Patuloy na lumalayo ng bansa si Bagyong Paeng na huling namataan sa layong 545 kilometers kanlurang bahagi ng Calayan, Cagayan.
May lakas ito ng hanging aabot sa 110kph at pagbugsong aabot naman sa 135kph habang kumikilos patungong hilaga sa bilis na 20kph.
Dahil sa epekto ni Bagyong Paeng, makararanas ng kalat-kalat na mga pag-ulan ang Bataan, Zambales, Occidental Mindoro, Palawan at Western Visayas.
Samantala, patuloy namang nananatili sa dagat pasipiko si Bagyong Queenie na huling namataan sa layong 490 kilometers east-south-east ng Hinatuan, Surigao Del Sur.
Napanatili ni Bagyong Queenie ang lakas ng hanging aabot sa 65kph at pagbugsong aabot naman sa 80kph habang tinutumbok ang kanlurang bahagi ng bansa sa bilis na 20kph.
Inaasahan na sa darating na Huwebes, hihina na si Bagyong Queenie at posibleng maging isa nalang na low pressure area.
Nakataas naman ang gale warning signal ng PAGASA sa bahagi ng Ilocos Norte, Ilocos Sur, La Union, Pangasinan, Batanes, Cagayan kabilang na ang Babuyan Islands, Zambales, Bataan, Cavite, Batangas, Mindoro Province, Northern Palawan kabilang na ang Kalamian, Cuyo at Kalayaan Islands kaya hindi paring maaaring pumalaot ang mga kababayan nating mangingisda at maliliit na sasakyang pandagat.