Judith Estrada-Larino

Nakatakdang i-decongest o ilipat ng selda ang mahigit 400 preso sa Quezon City Jail matapos mapasok ang selda ng mga ito.

Kasunod ito nang naganap na staged jail riot noong Biyernes.

Sa ginawang operasyon ng mga tauhan ng QC Jail sa male dormitory, giniba ng mga ito ang pader at konkretong flooring ng mga selda kung saan nadiskubre ang isang armory.

Tumambad sa mga otoridad ang isang 38 kalibre ng baril, 700 gramo ng marijuana brick, 24 na piraso ng marijuana sachets at paraphernalia, halos 100 piraso ng tabako, mga patalim, ice pick, pana at mga bala at limang celfon.

Sinasabing ilang buwang nagsagawa ng surveillance at covert operation ang mga otoridad sa loob ng nasabing bilangguan bago ikinasa ang aktuwal na operasyon.

Kinalma ni Manila Archbishop Cardinal Jose Advincula ang mga Katoliko na sa halip ay magtiwala sa Democratic Process kaugnay sa nakalipas na eleksyon.

Sinabi ni Advincula na tapos na ang halalan kaya’t dapat nang ipagpatuloy ang pagmamahal, pag-aruga at pagdarasal para sa bansa.

Kasabay nito, nagpasalamat din si Advincula sa mga kabataang first time voters na naging mukha ng bansa para sa kinabukasan.

Pinapurihan din ni Advincula ang mga volunteer ng PPCRV sa pagtiyak na magkakaruon ng malinis na eleksyon.

Inihirit muli ng grupong PISTON ang pagsuspindi sa pagpapataw ng excise tax sa mga produktong petrolyo.

Iginiit ni PISTON National President Mody Floranda na maliit lamang ang ibinaba ng presyo ng oil products sa linggong ito kumpara sa itinaas nito nuong mga nakalipas na buwan.

Ayon kay Floranda, dapat ibasura ng papasok na gobyerno ang Oil Deregulation Law gayundin ang Train Law at maging ang VAT at Excise Tax sa Oil products upang kahit paano ay madagdagan naman ang naiuuwing kita ng mga tsuper.

P300 na lamang aniya ang kita ng mga tsuper sa 12 hanggang 18 oras na biyahe kahit pa binawasan ng P200 ang dating P900 na boundary sa mga jeep.

Sinabi pa ni Floranda na dagdag na P365 ang kikitain ng mga driver at operator sa halos 20 liters nang nakukunsumong gasolina kada araw, sakaling masuspindi ang excise tax.

Apela pa ni Floranda, habulin ng BIR ang iba pang maaaring pagkunan ng buwis sa gobyerno.

Ibinasura ni Public Health Expert Dr. Tony Leachon ang posibilidad na mag lockdown sakaling sumirit ang COVID-19 cases matapos ang eleksyon.

Ayon kay Leachon, mild lamang ang Omicron case na dapat ding kaagad gamutin.

Bukod dito sinabi sa DWIZ ni Leachon na hindi na papayag ang pribadong sector na mag lockdown pa lalo’t umarangkada na ang ekonomiya ng bansa.

Target ng PhilHealth na maka kolekta ng 205 billion pesos sa pagtataas ng buwanang premium contribution sa 4%  mula sa 3%.

Binigyang diin ni Rey Balenia, Senior Manager ng Corporate Communications Department ng PhilHealth na dagdag benepisyo sa mga miyembro ang itinaas na koleksyon ng kontribusyon.

Tinataya aniya nilang 185 billion pesos mula sa kabuuang koleksyon ay mapupunta sa benefit pay-out sa taong ito.

Pumapalo na sa 54 ang mga bagong kumpuning light rail vehicle o bagon.

Ipinabatid ito ng MRT-3 matapos sumalang sa serye ng speed at quality check ang mga nasabing bagon para matiyak ang kalidad at ligtas na pag biyahe ng mga ito.

Sa kabuuang 72 bagon ng linya, 18 na lamang ang sumasailalim sa general overhauling.

Nasa halos 400 pasahero o mahigit 1,000 pasahero ang maisasakay sa kada tatlong car train set.

Samantala, tuluy-tuloy pa rin ang libreng sakay ng MRT-3 hanggang May 31.

Tagumpay umanong nakapaglagay ng limang marker ang Philippine Coast Guard (PCG) sa West Philippine Sea.

Ito ayon sa PCG ay para matulungan ang mga barko at mangingisda sa paglilibot sa Exclusive Economic Zone (EEZ).

Kabilang sa mga nilagyan ng tig- isang marker ng Coast Guard ang malapit sa Lawak Island, Likas Island at Parola Island at dalawang marker malapit sa Pag-Asa Island.

Sinabi ni PCG Commandant, Admiral Artemio Abu na wala namang naganap na anumang tensyon o negatibong reaksyon ang Chinese Coast Guard bagamat mahigpit itong naka-monitor sa lugar.

Pinapipigil sa Korte Suprema ang pag-canvass sa mga boto ni presumptive president Ferdinand Bongbong Marcos, Jr. gayundin ang tuluyang pagdeklara rito bilang ika-17 Pangulo ng bansa.

Kasunod na rin ito nang inihaing petition for certiorari kung saan iginigiit ng petitioners ang anila’y material misrepresentations ni Marcos sa kanyang Certificate of Candidacy.

Binigyang diin ng petitioners na sa simula’t-simula ay invalid na ang kandidatura ni Marcos at dapat mapawalang bisa ang mga botong nakuha nito.

Dapat unahin ang priority groups sa mga babakunahan pa.

Ayon ito kay Dr. Tony Leachon, public health expert, para makaiwas pa sa matinding epekto ng COVID-19 at sa gitna na rin nang nalalapit na expiration ng COVID-19 vaccines sa susunod na buwan.

Sinabi sa DWIZ ni Leachon na kailangang matutukan ang vaccination rate sa mga negosyo na unti unti na ring nagbubukas at huwag munang ipilit ang pagbahay-bahay para makapagturok sa mga hindi pa bakunado.

Kasabay nito hinimok ni Leachon ang mga dapat magpa booster na dahil mawawala na ang bisa nito makalipas ang anim na buwan bukod sa magta-tag ulan na kayat kailangang maging protektado sa iba pang mga sakit.

Suspendido pa rin ang Peryahan ng Bayan.

Ito ang ipinaalala ni DILG Secretary Eduardo Año sa PNP at local government units kaya’t higit na dapat pang palakasin ang kampanya laban sa iligal na sugal.

Ayon sa DILG, maaaring nagpapatuloy ang operasyon ng Peryahan ng Bayan sa ilang lugar dahil ilang operators ang nagpapakita sa mga otoridad ng Writ of Execution na inisyu ng Pasig Regional Trial Court Branch 161 noong January 24, 2020 na pinapayagan silang mag-operate.

Gayunman, ipinabatid ng DILG na binawi na rin ng nasabing korte ng sumunod na buwan ang nasabing Writ of Execution matapos mag isyu ng memorandum ang Office of the President at isinampang urgent manifestation ng PCSO.