Judith Estrada-Larino

Dead on the spot ang isang opisyal ng COMELEC matapos barilin ng hindi nakilalang suspek sa Pinian, Zamboanga Del Norte.

Nakilala ang biktima na si Maricel Peralta, 45 taong gulang at COMELEC officer sa bayan ng Mutia.

Ayon sa mga otoridad , nagmamaneho at pauwi na ng Dapitan City si Peralta kasama ang isang assistant election officer nang bigla itong pagbabarilin sa ginagawang tulay sa barangay Lapu-Lapu.

Sinasabing madilim ang lugar at saglit na huminto si Peralta pagdating sa tulay kung saan mayruong mga nakatambak na lupa.

Iniimbestigahan na ng mga otoridad ang dahilan ng insidente.

Ayaw na ni Incoming National Security Adviser Clarita Carlos na buhayin pa ang peacetalks sa CPP-NPA-NDF.

Gayunman, sinabi ni Carlos na dapat manatili ang peace and order councils na nakikita niya aniyang may magandang resulta naman.

Ayon pa kay Carlos,dapat ituloy na lamang kung ano na ang napagkasunduan at himukin ang mga rebeldeng komunista na maging bahagi ng pagbabago.

Kasabay nito, inihayag ni Carlos na hindi pa siya nakakabuo ng sariling team at hindi pa nakikipag ugnayan kay Outgoing National Security Adviser Hermogenes Esperon.

Halos tatlong milyon na lamang ang bilang ng mga Pilipinong walang trabaho sa buwan ng Abril.

Ayon ito sa Philippine Statistics Office matapos bumaba sa 2.76 million ang jobless Pinoys nuong Abril na itinuturing na pinakamababa base sa pinakahuling labor force survey sa gitna ng COVID-19 lockdowns.

Ipinabatid ni Philippine Statistic Authority (PSA) Chief at National Statistician Claire Dennis Mapa na ang mga walang trabaho nuong Abril ay mas mababa sa mahigit apat na milyong jobless Pinoys nuong April 2021 at halos tatlong milyon nitong buwan ng Marso.

Ang naitalang bilang ng mga walang trabaho nuong April ay nagpapakita ng 5.7% na unemployment rate na mas mababa sa 5.8% nuong Marso.

Kasado na ang mga paghahanda ng Department of Agriculture kaugnay sa napipintong pagtaas ng presyo ng imported rice.

Sinabi ni Agriculture Secretary William Dar na puspusan na ang kampanya nila para palakasin ang produksyon ng bigas sa bansa.

Sa katunayan, ipinabatid ni DAR na do-doblehin nila o gagawing P6B ang fertilizer subsidy sa mga magsasaka upang mas lumakas pa ang produksyon ng bigas.

Nagkausap na sina outgoing Justice Secretary Menardo Guevarra at incoming Secretary Jesus Crispin “Boying” Remulla.

Sinabi ni Guevarra na mahalaga ang pagpupulong nila ni Remulla para matiyak ang maayos na transition ng liderato at tuluy-tuloy na operasyon ng DOJ.

Inihayag ni Guevarra na nananatili siyang bukas sa mga susunod na pulong kay Remulla at handa siya aniyang makunsulta may kaugnayan sa mga usapin sa DOJ

Manunumpa si Remulla bilang bagong Justice Secretary sa June 30. —sa ulat ni Bert Mozo (Patrol 3)

Mataas na bilang ng engagements at followers ang gagamiting basehan para mabigyan ng accreditation ang isang blogger sa Malakanyang.

Ayon ito kay Incoming PCOO Secretary Trixie Cruz-Angeles na nagsabi ring nirerepaso na nila ang Blogger Accreditation Policy ng palasyo na una nang naisantabi sa ilalim ng Duterte administration.

Ipinabatid ni Angeles na sa ilalim ng lumang polisiya, nasa 20,000 ang minimum followers na kailangang malampasan para makunsider o mabigyan ng palace accreditation.

Bukod dito, inihayag ni Angeles na tinitingnan nila ang engagements o yung pagtugon ng mga tao sa isinulat o ipinakita mo sa panig ng vloggers o kung gaano sila ka interesado sa sinasabi.

Binigyang diin ni Angeles na tinututukan nila sa pag repaso ng polisiya ay kung papayagan o hindi na dumalo sa regular na Palace briefings ang mga vloggers.

Ilang stalls sa Balintawak Cloverleaf Market ang nagsara ng tatlong oras simula kaninang alas-7 ng umaga.

Ito ayon sa stall owners ay bilang protesta sa pagtaas ng bayad ng renta nila sa nasabing palengke.

Sinabi ni Miguelito Mangunay, pangulo ng Balintawak Cloverleaf Market Association na mahigit 1,000 stall owners ang lumahok sa nasabing tigil benta.

Mababang rate ng mga isinasailalim sa testing.

Ito ayon kay Dr. Butch Ong, Fellow ng OCTA Research Group ang nakikita nilang dahilan kaya’t mababa rin ang mga naitatalang kaso ng COVID-19.

Gayunman, sinabi sa DWIZ ni Ong na karamihan sa mga nagkakasakit ay mayruong mild symptoms ng COVID-19.

Ipinabatid ni Ong na mataas ang positivity rate at mababa ang reproduction number subalit hindi ito nangangahulugang wala ng COVID kaya’t dapat pa ring mag ingat ang lahat.

Kontra si incoming National Security Adviser Clarita Carlos sa pagre-red tag na wala aniyang magandang resulta.

 Sa halip, binigyang-diin ni Carlos na pagtutuunan nila ng pansin ang pag resolba sa ugat ng insurgency.

 Sinabi ni Carlos na hindi tamang gumamit ng kung anu-anong label at akusahan ang kung sinu-sinong personalidad na komunista dahil tutugunan aniya ng Marcos administration ang mga usapin ng kakulangan ng oportunidad at kawalang katarungan na siyang nagreresulta sa insurgency.

 Ayon pa kay Carlos, hindi lamang sa economic life ng bansa nakatutok ang natinal security kundi dapat ding makunsider dito ang human, food, energy at water security.

Ibinunyag ni Ruffa Gutierrez ang pagkikita muli ng kanyang mga anak at ama nilang si Yilmaz Bektas makalipas ang 15 taon.

Tinawag na “a beautiful reunion” ni Ruffa ang pakikipagkita muli ng mga anak na sina Lorin at Venice sa kanilang amang si Yilmaz at pamilya nito sa Istanbul, Turkey na magaganap ngayong weekend.

Ibinahagi ni Ruffa sa kanyang IG ang video ng compilation ng childhood photos ng mga anak kasama rin ang ama at lola nila na kapwa itinag din ni Ruffa.

Tila nagdulot naman ng positive vibes ang balitang ito ni Ruffa na nilagyan nito ng #togetheragain kaya’t napa-comment ang maraming celebrity na natutuwa sa reunion ng mag-a-ama.