Judith Estrada-Larino

Naapektuhan ng bagyong Odette ang halos 99% ng populasyon ng Siargao Island sa Surigao Del Norte kabilang ang mga turista.

Ayon ito kay Surigao Del Norte Representative Francisco Jose Matugas, II.

Ipinabatid din ni Matugas na nasa total devastation o sirang sira ang buong isla ayon na rin sa amang si Surigao Del Norte Governor Francisco Matugas nang maglibot ito sa nasabing isla kahapon.

Walumpung porsyento aniya ng mga gusali sa munisipyo ay matindi ring napinsala gayundin ang airport terminal bagamat bahagya lamang ang danyos sa ospital.

Isinailalim na sa state of calamity ang lalawigan ng Bohol.

Kasunod na rin ito nang nilagdaang executive order ni Bohol Governor Arthur Yap matapos ang matinding pinsala ng bagyong odette sa kanilang probinsya.

Sinabi ni Yap na maraming pamilya sa kanilang lalawigan ang nawalan ng tirahan dahil sa hagupit ng bagyong Odette na sumira rin sa maraming gusali, establishments, government facilities at infrastructure, communication facilities at mga linya ng kuryente.

Una nang inihalintulad ni Yap sa bagyong Yolanda ang naranasan ng Bohol sa bagyong Odette.

50 Pilipino ang stranded sa Europe at South Africa dahil sa banta ng Omicron variant ng COVID 19.

Ipinabatid ito ni DFA Undersecretary for Migrant Workers Affairs Sarah Lou Arriola.

Umapela si Arriola sa mga nasabing Pinoy na makipag-ugnayan sa mga embahada at konsulado ng bansa sa kani-kanilang kinaroroonan para matulungan.

Kasunod na rin ito aniya nang inisyung notice ng DFA sa 20 embahada at konsulado ng Pilipinas sa Europa  para sa repatriation flights ng mga  Pinoy.

Binigyang-diin ni Arriola na mas kumplikado ang proseso sa mga panahong ito dahil ang mga Pilipinong mula sa red list countries ay dadalhin pa sa Netherlands bago sila makauwi sa Pilipinas.

Pumapalo sa 517 ang naitalang mga bagong kaso ng COVID 19, dahilan kaya’t umakyat na sa halos 2.9 million ang kabuuang kaso ng virus sa bansa.

Ito na ang ika-11 sunod na araw na nakapag-record ang Pilipinas ng mga bagong kaso ng COVID-19 na mas mababa sa isanlibo.

Ayon sa DOH, nananatiling nasa 1.8 percent ang positivity rate na anito’y nasa requirement target ng who na mas mababa sa limang porsyentong positivity rate.

Ipinabatid ng DOH na nasa 14, 338 ang active cases kung saan 911 ang asymptomatic ; 6, 350 ang mild ; 3,837 ang moderate ; mahigit dalawang libo ang severe at 815 ang critical condition.

Sumirit na sa mahigit 2.7 million ang total recoveries kabilang na ang 1,139 na mga bagong gumaling sa COVID 19.

Samantala, 243 ang mga bagong nasawi sa COVID- 19 dahilan kaya’t umakyat na sa mahigit 49 thousand ang death toll.

Iniimbestigahan na ang napaulat na pamamahagi ng papa expire na COVID-19 vaccines sa ilang LGU subalit hindi nagamit sa nakalipas na tatlong araw na National Vaccination Drive.

Ipinabatid ito ni Acting Presidential Spokesperson Karlo Nograles dahil tutok ang gobyerno sa expiration dates ng mga itinuturok na bakuna.

Sinabi ni Nograles na kailangang magamit o maiturok ang mga bakuna kontra COVID-19 na malapit nang mag expire.

Una nang inihayag ng National Vaccination Operations Center na iniimbestigahan na nila kung bakit hindi naiturok ang mga bakunang malapit nang mag expiry.

Kasado na ang big time oil price roll back sa susunod na linggo.

Ayon sa source sa DOE, 2.50 hanggang 2.70 ang ibababa sa presyo ng kada litro ng gasolina at 2.70 hanggang 2.80 sa diesel at maging sa kerosene.

Ang malakihang bawas presyo sa mga produktong petrolyo ay kasunod nang inaasahang pagbaba ng demand sa krudo ngayong umiiral ang travel ban dahil sa banta ng Omicron variant ng COVID-19.

Tanging mga full vaccinated lamang ang pinapayagang makapagsagawa ng water sports activities sa Boracay.

Batay ito sa direktiba ni Aklan Governor Florencio Miraflores.

Nakasaad din sa naturang direktiba ang pagpapatupad ng curfew sa Boracay mula ala 1 hanggang alas 4 ng madaling araw.

Tiwala ang Aklan Provincial Government na tuluy tuloy ang pagiging COVID-19 free ng Boracay kasunod na rin nang mahigpit na pagpapatupad ng mga patakaran sa isla.

Mahigpit na pinag iingat ng isang health expert ang publiko ngayong uubra nang magsagawa ng christmas party matapos luwagan ang quarantine restrictions sa bansa.

Ayon kay Dr. Ninia Gloriani, pinuno ng Vaccine Expert Panel ang anumang kasayahan ngayong holiday ay dapat nakabatay sa COVID-19 restrictions para maiwasan ang pagkalat ng virus sa gitna na rin nang paglutang ng Omicron variant.

Sinabi ni Gloriani na tuloy ang buhay at kailangan aniyang mabuhay sa kabila ng COVID-19 pandemic.

Una nang inihayag ng DILG na uubra na ang christmas parties sa mga lugar na nasa ilalim ng alert level 2.