Judith Estrada-Larino

Tatanggalin ng Department of Education ang mother tongue bilang subject sa grades 1 hanggang 3 para mapaluwag ang curriculum ngayon.

Ito ayon kay education undersecretary Epimaco Densing III ay dahil mayroon namang english at Filipino subjects.

Hindi na aniya kailangan ang mother tongue dahil araw araw na itong nagagamit sa mga eskuwelahan, sa mga komunidad at maging sa pag-uusap sa loob ng pamilya.

Sa halip, ipinabatid ni Densing na ilalaan na lamang ang 50 minutes sa national reading at math programs.

Napagpasyahang alisin ang mother tongue bilang subject matapos konsultahin ng DepEd ang iba’t ibang sektor at maging stakeholders sa pag-repaso ng curriculum para sa kinder hanggang grade 10.

Nangunguna muli ang Quezon City bilang pinakamayamang lungsod sa bansa noong 2021.

Ayon sa annual financial report on local governments ng Commission on Audit, nasa 451 billion pesos ang halaga ng assets ng Quezon City na bumaba ng isang bilyon ang assets noong 2020.

Ikalawa namang pinakamayamang lungsod sa bansa ang Makati City na nasa 238.5 billion pesos ang halaga ng assets, bagama’t 2019 nang ideklara itong richest city.

Ikatlo namang pinakamayamang lungsod ang Maynila na may 65 billion peso assets, Pasig – 51 billion, Taguig – 36 billion, Cebu – 33.3 billion, Mandaue sa Cebu – 33 billion; Mandaluyong – 31 billion, Davao – 26. 56 billion,  Caloocan City – 23 billion at Zamboanga City – 21 billion.

Ipinabatid ng COA na Taguig City ang pinakamalaki ang nadagdag na halaga ng assets.

Sa mga lalawigan naman, nananatiling pinakamayaman ang Cebu na nasa 215 billion pesos ang kabuuang assets, sumunod ang Rizal na may 30.6 billion ang assets at Batangas – 29. 7 billion.

Sinabi ng COA na halos 98% sa kabuuang 1,715 LGUs ang nakapagsumite ng kanilang financial statements para sa kaukulang audit.

Nasawi sa New Bilibid Prison (NBP) ang lider ng isang investment firm na nasa likod ng multi-bilyong Pyramiding Scam.

Ayon kay Deputy Director General Gabriel Chaclag ng Bureau of Corrections, nakuha na ng pamilya niya ang mga labi ni Jachob “Coco” Rasuman na nasawi dahil sa heart attack.

Si Rasuman, anak ni dating Public Works Undersecretary Bashir Dimaampo Rasuman ay itinuturong utak ng investment scam na nakakulimbat umano ng mahigit P247 million mula sa daan-daang investors hindi lamang sa Pilipinas kundi maging sa Singapore.

Naaresto noong 2012 sa Marawi si Rasuman at dinala sa Maynila matapos kasuhan ng Syndicated Estafa kasama ang siyam na iba pa.

Iginiit ng local officials ang apelang tulong sa gobyerno matapos hagupitin ng magkasunod na bagyo sa buwang ito.

Ayon kay mayor Harry Florida ng Allacapan, Cagayan, malaking bahagi ng kanilang lupaing pansakahan at maging ng karatig bayan nila ang nasira dahil sa mga bagyong Maymay at Neneng.

Dahil dito, sinabi ni Florida na nalubog sa baha ang mga palay na malapit nang anihin kaya’t hindi na maganda ang kalidad ng mga ito.

Kaya patuloy ang panawagan nila sa Pangulong Ferdinand Marcos Jr. bilang agriculture secretary na rin—na tulungan sila para makabangon.

Hindi pa handa sa mga kalamidad o sakuna ang kahalati ng mundo.

Ayon ito sa United Nations kaya’t marami ang nasasawi.

Ipinabatid ng Global Status of Multi Hazard Early Warning Systems: Target G  na batay sa report ng UN Office for Disaster Risk Reduction at World Meteorological Organization, na wala sa kalahati ng least Developed Countries o one third lamang ng small island developing states ang mayroong isang multi-hazard early warning system.

Sinabi ni UN secretary general Antonio Guterres na bigo ang mundong mag-invest para sa proteksyon ng buhay at hanap-buhay ng mga apektado ng kalamidad kayat umaapela siya sa mga bansang tutukan ang early warning systems.

Ang early warning systems ay napatunayang paraan para mabawasan ang pinsala sa mga tao at ari-arian bago dumating ang mga kalamidad tulad ng bagyo, tsunami, tagtuyot at heatwaves.

Nanawagan ang National Association of Electricity Consumers (NASECORE) sa Pangulong Ferdinand Bongbong Marcos, Jr. na atasan ang Energy Regulatory Commission (ERC) na resolbahin ang isyu kaugnay ng electricity rates ng mga supplier ng kuryente ng Manila Electric Company (MERALCO).

Sa kanyang sulat sa Pangulong Marcos, kinastigo rin ng NASECORE ang pagbasura ng ERC sa joint power rate hike petition ng MERALCO at ng power unit ng San Miguel Corporation.

Ayon kay NASECORE President Pete Ilagan, ang supplier ng MERALCO na South Premiere Power Corporation at San Miguel Energy Corporation ay naghain sa ERC ng joint motions para sa isang price adjustment noong May 2022 para itaas ang generation rate sa P5.41 per kilowatt hour mula sa P4.045 per kilowatt hour o karagdagan na P1.36 per kilowatt hour.

Katwiran umano ng ERC, may non-escalation clause o pagbabawal sa South Premiere at SMC Energy magtaas ng kanilang singil sa kanilang unang joint application na tinanggap ng ERC noon pang 2019.

Sinabi naman ni ilagan na tuloy-tuloy pa rin ang pagtaas ng rates ng iba pang mga supplier ng MERCALCO dahil hindi naman napipigilan ang mga ito ng non-escalation clause kumpara sa South Premiere at SMC Energy

Dahil sa sinasabing double standard o hindi patas na patakaran ng ERC, umaapela ang NASECORE kay PBBM na panghimasukan na ang usapin para sa kapakanan ng mga Filipino consumers. —sa ulat ni Aya Yupangco (Patrol 5)

Nagbabala ang Ecowaste Coalition laban sa paggamit ng halloween costumes at mga laruang may button cell batteries.

Ayon sa Ecowaste, maaaring mag resulta ang mga nasabing halloween costumes at laruang may button cell batteries sa pagkasakal at chemical burns at tuluyang maging sanhi ng kamatayan.

Sinabi ng Ecowaste na mag duda na rin sa kaligtasan ng mga nasabing bagay tulad ng halloween themed headbands na mayruong delikadong batter covers at nabibili lamang sa halagang 20 pesos.

Nagpaabot ng commitment ang Pilipinas sa panawagan ng United Nations High Commissioner for Refugees (UNHCR) para sa pagkakaisa tungo sa tagumpay ng Global Humanitarian Agenda.

Sinabi ni Justice Secretary Jesus Crispin Remulla, sa pagpupulong ng UNHCR sa Geneva, Switzerland ang Global Humanitarian Agenda ay hindi lamang dapat naka sentro sa mga tao kundi maging sa kapakanan, kalusugan, kabuhayan at basic human dignity ng bawat isa.

Iginiit pa ni Remulla ang pangangailangang maaksyunan kaagad ang panganib na ma displaced ang vulnerable sectors tulad ng mga kababaihan, mga bata at mga indibidwal na mayruong special needs.

Nanawagan din si Remulla ng pantay na atensyon sa iba’t ibang krisis sa mga rehiyon upang matiyak na walang mapag iiwanang refugees.

Ibinahagi ni Remulla sa nasabing forum ang panawagan ng Pangulong Ferdinand Marcos, Jr. sa UN General Assembly para sa international system hinggil sa dapat na suporta sa vulnerable lalo na sa marginalized, migrants at refugees.