababayan kong Pasigueños ng kanilang mga pangunahing pangangailangan.”
Mariing pahayag ito ni Pasig mayoral aspirant Sarah Discaya kaugnay ng umano’y mga kakulangan sa basic services, gaya ng ayuda sa edukasyon at kalusugan, para sa mga Pasigueño.
Ginawa ni Discaya ang pahayag makaraang magpaabot sa kanya
ng liham ang isang Pasigueñong mag-aaral na humingi ng apat na balot ng A4 na bond paper dahil wala na umano silang magamit sa klasrum at upang hindi na mabawasan ang kanilang baon sa pag-aambagan para sa pambili nito.
Sinabi ni Discaya, na kilala sa Pasig bilang Ate Sarah, na nakatataba ng puso ang liham ng bata sa kanya dahil umano sa murang edad at kaisipan nito ay naipakita niya ang malasakit para sa kanyang kapwa mag-aaral, guro, at magulang.
“Ang bata at liham na ganito ang mas lalong nakapagbigay ng inspirasyon at tapang upang maipagpatuloy ko ang aking hangarin na makatulong at mabigyan sila ng mas maayos na kinabukasan,” sabi ni Discaya, na ang pamilya ay ang may-ari ng St. Gerrard Charity Foundation, na ilang taon na ring tumutulong sa mga maralitang sektor ng lungsod ‘tulad ng palagiang medical mission at iba pa.
Nilinaw niya na ang pangunahing mga pangangailangan ng mamamayan, ‘gaya ng gamit sa iskwela at mga gamot sa ospital at health centers ay hindi na dapat hingiin pa sa City Hall, kundi agarang ipinamamahagi na ang mga ito sa mga residente.
Kaugnay nito, binigyang pansin din ni Discaya ang kakulangan sa mga pangunahing pangangailangan ng mga Pasigueño na ayon sa kanya ay hindi umano natugunan ng kasalukuyang alkalde na si Vico Sotto.
Ayon kay Ate Sarah, ang naging pokus umano ng kasalukuyang administrasyon ay ang pagkakaroon ng good governance sa lungsod ng Pasig na siyang inilalarawan umano ni Sotto bilang ‘transparency at paglaban sa korapsyon.’
“The mayor focused on good governance dahilan kung bakit napabayaan ang ibang sectors sa lungsod ng Pasig,” dagdag niya.
Isinaad ni Discaya na sa ilang beses niyang pagbaba sa masa at sa iba’t ibang lokal na komunidad sa lungsod ng Pasig kung saan nandoon ang mga kapus-palad at ang mga nasa laylayan may mga napansin umano silang pagkukulang at problema tulad ng kakulangan sa serbisyo lalo na sa edukasyon.
Sinabi ni Discaya na bagaman may mga ipinamimigay na mga set ng uniporme para sa mga estudyante sa lungsod ng Pasig ay hindi naman umano lahat ay nakatatanggap nito.
Kaya naman, idiniin ni Ate Sarah na isa sa mga kahulugan ng ‘good governance’ ay ang pagkakaroon umano ng sapat na makamasang serbisyo tulad ng epektibo at sapat na supporta sa sektor ng edukasyon na mapapakinabangan ng mga mag-aaral na Pasigueño.
“As well as good governance, you should also not forget the basic services at pangangailangan ng bawat isang Pasigueño gaya ng healthcare at education.” saad niya.
Kung sakaling maihalal, ang isa sa mga plataporma ni Ate Sarah ay magbigay ng inklusibong scholarship programs sa mga mag-aaral ng lungsod na kung saan pati ang mga estudyanteng pasang-awa ay may karapatan at oportunidad na magkaroon ng scholarship.
Noong nakaraang taon ay bumagsak ang Pasig City sa 2024 Rankings of Highly Urbanized Cities sa ilalim ng Cities and Municipalities Competitive Index mula sa ika-6 nitong ranggo noong 2019 papunta sa ika-9 na pwesto nitong 2024.
Malaki ang naging kontribusyon ng kategoryang government efficiency sa nasabing rankings na kinabibilangan ng government services tulad ng school services, health services, peace and order, at social protection.
Layunin ni Discaya na gawing ‘smart city’ ang lungsod ng Pasig kung saan kabilang ang mga ‘smart schools’ na mayroong makabagong teknolohiyang maaaring gamitin ng mga mag-aaral pati na ‘smart hospitals’ na may sapat na gamot, healthcare professionals, at kagamitan.
