Iniimbestigahan na ng DOJ o Department of Justice ang mga bank account ng mga personalidad mula sa oposisyon partikular na mula sa LP o Liberal Party na mas kilala bilang dilawan.
Ito ang kinumpirma ni Justice Secretary Vitaliano Aguirre bagama’t tumanggi itong magdetalye at tukuyin kung sino-sino sa oposisyon ang kanilang iniimbestigahan.
Gayunman, sinabi ni Aguirre na kanilang sinisiyasat ang mga foreign account ng ilang personalidad sa Switzerland, Malaysia at Australia kaya’t nangako ang kalihim na ihahayag sa tamang panahon ang resulta ng kanilang imbestigasyon.
Kasunod nito, sinabi ni Aguirre na nasa kamay naman ng AMLC o Anti-Money Laundering Council ang bola hinggil sa pakikipag-ugnayan sa mga dayuhang bangko para maisiwalat ito sa publiko.
