Judith Estrada-Larino

Binulabog ng protesta sa labas ng Batasang Pambansa ang deliberasyon sa 2021 budget ng Office of the President.

Pumapalo sa P8.23-bilyon ang budget ng Office of the President para sa susunod na taon.

Sinabi ng College Editors Guild of the Philippines (CEGP) na kontrobersyal ang nasabing budget ng tanggapan ng Pangulong Rodrigo Duterte dahil sa inilaang confidential at intelligence funds nito na dapat ay gugulin na lamang sa mahalagang bagay tulad ng social services.

Iginiit ng mga militante ang pagbura sa naturang budget na sadyang inilagay anila ng Palasyo para matutukan ang mga hinihinala nitong kaanib ng New People’s Army.

Itinakda na ng Metro Manila mayors ang pagsasara pansamantala ng lahat ng sementeryo ngayong Undas.

Ayon kay Parañaque City Mayor Edwin Olivarez, chairman ng Metro Manila Council (MMC), nagkasundo ang mga alkalde sa kalakhang Maynila na isara muna ang mga sementeryo mula ika-29 ng Oktubre hanggang ika-4 ng Nobyembre.

Layon ng hakbang na matiyak na maiiwasan ang pagkalat ng coronavirus disease 2019 (COVID-19) dahil hindi dadagsa ang publiko sa mnga sementeryo sa paggunita ng Araw ng mga Patay ngayong taon.

Sinabi ni Olivarez na hinihimok na nila ang publiko na dumalaw na bago mag ika-29 ng Oktubre sa kanilang mga namayapang mahal sa buhay.

Muling tiniyak ni Olivarez ang pagpapatupad ng physical distancing sa mga sementeryo sa Metro Manila na nakasailalim pa rin sa general community quarantine.

Idinipensa ng Department of Transportation (DOTr) ang binawasang espasyo o pagitan ng mga pasahero sa mga pampublikong sasakyan simula ngayong araw na ito.

Ayon kay Transportation Undersecretary Artemio Tuazon, pinagbasehan nila sa bawas-distansya ang pag-aaral ng mga expert mula sa railways at medical fields.

Partikular na tinukoy ni Tuazon ang sistema sa pag-aaral ng International Union of Railways na nagsasabing hindi naman ganun kailangan talagang malaki ang distansya.

Binigyang diin naman ni Tuazon na batay naman sa pahayag ng medical experts, mababawasan ang transmission rate ng 94% hanggang 95% kung susundin ang health protocols tulad ng pagsusuot ng face mask at face shield, gayundin ang paghuhugas madalas ng kamay at regular disinfection.

Sinabi pa ni Tuazon na nakabase pa sa 1980’s study ang 1-meter distance na inirekomenda ng World Health Organization (WHO) para maiwasan ang pagkalat ng coronavirus.

Magugunitang inihayag ng DOTr na makalipas ang dalawang linggo ay ibababa pa sa 0.5-meter ang distansya at 0.3-meter na lamang makalipas ang panibagong dalawang linggo para na rin mapataas ang bilang ng mga pasahero sa mga pampublikong sasakyan.

Kinumpirma ni Tagaytay City Administrator Gregorio Monreal ang pagdagsa ng mga turista sa lungsod para sa ‘staycation’ nitong nakalipas na weekend.

Sinabi sa DWIZ ni Monreal na welcome naman ang lahat sa Tagaytay City, bagamat mahigpit nilang ipinatutupad ang minimum health and safety protocols.

Ayon pa kay Monreal, nagpapatupad pa rin sila ng checkpoints subalit mas mahigpit sila sa mga restaurant na masususpinde ang operasyon kapag sumuway sa mga patakaran.

Meron pa rin tayong checkpoint pero mas mahigpit po kami sa mga establishment na pupuntahan nila,” ani Monreal. —sa panayam ng Santos at Lima sa 882

Wala nang anumang pagkakataon na papayagang makapasok muli sa bansa si U.S. Marine Lance Corporal Joseph Scott Pemberton.

Ayon ito kay Dana Sandoval, spokesperson ng Bureau of Immigration, matapos tuluyang ipa-deport si Pemberton pabalik ng Amerika, kahapon, ika-13 ng Setyembre.

Sinabi sa DWIZ ni Sandoval na kahit ilang dekada pa ang lumipas ay nakalagay na sa record ng BI na banned na sa bansa si Pemberton.

Siguro dahil nga sya ay naconsider na isang undesirable alien, talagang wala na syang opportunity to come back in the Philippines. And any attempt po na subukang pumasok ng Pilipinas, hindi na raw sya mapapapasok because of what happened. And he is already considered na undesirable alien, so, ‘yung pangalan nya po ay nakalagay na sa aming computer system. Kahit 10, 20, 30 years from now, made-detect po ‘yan ng ating Immigration officers,” ani Sandoval. —sa panayam ng Balitang Todong Lakas

Pinayuhan ng Department of Health (DOH) ang publiko na pumili ng mga sasakyang kayang magpatupad ng 1-meter physical distancing.

Kasunod na rin ito nang pagsisimula ngayong araw na ito ng binawasang distansya o nasa 0.75 meter na lamang na distansya sa isa’t isa ng mga sumasakay sa mga pampublikong sasakyan.

Iginiit ng DOH ang pagsusuot ng face mask, face shield at paghuhugas palagi ng kamay na malaking bagay para makaiwas sa coronavirus disease 2019 (COVID-19).

Muling binigyang diin ng DOH ang pananatili muna sa bahay ng mga senior citizen, immunocompromised, mga may karamdaman at wala pang 21 taong gulang.

Kaagad nagsagawa ng contact tracing si Baguio City Mayor Benjamin Magalong para matunton ang mga nakasalamuha ni dating Manila Archbishop Luis Antonio Cardinal Tagle na nagpositibo sa coronavirus.

Sinabi ni Magalong, nagsisilbing contact tracing czar, na inalerto na nila ang mga nilapitan at nakasalamuha ni Tagle.

Tiwala aniya silang makikipag-ugnayan sa kanila ang simbahan para sa development ng sariling contact tracing sa mga nakahalubilo ni Tagle na madali namang matunton dahil kilala sa buong bansa ang dating Manila archbishop.

Wala namang pangamba ang Vatican dahil huling nakaharap ni Tagle ang Santo Papa noong ika-29 ng Agosto pa.

Bumuhos ang dasal para sa agarang paggaling ni Tagle.

Patuloy na sinusunod ng mga bus at jeep ang 1-meter physical distancing ng mga pasahero nito.

Ito, ayon mismo sa mga driver at konduktor, ay dahil hindi nila batid kung paano sukatin ang .75 meter na bagong physical distancing guideline na ipinag utos ng Department of Transportation (DOTr) sa lahat ng mga pampublikong sasakyan simula ngayong ara, Lunes, ika-14 ng Setyembre.

Nananatiling 1-meter o one-seat-apart pa rin ang basehan ng mga bus at jeep tulad na lamang sa Commonwealth Avenue sa Quezon City —pagitan sa isa’t isa ng mga pasahero nito.

Una nang inaprubahan ng Inter-Agency Task Force (IATF) ang panukalang pataasin ang bilang ng mga pasahero sa public transportation sa pamamagitan nang pagbabawas ng physical distance sa mga commuter.

Nailipat na sa Bureau of Immigration (BI) mula sa Bureau of Corrections (BuCor) ang custody ni U.S. Marine Lance Corporal Joseph Scott Pemberton.

Ayon kay BuCor Spokesperson Gabriel Chaclag, nakumpleto bago mag alas-12 ng tanghali ang paglilipat ng custody ng sundalong Amerikano.

Ipinabatid pa ni Chaclag na nakakuha na rin si Pemberton ng kopya ng absolute pardon na iginawad sa kanya ng Pangulong Duterte.

Kahit nailipat na sa BI ang custody ni Pemberton, mananatili ito sa detention facility sa loob ng Camp Aguinaldo hanggat hindi pa siya nadedeport.

Una nang inihayag ng BI na kukumpletuhin na nito ang deportation proceedings laban kay Pemberton matapos makuha ang kustodiya nito sa BuCor.

Nirerespeto ng Malacañang ang desisyon ng National Telecommunications Commission (NTC) na bawiin ang frequencies ng ABS-CBN.

Ipinabatid ni Presidential Spokesman Harry Roque na tiwala sila sa nasabing pasya ng NTC bilang isang quasi judicial body.

Una nang inihayag ng NTC na hindi na uubrang magpatuloy pa ng kanilang operasyon ang media giant dahil sa kawalan ng legislative franchise.