Nakiisa na rin ang Estados Unidos sa paghingi ng hustisya kaugnay sa pagpaslang kay brodkaster Percy Lapid.
Ito ay matapos i-welcome ng US Embassy ang pagtiyak ng mga otoridad hinggil sa puspusang imbestigasyon sa nasabing krimen.
Binigyang diin ng US Embassy na mahalaga ang freedom of expression sa pagbuo ng magandang bukas para sa mga Pilipino kayat tiwala silang maibibigay ang hustisya sa pagpatay kay Lapid.
Una nang kinundena ng Canada at The Netherlands ang pananambang kay Lapid.
Nagpalabas ng alert ang World Health Organization (WHO) laban sa apat na cough syrup na gawa ng Maiden Pharmaceuticals sa India.
Kasunod na rin ito nang pagkakasangkot ng nasabing pharmaceutical company sa pagkamatay ng 66 na bata sa The Gambia matapos magkaruon ng acute kidney injuries.
Ibinabala rin ng WHO ang global exposure dahil sa posibilidad na pamamahagi nito ng mga contaminated cough syrups sa labas ng West African Country.
Iniimbestigahan na ng WHO katuwang ang kumpanya at regulatory authorities sa India ang nasabing insidente.
Magpupulong pa ang Inter Agency kaugnay sa plano ng Department Of Migrant Workers (DMW) na bumalangkas ng scholarship fund para sa healthcare workers na magta trabaho sa ibayong dagat.
Ayon kay DMW Secretary Susan Toots Ople, tinututukan na nila ang paghahanap nang pagkukunan ng scholarship fund sa pamamagitan ng bilateral talks sa ibang bansa kung saan hihilingin nilang makapag contribute ang ibang bansa para rito partikular ng medical technologist.
Nagmula mismo aniya ang nasabing ideya sa Minister of Health ng Singapore at bukas ang Singapore Based Temasek Foundation at US Based Staffing Agencies para tumulong sa nasabing panukala.
Aminado si Ople na hindi talaga maiiwasang umalis ng bansa ang healthcare workers para mag trabaho sa ibang bansa.
Isasagawa sa susunod na linggo ang nasabing pulong ng Inter Agency na kinabibilangan ng DOH, DFA at DOLE.
Patuloy ang pagdagsa ng mga nakikiramay sa pamilya nang pinaslang na brodkaster na si Percy Lapid.
Kagabi, marami sa mga nagtungo sa Paz Memorial Chapel sa Sucat, Paranaque ay mga ka trabaho at tagasubaybay ni Lapid sa kanyang programa.
Hindi pa rin makapaniwala ang mga ito sa nangyari kay Lapid kaya’t nakikiisa sila sa panawagang hustisya sa sinapit ng beteranong brodkaster.
Patuloy naman ang pasasalamat ng pamilya ni Lapid sa pangunguna ng kapatid nitong si Roy Mabasa sa pakikiramay na tinatanggap kasabay ang panawagan pa ring mapanagot ang nasa likod ng nasabing krimen.
Target ng Gilas Pilipinas na dalasan pa ang ensayo nito, mahigit isang buwan bago ang November window ng FIBA Basketball World Cup Asian Qualifiers.
Ipinabatid ni Gilas Coach Chot Reyes na hindi bababa sa 16 na players ang sumasali sa ensayo simula pa nuong isang buwan.
Binubuo ito aniya maging ng mga manlalarong inimbitahan nila mula sa UAAP at NCAA.
Sinabi ni Reyes na inaayos na lang nila ang mga schedule ng mga nasabing players para higit na matututukan ang ensayo para sa nalalapit na torneo.
Pasok sa championship ng World Junior Figure Skating ang Filipino American figure skater na si Sofia Frank.
Ang 16-anyos na FilAm ay pumuwesto sa ika-16 mula sa 49 sa ISU Junior Grand Prix sa Gdansk, Poland.
Si Frank ay umiskor ng 92.76 sa free skate at 49.99 sa short program at nasa ika-22 puwesto sa Junior World Championships.
Itinakda sa Calgary, Alberta sa February 2023 ang Junior World Championships.
Gumulong na ang bilateral military exercise ng Pilipinas at Amerika ngayong araw na ito.
Ayon sa Philippine Marine Corps sinimulan na ang 6th iteration ng kanilang Kamandag exercises katuwang ang US Armed Forces sa Philippine Navy Officers Club sa Taguig City at ito ay tatagal hanggang October 14.
Sinabi ng PMC na ito ang kauna-unahang pagkakataon na makikiisa bilang observers ang military personnel mula Japan at South Korea.
Layunin ng exercises na pagtibayin pa ang bilateral cooperation at interoperability ng mga troop sa pagsasagawa ng combined tactical operations para mapaganda ang kapasidad sa special operations, coastal defense capability, humanitarian assistance at disaster response.
Bukod pa ito sa chemical, biological, radiological at nuclear operations.
Tiwala naman ang pmc na makakasama nila sa ganitong exercise ang iba pang foreign military allies para mapaigting pa ang iba’t ibang military operations.
Tuloy ang online portal ng Land Transportation Office (LTO).
Ipinabatid ito ni Divine Reyes, hepe ng LTO strategic communications office matapos umanong ihayag ni LTO chief Teofilo Guadiz III na nais niyang i-abolish ang LTMS o Land Transportation Management System dahil sa mga abusadong fixer na nag-a-apply ng driver’s license ng kanilang mga kliyente.
Binigyang-diin ni Reyes na palalakasin pa nila ang antas ng proteksyon sa mga online transaction sa pamamagitan ng LTMS na una nang bumagsak matapos magkaaberya.
Nilinaw ni reyes na ang tinutukoy ni Guadiz ay ang pag-aalis o pagpapalakas sa pagsasagawa ng online validation exam para sa renewal ng driver’s license at hindi ang abolition ng LTMS.
Una nang ikinabahala ni Guadiz ang validation exam dahil walang facial recognition mechanism para i-verify ang pagkakakilanlan ng aplikante.
Inaasahang makukumpleto sa 2028 o 2029 ang Metro Manila subway project, ang kauna-unahang underground railway system sa bansa.
Ayon ito kay transportation undersecretary Cesar Chavez kasunod sa isinagawang ground breaking ceremony ng nasabing proyekto na pinangunahan mismo ng Pangulong Ferdinand “Bongbong” Marcos Jr. kaninang umaga.
Ipinabatid ni Chavez na isa sa mga contractor sa nasabing proyekto ay siya ring gumawa ng subway sa Tokyo, Indonesia, Vietnam at Singapore.
Nagsimula na aniya ang konstruksyon nito sa East Valenzuela station at depot gayundin sa North Avenue station.
Binigyang-diin pa ni Chavez na ang Metro Manila subway project ay matatag o resilient laban sa lindol at pagbaha dahil mayroon itong teknolohiya tulad ng sa Japan na madalas bayuhin ng lindol.
Sakop ng subway railway project ang 33 kilometers na mayroong 17 istasyon mula Valenzuela City hanggang NAIA terminal 3 sa Pasay City.
Palalakasin pa ng Eternal Chapels Cabuyao ang operasyon nito.
Kasunod na rin ito nang pagdiriwang ng Eternal Chapels Cabuyao ng ikalawang anibersaryo nito nuong Miyerkules, September 28.
Isang misa ang nagsilbing hudyat nang pagdiriwang bilang pasasalamat sa anibersaryo ng Eternal Chapels Cabuyao na dinaluhan ng officers at staff ng Eternal Gardens at Eternal Chapels gayundin ng barangay at local officials ng Cabuyao, Laguna.
Kabilang sa mga nakiisa sa pagdiriwang ng Second Anniversary ng Eternal Chapel Cabuyao sina Eternal Gardens Cabuyao branch Manager Alexander Atienza, President and COO Numeriano B. Rodrin, Barangay Mamatid SK chairman Raul Lapaz, Jr., Barangay Mamatid chairman Jervis R. Himpisao, Eternal Gardens Executive officer Dannica Nicole A. Cabangon, Finance Manager Rose Donor, Assistant PR Manager Ivee Johnson, Eternal Chapels Assistant Vice President for Operations Angelito D. Twaño, and Eternal Gardens MIS Manager Geoffrey C. Coberos.
Gayundin sina Rose Manimtim, Helen de Leon, Gladys Bautisma, mga kinatawan ng Barangay Marinig; Barangay Casile Chairman Paulino C. de Leon, Barangay Diezmo Chairman Nolasco A. Manimtim, Barangay Poblacion Uno chairman Raul S. Ramos at Barangay Counselors Baltazar Rodrigez at Michael Juliano.
Kabilang sa mga serbisyong alok ng Eternal Chapel na matatagpuan sa loob ng Eternal Gardens Cabuyao sa Barangay Mamatid ay kumpletong mortuary at chapel services bukod pa sa maayos nitong family rooms, mayruong 24 hour security, libreng Wi-Fi at malawak na parking space.
Ang Eternal Chapels sa ilalim ng Eternal Gardens ay isa sa mga bumubuo sa ALC Group of Companies na pinangangasiwaan ni D. Edgard Cabangon.