Judith Estrada-Larino

Nagdiwang ang Filipino community matapos opisyal na kilalanin ang bagong Little Manila Avenue sa Roosevelt Avenue sa Woodside, Queen sa New York City.

Ang Little Manila Avenue mula 69th Street hanggang 70th Street sa kahabaan ng Roosevelt Avenue ay sentro ng negosyo at tirahan ng maraming Pinoy sa New York.

Maraming Pinoy community leaders, maliban sa online petition ang nag lobby sa City Council ng New York para isulong ang panukalang Little Manila sa nasabing lugar.

Ang paglusot ng nasabing panukala ay bilang pagkilala na rin ng City Council ng New York City sa naging sakripisyo ng Pinoy medical workers na naging frontliner sa kasagsagan ng COVID-19 pandemic.

Noong nakalipas na taon ay ipinasa ng New York Council Parks and Recreation Committee sa botong 15-0 ang panukala ni dating City Council Jimmy Van Bramer na baguhin ang pangalan ng 199 Thoroughfares at Public Places kabilang na ang Little Manila.

Inimbitahan ng Egypt para sa climate change conference si President Elect Ferdinand Bongbong Marcos, Jr.

Ang imbitasyon sa nasabing event sa Nobyembre ay ipinaabot ni Ambasador Ahmed Shehabeldin Ibrahim matapos mag courtesy call kay Marcos.

Bukod dito, tinutukan nina Marcos at Ibrahim ang mga pananaw ng dalawang bansa hinggil sa mga usaping may kinalaman sa pagpapaigting sa bilateral relations ng Pilipinas at Egypt.

Sinabi ni Ibrahim na naging mabunga ang kanilang paghaharap ni Marcos kung saan ipinaabot niya rin na ang Pilipinas ang isa sa itinuturing nilang key sports ng international relations.

Ibinaba na ng DOTr ang tunnel drilling machine bilang hudyat nang pagsisimula ng konstruksyon ng kauna-unahang subway sa bansa.

Pinangunahan ng Pangulong Rodrigo Duterte ang pag unveil sa nasabing drilling machine kasabay nang pagdiriwang ng ika-124 na anibersaryo ng kasarinlan ng bansa.

Ang nasabing subway, ayon sa Pangulo ay regalo ng mga Hapon sa mga Pilipino matapos pondohan ng Japanese Government ang pagtatayo ng 33 kilometer subway sa pamamagitan ng halos ¥ 358-B loan mula sa Japan International Cooperation Agency.

Inaasahang mababawasan ng kalahati ang isang oras na biyahe sa pagitan ng NAIA at northern part ng Metro Manila ng nasabing subway na mayroong 17 istasyon mula Valenzuela hanggang Pasay at fully operational sa taong 2027.

Pabor ang National Center for Commuter Safety and Protection sa hanggang tatlong pisong dagdag sa singil sa pasahe partikular sa mga jeep.

Ayon ito kay Elvira Medina, Chairperson ng grupo, subalit malaking problema ng publiko sa mga jeepney owners ay kalumaan ng kanilang mga sasakyan.

Hindi dapat ikarga sa mga pasahero ang mababang kalidad ng mga pampasaherong jeep kung saan ang mga lumang unit ay mas marami ang nakukunsumong gasolina.

Pabor ang samahan ng provincial governors sa naging direktiba ni Cebu governor Gwen Garcia na gawing optional ang pagsusuot ng face mask sa lalawigan.

Ito ayon kay Marinduque governor Presbitero Velasco, pangulo ng League of Governors of the Philippines ay nakabatay sa local autonomy ng provincial governments.

Gayunman, nilinaw ni Velasco na mayroon pang pandemya at tanging ang IATF ang susundin ng local government officials kaugnay sa usapin ng COVID-19 na hindi pa rin naman aniya nawawala.

Hindi kinikilala ng DILG ang direktiba ni Cebu Governor Gwen Garcia na “optional” na ang paggamit ng face mask sa kanilang lalawigan.

Ayon kay DILG Secretary Eduardo Año, mayruong IATF guidelines na aprubado ng Pangulo na dapat sundin kaugnay sa pagsusuot ng facemask.

Sinabi ni Año na maaari lamang alisin ang face mask kung kakain o nagsasagawa ng mga aktibidad sa well ventilated na mga lugar.

Iginiit ng DILG sa publiko at local government officials na hindi pa tapos ang pandemya at uubra pa ring mahawahan ng COVID-19.

Kinundena ng COMELEC ang pagpatay sa isang election officer sa Zamboanga Del Norte.

Kaugnay nito, tiniyak ni COMELEC Acting Chairperson Socorro Inting ang hustisya para sa pamilya nang pinaslang na si Engineer Maricel Peralta.

Sinabi ni Inting na nakikipag ugnayan na sila sa PNP at magbibigay ng update lalo na sa pamilya ni Peralta hinggil sa itinatakbo ng imbestigasyon.

Ilang lugar sa Pampanga ang nakaranas ng flashflood matapos bumuhos ang malakas na ulan.

Nabatid na naputol pa ang supply ng kuryente sa ilang establishment sa San Fernando City dahil sa malakas na hangin na may kasamang pagkulog at pagkidlat.

Nakaranas din ng gutter deep na tubig baha ang major roads tulad ng Jose Abad Santos Avenue at Mc Arthur Highway sa Barangay San Agustin at Dolores.

Ilang motorista at commuter rin ang na stranded sa ilang gasolinahan dahil sa matinding buhos ng ulan.

Limang ambassador mula sa Europe ang nag courtesy call kay President Elect Ferdinand Marcos, Jr. sa gitna na rin nang paghahanda sa pormal na pagpasok ng bagong administrasyon.

Kabilang sa mga diplomat na nagtungo sa BBM headquarters para makipagkita ng personal sa bagong pangulo ng bansa sina UN Representative Ambassador Gustavo Gonzales, Swedish Ambassador Annika Thunborg, Papal Nuncio Archbishop Charles Brown, Irish Ambassador William Carlos at Swiss Ambassador Alain Gaschen.

Ang nasabing courtesy call ay bahagi na ng tradisyon para sa mga bagong halal na opisyal.

Una nang nag courtesy call kay Marcos ang UN Deputy Secretary of State gayundin ang mga diplomat mula sa Germany, Italy at ASEAN.

Inihayag ng Department of Energy na inaasahang bababa ang presyo ng liquefied petroleum gas o lpg sa mga susunod na buwan.

Ayon sa DOE, mayroong indikasyon ng price rollback dahil sa mahinang demand sa global market, partikular sa Europe, United States, China, Mexico, South Korea, at Japan.

Malalaman anila sa June 30 ang susunod na magiging price range ng LPG.

Gayunman, posibleng sumirit muli ang presyo ng lpg pagdating ng Oktubre dahil sa winter season sa Northern Hemisphere.

Hanggang nitong Hunyo 1, naglalaro sa P879.20 hanggang P1,107.09 ang kada 11-kilogram ng LPG sa Metro Manila.