Napilitang dumaong sa baybayin ng Northern Samar ang isang barko ng China bunsod ng malalakas na alon na dulot ng bagyong Agaton.
Nagsagawa ng emergency docking ang Chinese vessel na Jin Ming Number 16 sa baybaying sakop ng Poblacion Dos sa bayan ng Pambujan sa nasabing lalawigan.
Batay sa ulat ng Northern Samar Provincial Police, nakatanggap sila ng impormasyon mula sa Pambujan PNP hinggil sa paghingi ng saklolo ng mga dayuhan kahapon ng tanghali.
Lulan ng naturang barko ang siyam na dayuhan bitbit ang watawat ng China na nakita sa layong 300 metro mula sa dalampasigan.
Disyembre 12 pa umano umalis ang naturang barko patungong China nang abutan sila ng malalakas na alon dulot ng bagyo.
—-
